ریڈیو زْرمبش بلوچی | ریڈیو زْرمبش بلوچی

شاد منی پگری رھشون-پزل شیر بلوچ

شاد منی پگری رھشون-پزل شیر بلوچ

MAY

17
17 / 05 / 2021 نبشتانک 151

مڑاھداریں شاد...! تو کہ چہ رستریں زوراکانی بندی جاہ ءَ آجو بوت ئے، وشکوشیں پروم ءَ ھوار سرجمیں بلوچستان ءِ ھمک در ءُ دیوال ءَ گشئے رژن ءُ زیبائی ءِ دورشھمیں چراگے چراگان بوت، مات زرگل یک برے پدا ورنائی ءِ درک ءُ دوراں بوت، چک، برات ءُ گھار،  کس ءُ آزیز، دوست ءُ سنگت درست اچ گل ءَ زمین ءَ نہ اَتاں، ھنکین ءِ ھمک پل ءُ گواڈگ تئی رھسراں چیر گیج ات، پدا وشیانی پیاپیں استون لھم لھم شنزان اَتاں، زمین ءِ تپتگیں تراول کرار گران اَتاں، ترا ھمک ءَ نوکیں زند ءِ مراد باتی دات ءُ زرشان کت، پل ءُ پل ریچ کت، من اوں سک بے چاڑ اَتاں گوں تو ھبر کنگا ءُ تئی مبارک باتی ءَ، گوں تو کہ ھبر بوت اے سے سال ءِ کھریں تنگی تو وت زانئے پہ ادارے ءِ ھبر ءَ نہ پرشیت دروت ءُ درھبات ءَ پد تئی زمین چھریں توار کہ گوشان کپت یکبرے من چہ گل ءَ وت ءَ گر ءُ دار کت نہ کت، بلے دل ڈڈ کت جوڈی، ڈڈی ءَ پد پدا تئی سکین ءُ دلبڈیانی دورسریں شھکور ءَ منا گیشتر توانا ءُ پزور کت، انچو سما کپت کہ بندی جاہ ءَ اوں تئی پہ زمین جوش ءُ جذبگ گیشتر توانگر کتگ ات انت، تئی مھر زمین اَت، منی اشک زمین ات، منی ءُ تئی رشتہ چہ برات ءُ کٹم ءِ ایدگہ مھلونک ءَ جتا ات، من تو سنگت اَتیں مئے سنگتی ءِ سوب پگری سنگتی ات، گلزمین ءِ اشک ات، زمین ءِ مھر ات، ھاک ءِ وپا ات، مرزبوم ءِ دوستی ات، تو زمین جیڑ ات ءُ شھیدی ءِ پاگ سرا کت، من زمین جیڑ اتگ ءُ توکل ءِ بور ءَ جمازاں، منا تئی ھمک دانک پنت ءُ سوج، ھما جذبگ ءُ توکل کہ تئی سکین ءُ دلبڈیاں منا داتگ انت آ منی رگ ءُ بنداں، دل ءُ دماگ ءَ گلگرک انت ھمک کترہ نوکیں تج کشان انت، تو منی پگری رھشون بوتگ ئے ءُ منا تراشتگ ءُ پہ نازے رودینتگ، من کہ چم پچ کتگاں اے زمین ءِ سرا گام ءِ جنگ تو منا ھیل داتگ، منی لنکک تو گپتگ منا گام پرماتگ، منی سرا دست سماروک تئی منگھیں دست بوتگ، منی درد ءُ گم تو وتی کتگ انت، منی ھمک رنگیں ناز ءُ نکرہ تو اوپار کتگ انت، داں اے جاہ ءَ سر کتگ من تئی گوں وت ءُ گوں مسکیں زمین ءَ مھر ءُ وپا، جھد ءُ جپاکشی ءَ کساس کت نہ کناں.
وتن آشکیں شاد...! اے رستری جاہ ءَ انسان بووگ ءُ راج دوستی ءِ پوشاکانی پوشگ، گوں ماتیں گلزمین ءَ اشک، مھر ءُ وپا، ھاک ءِ ارزشت ءِ زانگ، وتی اندر ءِ زیبائیں مارشتانی سنگارگ ءُ زمین ءِ مکہ ئیں بیرک ءِ برز دارگ، زورگیر ءِ کرا زنڈیں گناھے، اے گناہ اچ تو پیش ھزارانی کچ ءَ دگہ بامردیں زمین زادگ ءَ اوں کتگ ءُ انگت کنگا انت، ھاک ءِ مریدی، وتن ءِ تج مرکیں بھارانی رودینگ، پہ میزر ءُ میتاپ کنگا ھیشی سرانی دیم ھونی المی انت، پہ ٹھلیں آشوب ءِ پرشتگیں بچکنداں وتی ھجگیں بچکند کربان کنگی انت، اے ماتیں ڈگار ءِ نوک رودیں کشارانی لگتمالی ءِ کسہ، اگاں گوشان کپیت ءُ دیرچاریں دیدگانی گندوکے چِن انت، تہ مجگ ءُ دل ءَ گوں سرجمیں بالاد ءَ انچو جمبین انت، اگاں انسان ءِ تہ ءَ تشے انسانیت ھست، مارشت ھست، جیڑگ ھست، چم ھست، گڈا سدک آ اے برھنگیں زوراکیانی ارجان بوت کنت، شاد تو منا مدام گشت دیما جنزان بو، پہ ھک ءُ راستی ءِ جنگ ءَ مدام چو کوہ مزار باھند کنان بو، کوھنگ ءِ سرتلاں چیرگیج ایں زگریں ھونانی لیک تئی راھشون انت، ھمے لسھیں ھون دیرمانیں شادہ ءِ مستاگ انت.
زمین دیوانگیں شاد...! مدام گشتگ ات "بابل جان" اے پند سک دراج انت، اے راہ کہ تو گپتگ اے راہ ءِ تہ ءَ سک باز تاب ءُ پیچ ھست، اے پُرکنٹگیں راہ ءَ باز اڑاند تئی دیما کیت، بلے وتی توکل ءُ ایمان ءَ دمبرگا مئیل، ایمان ءَ چابک کن تئی اشک زمین انت، پدکنزگ تئی مرگ انت، دنیا ءِ تہ ءَ چہ زمین ءِ اشک ءَ مستریں اشک نیست، اے ھون ءِ ھمک ترنپ پہ ما ءُ شما سکین ءُ برجمیں توکل انت، بس جنزگی انت داں ھزاری منزل.
منگھیں شاد سرپد ات، سدک ات، کہ اے بزدلیں پوج آرا جنت شھید کنت، مردماں گشت درا چہ بلوچستان ءَ ڈن برو، چہ وتی ھاک ءَ دور بہ بو، چیاکہ زمین دیوانگیں ھان دوست پیسرا دورندا اے لگوریں پوج ءَ آوار جتگ ءُ داں سے سال ءِ نزیک ءَ وتی چیریں آزارجاھاں ھمک رنگیں ازیت داتگ ات، بلے اے راستی یے کہ پگری بامردیں انسان پہ بندیگی، لٹ ءُ کٹ پدکنز نہ بنت، اچ وتی منزل ءَ گسر نہ بنت، مردماں گشتگ ات ادا ترا اے لگوریں دژمن جنت، گڈا ھمے ھبرے کت شما پہ من بژن ءُ ارمان مکن ات، منی مرگ ءُ زند وتن انت، من وَ دلجماں کہ اے بزدلیں دژمن منا جنت، بلے دریگت منی زگریں ھون زمین ءِ پاکیں دلبند ءَ تلام بہ بنت ھما روچ ءَ من دوبر سالونک باں، شاد تئی تلاھیں واھگ سرجم بوت تو پہ زمین مدامی سالونک بوت ئے،
ھان دوست...! ترا ھبرے بگشاں من زاناں تو ٹھکے دئے ءُ پہ پھر گشئے گڈا کئی مات انت" مات زرگل ءَ ھوار کس ءَ پہ تو موتک نیارتگ ءُ ترنپے ارس نہ ریتکگ درست تئی پہ وتن سالونکی ءَ پھربندگا انت، شاد بس پد ءُ پیشاں ھواراں....ھواراں