ریڈیو زْرمبش بلوچی | ریڈیو زْرمبش بلوچی

سند: سندودیش روولیوشنری آرمی ءِ کماندار شاہ انایت ءَ مرچی 31 مارچ 2023 ءَ سندو دیش ءِ روچ ءِ درگت ءَ ماں رسانکدر ءَ وتی کلوھے شنگ کرتگ۔ آئی ءَ گوشتگ کہ سند سرڈگار چہ ھزاراں سال جتائیں گوستانک، دودمان ءُ پجار ءَ اَبید مرچی گوستانک ءِ ناگیگیں جاورانی دیمپان اِنت۔ پاکستان ءِ جوڑ بیگ ءَ پد پنجاپی لشکر ءُ اسٹیبلشمنٹ ءَ آئی ءِ گواستانی بستار ھلاس کرتگ ءُ سند سرڈگار ءِ زمین، تیاب ءُ دریا ءَ ھوار درسیں روزگار ءُ مڈیانی سر ءَ گوں توپک ءِ زور ءَ اُرش کرتگ ءُ دستیگ کرتگ اَنت۔ آئی ءَ گوشتگ کہ بنگلا دیش ءِ جوڑ بیگ ءَ پد پاکستان وتسر ءَ ھلاس بیتگ۔ چہ ایشی ءَ اَبید پنجاپی لشکر سند ءُ بلوچستان ءَ ھوار درسیں راج ءُ آیانی سرڈگار ءِ سر ءَ سیاسی، مالی ءُ لشکر ءَ دستیگ کرتگ اَنت ءُ نشتگ۔ اے درسیں گوستانکی راستی ءُ سیاسی جاورانی زانگ ءَ پد سندی راھشون سائیں جی ایم سید ءَ چہ مرچی ءَ پنجاہ سال پیش 31 مارچ 1972 ءِ روچ ءَ سندو دیش ءِ آجوئی جنز ءِ برجاہ دارگ ءِ جار جتگ۔ شاہ انایت ءَ گوشتگ کہ سندہ ءِ راجی زْرمبشت ءَ گْوَستانک ءِ جتائیں وھدانی گْوَستگیں درسیں پاکستانی لشکرکشی زور بیگواھی ءُ سدانی کچ ءَ سندی راجدوستیں کارکنانی شھیدی ءُ زور بیگواھی ءَ ھوار پاکستان ءِ درسیں ادارھانی زوراکیانی دیمپانی کرتگ، مرچی چہ وتی لیکہ ءُ جھد ءِ سر ءَ سدک اِنت ءُ وتی گُڈی منزل ءِ نیمگ ءَ جنزاں اِنت۔ آئی ءَ گوشتگ کہ مرچی یک نیمگے ءَ چہ ھیدر آباد ءَ بگر داں کراچی ءُ چہ ٹَٹہ ءَ بگر داں ملیر ءَ سند ءِ درسیں تْیاب دپ ءَ بھریہ ٹائوں، نیو ڈی ایچ اے، کمانڈر سٹی، پزائیہ ٹائون ءُ چائینہ سٹی ءَ ھوار سدانی کچ ءَ شرکت جوڑ بیگ ءَ اِنت۔ اے زوت سندیاں وتی سرڈگار ءِ سر ءَ گوں کمتری ءِ بنیاد ءَ مَٹ کن اَنت ءُ سندی راج چہ وتی تیاب دپ ءُ زِر ءَ دست سر ءَ کن اَنت ءُ نند اَنت۔ انایت شاہ ءَ گوشتگ کہ دومی نیمگ ءَ چین پاکستان اکنامک کوریڈور ( سی پیک ) شوربندی ءِ نام ءَ نوں سند ءِ درسیں تیاب دپاں، شھدگ ءُ ھشکی ءِ ٹکراں ھوار سند ءِ اسٹیریٹجک پوائنٹانی سر ءَ اُرش ءُ زورگِر بیتگ۔ اے درگت ءَ من سندی راج ءَ ھمے گپ ءِ نیمگ ءَ دلگوش دیگ لوٹ آں کہ سندہ اے وھد ءُ آوکیں روچاں تھی ءُ ڈنی رد ءَ زمینی کَچ ءُ کساس ءُ ڈیموگراپِک ءِ ترس ءِ دیمپانی اِنت۔ پہ ایشی ءَ بگیری ءَ گھگیری ءَ مارا یک راجے جوڑ بیگ گوں سنگینی ءَ جیڑگ ءُ مڑگ لوٹ ایت۔ آئی ءَ گوشتگ کہ پنجاہ سال بزاں نیم دھکے پہ کجام راج ءُ راجی آجوئی زْرمبشت ءَ یک مزنیں وھدے بیت۔ ایشی ءِ تہ ءَ زرمبشت ءَ گوستانک ءِ مزنیں جھلی ءُ برزی دیستگ اَنت، سند ءَ درسیں اُرشکار ءُ زورگر ءُ زوراکانی گون ءَ جنگ کرتگ۔ نوں وھد ھمیش اِنت کہ اے نیم دھک ءِ برجاھیں آجوئی جنز ءَ ما درس ھواری ءَ گْوستانک ءِ یک نوکیں سوڑگی جھدے ءِ تہ ءَ ھوار بہ کن ایں ءُ درسیں لیکھی، سیاسی، گھگیری ءُ سپارتی توان، زور ءُ ھواری ءَ راجی جھد ءَ ما وتی راجی آجوئی ءِ نیمگ ءَ بہ بر ایں۔ شاہ انایت ءَ گوشتگ کہ من اے گْوستانکی روچ ءِ درگت ءَ سندی راج ءُ ورنائیں پدریچ ءِ گون ءَ دزبند کن آں کہ مئے باسکا مھکم بہ کن اَنت ءُ گوں ما ھوار بہ بنت دانکہ ما ھواری ءَ سند ءِ سر ءَ اُرشکاریں پنجاپی زورگری ءَ پروش بہ دے ایں ءُ وتی گوستانکی سرڈگار سند ءَ آجو بہ کن ایں۔ بنشون: کلوہ | اکس: دامگ