شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5185 روچ سرجم بیتگ۔ شمبے ءِ روچ ءَ چہ ژوب ءَ پی ٹی ایم ءِ کارکن سید مھمد اوگان ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ایردستیں راج ءِ کِر ءَ چہ جتائیں ھند ءُ دمگاں دزکپتگیں جونانی یاداشت ھست اَنت کہ آ جون اَبید ءِ چار ءُ ٹپاس کنگ ءَ کبر ءُ کنگ بیتگ اَنت۔
اے گپ پدر اِنت کہ زور بیگواھیں بلوچانی جونانی چگل دیگ ءِ بارو ءَ پاکستان ءِ زورمندیں ادارہ جست گرگ نہ بیتگ اَنت۔ آئی ءَ گوشتگ کہ چہ درسیں زوراکیاں پد بلوچ راجی جنز گوں ترندی ءَ برجاہ اِنت۔
زور بیگواھیں مردمانی کھول پہ وتی زور بیگواھیں مردمانی درگیجگ ءَ گوستانکی جھدے کنگ ءَ اِنت پاکستان ءِ درسیں پندلاں بے سوب کنگ ءَ اَنت۔ ماما کدیر گوشتگ کہ پہ دُژمن ءِ پندلانی بے سوب کنگ ءَ تیوک ءَ دراجکش ءُ برجاھیں شدکشیں زھرشانی گدان بلوچ چکچینی ءِ درسیں میارباریانی جھان ءِ دیم ءَ پدر کنگ ءَ جوانیں کردے پیلو کنگ ءَ اِنت۔
آئی ءَ گوشتگ کہ زور بیگواھیں مردمانی کھول پہ وتی آزیزانی آجو کناھینگ ءَ پانزہ سال اِنت کہ وتی جھد اِش یکشل ءَ برجاہ داشتگ ءُ پرایمنیں جھد ءِ رد ءَ اکوام متھدہ ءُ جھان ءَ دلگوش ءِ گور کنگ ءَ لاچار کنگ ءَ اَنت۔
بنشون: درشان/ اکس: ماما کدیر
