ریڈیو زْرمبش بلوچی | ریڈیو زْرمبش بلوچی

شال/ دکی: شال ءَ سلاہ بنداں تیرگواری کرتگ ءُ مردمے کشتگ، دکی ءَ تیرگواری ءَ پنچ مردم ٹپی بیتگ۔ بنشون ءِ رد ءَ شال ءَ کشگ بیتگیں مردم ءِ نام ھاجی امر بنگلزھی اِنت کہ شال ءِ سریاب دگ ءَ پجار نہ بیتگیں سلاہ بندیں مردماں تیرگواری کرتگ ءُ کشتگ۔ آئی ءِ جون پہ ھژدری چار ءُ ٹپاس کنگ ءَ نادراھجاہ ءَ برگ بیتگ۔ دومی نیمگ ءَ دکی ءَ آمیدگس ءَ سلاہ بندانی تیرگواری ءَ پنچ مردم ٹپی بیتگ۔ وئیل ءِ بارو ءَ گوشگ بیگ ءَ اِنت کہ مھمد پزل نامیں مردم پہ پیشی ءَ آمیدگس ءَ آتکگ کہ دومی ٹولی ءَ تیرگواری کرتگ۔ تیرگواری ءِ آسر ءَ وکیلے ھم ٹپی اِنت۔ ٹپی بیتگیں مردم پہ درمان کنگ ءَ نادراھجاہ ءَ برگ بیتگ اَنت۔ بنشون: دمگی اھوالکار | اکس: زْرمبش