ریڈیو زْرمبش بلوچی | ریڈیو زْرمبش بلوچی

شال: بلوچستان ءِ بنجاھی شھر شال ءَ دگ وئیلے ءَ جنین ءُ زھگاں ھوار پنچ مردم بیران ءُ دو مردم زدگ بیتگ بنشون ءِ رد ءَ پنچ شمبے ءِ شپ ءَ شال ءَ بالی پَٹ دگ ءَ تور ناسر پاٹک ءِ نزیک ءَ ڈمپر گاڑی یے ءَ پَرپٹ ءُ رکشھے لپاشتگ، دو گھار ءُ جنینے ءَ ھوار پنچ مردم جاھی بیران ءُ دو مردم زدگ بیتگ۔ چہ گاڑی ءِ لپاشگ ءَ رکشہ دو ٹکر بیتگ۔ بیران بیتگیں مردمانی پجار چہ مھمد یوسپ، تاج مھمد، روزیہ ءُ سدیکہ ءِ نام ءَ زانگ بیتگ اَنت۔ بیران بیتگیں سدیکہ ءِ اُمر نوہ سال ءُ آئی گھار ءِ اُمر شش سال اِنت، بلے آئی ءِ نام زانگ نہ بیتگ۔ زدگ بیتگیں مردمانی پجار چہ پزل مھمد ءُ ناسر ءِ ناماں زانگ بیتگ اَنت۔ بیران بیتگیں مردمانی جون ءُ زدگ بیتگیں مردم پہ درمان کنگ ءَ نادراھجاہ ءَ برگ بیتگ اَنت۔ بیران بیتگیں مردمانی جون چہ ھژدری چار ءُ ٹپاس کنگ ءَ پد کھولانی دست ءَ دیگ بیتگ اَنت۔ گاڑی ءِ ڈرائیور پیر مھمد پولیس ءَ دزگیر کرتگ۔ بنشون: دمگی اھوالکار |اکس: زْرمبش