ریڈیو زْرمبش بلوچی | ریڈیو زْرمبش بلوچی

شال:تیرگْواری ءُ دگہ وئیلاں جنینے ءَ ھوار چار مردم بیران بیتگ

شال:تیرگْواری ءُ دگہ وئیلاں جنینے ءَ ھوار چار مردم بیران بیتگ

JUN

16
16 / 06 / 2021 روکپتی بلوچستان 103

تیرگْواری ءُ جتاجتائیں وئیلاں جنینے ءَ ھوار اتا مھمد،زبی اللہ ءُ دیوان نامیں مردمے بیران بیتگ۔ بولان:کچی ءِ ھند سنی ءَ پجار نہ بیتگیں سلاہ بندانی تیرگْواری ءَ اتا مھمد ء مھمد امین جتوی جھمنند سنی بیران بیتگ۔ لیویز ءَ لاش دزگیپتگ ءُ نادراھجاہ بُرتگ ءُ ھژدری کارروائی ءَ پد لاش کھول ءِ دست ءَ داتگ۔ لیویز ءِ رد ءَ اتا مھمد کْوھنیں دُژمنی ءِ دیناں کُشگ بیتگ۔ دکی:اشکر کھنے ءِ لُمبگ ءَ یک کھنکارے زبی اللہ جھمنند اوگانستان بیران بیتگ۔لاش چہ کھن ءَ کشگ ءُ نادراھجاہ ءَ برگ بیتگ،ھژدری چار ءُ ٹپاس ءَ پد کھول ءِ دست ءَ دیگ بیتگ۔ نوشکی:کادر آباد ءَ لین ءِ ٹرانسپارمر ءِ ھرابی ءُ کرنٹ ءِ گرگ ءَ جنینے بیران ءُ گس ءِ گِرانھادیں مشینری سامان سُتکگ اَنت۔ ھب:لاسی دگ ءَ سَے شمبے ءُ چار شمبے ءِ میانی شپ ءَ چہ گسے ءَ لاشے دزکپتگ۔پولیس ءِ رد ءَ دیوان ء راجہ جھمنند کنری سند گس ءِ تہ ءَ دْرنجوک بیتگ ءُ وتکِشی یے بوت کنت،پولیس ءَ لاش نادراھجاہ ءَ بُرتگ ءُ اے بابت ءَ گیش پٹ ءُ پول کنگ برجاہ اِنت۔