شال: پہ زور بیگواھیں مردمانی پدجنگ ءَ شدکشیں زھرشانی گدان ءَ 5173 روچ سرجم بیتگ۔ دوشمبے ءِ روچ ءَ چہ کراچی ءَ کلانھیں اھوالکار ءُ کراچی پریس کلب ءِ اگدہ دار مھمد آرپ ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
وی بی ایم پی ءِ کمک سرکماش ماما کدیر گوں مردماں تران کرتگ ءُ گوشتگ کہ زورگریں ریاست پاکستان ءِ چیریں ادارہ، لشکر، سی ٹی ڈی ءُ آدگہ کارمند بلوچستان ءَ بے مھار ءَ ترّ ءُ گرد کنگ ءَ اَنت۔ آ کج ءَ ھم بہ لوٹ اَنت بلوچ نودربر، وکیل ءُ ھمک بھرگاں سیادی داروکیں مردماں آوار جن اَنت ءُ رند ءَ آئی ءَ دروگیں میڑے ءَ کش اَنت ژانگولیں جوناں چگل ءُ گیاباں چگل دے اَنت۔
آئی ءَ گوشتگ کہ بلوچستان ءَ پاکستانی چیریں ادارھاں شست ءُ پنچ ھزار ءَ گیش مردم آوار جتگ ءُ بیگواہ کرتگ، چہ آیاں بیست ھزار ءَ گیش ژانگولیں جون چگل دیگ بیتگ اَنت۔ مرچی ھمک نادراھجاہ ءِ سردجاہ ءَ دہ مردم ءِ ژانگولیں جون ایر اِنت انچوش اَنت کہ پہ واری یے کسے پچارگ بہ بیت۔ چہ آیاں یکے ما پمشیکا زانت کن ایں کہ آئی ءِ اکس شدکشیں زھرشانی گدان ءَ ایر بیتگ۔
ماما کدیر گوشتگ کہ دزکپتگیں درسیں جون ھما زور بیگواھیں مردمانی اَنت کہ آیان ءَ جتائیں وھداں چہ بلوچستان ءِ جتائیں ھند ءُ دمگاں درکانودی آوار جنگ بیتگ اَنت۔ اے دزکپتگیں جوناں زور بیگواھیں مردمانی کھولانی دست ءَ دیگ ءَ اَبید لشکر وتی کِر ءَ دار ایت ءُ چار ءُ ٹپاس کنگ ءَ نہ دنت۔
آئی ءَ گوشتگ کہ مرچی پاکستان ءِ اے درسیں زوراکیانی گندگ ءَ پد ھم میان استمانی ادارہ بے توار اَنت۔ اکوام متھدہ ءُ یورپی یونین ءَ لوٹ ایت کہ آ پاکستان ءَ زور بدے اَنت ءُ اے کیسانی پٹ ءُ پول کنگ ءَ وتی کرد ءَ پیلو بہ کن اَنت، اے وڑیں جنگی میارباریانی ھوار بیگ ءَ پاکستانی واکدار ءُ چیریں ادارھانی سروکاں میان استمانی آمیدگس ءَ بہ لوٹ اَنت۔
ماما کدیر گوشتگ کہ چہ دہ سالی زھگاں بگر داں ھشتاد سالی کماشاں ھمک امر ءِ مردم ریاستی آزارجاھاں بندیگ اَنت۔
بنشون: درشان | اکس : ماما کدیر
_1.jpg)
