ریڈیو زْرمبش بلوچی | ریڈیو زْرمبش بلوچی

شال ءَ زورانسری بیگواھیں مردمانی کھولانی زھرشانی نندانک ءَ بیست ءُ چار روچ سرجم بیتگ۔

شال ءَ  زورانسری بیگواھیں مردمانی کھولانی زھرشانی نندانک ءَ بیست ءُ چار روچ سرجم بیتگ۔

AUG

13

شال: گورنر ءُ وتگڑیں مزن وزیر ءِ گس ءِ دیم ءَ زیارت وئیل ءُ زورانسری بیگواھی ءِ بگیری ءَ زورانسری بیگواھیں مردمانی کھولانی زھرشانی نندانک ءَ بیست ءُ چار روچ سرجم بیتگ۔ مرچی چہ ھاران ءَ زورانسری بیگواھیں سدام ھسین ءُ مھمد آسپ ءُ چہ پنجگور ءَ زوانسری بیگواھیں زھیر اھمد ءِ کھول نندانک ءَ اتکگ ءُ نشتگ اَنت ءُ پہ وتی زورانسری بیگواھیں مردمانی آجوئی ءَ لوٹ اش کرتگ۔ مرچی شمبے ءِ روچ ءَ سیاسی سروک مھیم ھان، ھزارہ کمیونیٹی ءِ کارکن نسیم ھزارہ، اھمد ھزارہ ءُ آدگہ مردم پہ ھمدردی درشان کنگ ءَ زھرشانی نندانک ءَ اتکگ اَنت۔ زھرشانی نندانک ءَ چہ بلوچستان ءِ جتا جتاھیں جاھاں زورانسری بیگواھیں مردمانی کھول اتکگ ءُ نشتگ اَنت کہ آیانی نندانک ءَ مرچی بیست ءُ چار روچ سرجم بیتگ۔ آیانی تہ ءَ کسانیں زھگ ءُ پیر زالیں مات ھم ھوار اَنت ءُ چہ موسم ءِ ھرابی ءِ سوب ءَ نادراھیانی آماچ اَنت۔ نندانک ءَ نشتگیں مردمانی لوٹ انگت منّگ نہ بیتگ اَنت آ انگت مزدانک ءِ وداریگ اَنت۔ آیانی ھکی ئیں لوٹ اَنت کہ مئے گپ گوں سنگینی ءَ گوش دارگ بہ بنت ءُ زورانسری بیگواھیں مردمانی زندگی ءِ بابت ءَ سدکی دیگ بہ بیت کہ مئے مردم دروگیں میڑ ءَ کشگ نہ بنت۔ زورانسری بیگواھیں مردمانی کھولانی زھرشانی نندانک دراجکش بوان اِنت بلے چہ سرکار ءِ نیمگ ءَ پہ آیانی لوٹانی منّگ ءَ ھچ وڑیں گامگیج زورگ نہ بیتگ ءُ آیانی لوٹ گوش دارگ بیگ ءَ نہ اَنت۔ گوستگیں روچ ءَ زھرشانی روانک ءَ بیگواھیں مردمانی کھولانی نیمگ ءَ ھمے گوشگ بیتگ اَت کہ اگاں مئے لوٹ منّگ نہ بیت اَنت ما داں مرگ شدکشیں زھرشانی کن ایں۔ بنشون: اھوالکار | اکس: دامگ