ریڈیو زْرمبش بلوچی | ریڈیو زْرمبش بلوچی

وائس پارمسنگ پرسن آپ سند ءِ رسانکدری کارگشاد سسئی لوھار ءَ وتی شنگ کرتگیں درشانے ءَ گوشتگ کہ مرچی رسانکدر ءَ چیریں ادارھاں بیگواھیں ساجن ملوکھانی ءِ تامربندے چہ بندیگجاہ ءَ گپتگ ءُ شنگ کرتگ۔ ھمے تامربند ءِ تہ ءَ بیگواھیں ساجن ملوکھانی گوشگ ءَ اِنت کہ ”من ڈن ءَ آں“ اے تامربند پاکستانی چیریں ادارھاں چہ وتی بندیگجاہ ءَ پمیشکا شنگ کنائینتگ دانکہ پاکستانی چیریں ادارہ آئی ءَ جانی تاوان بہ دے اَنت۔ آئی ءَ گوشتگ کہ ساجن ملوکھانی سند زانشتجاہ ءِ لا بھرگ ءِ نودربرے ءُ آ چہ ھیدر آباد ءَ گس ءَ روگ ءِ وھد ءَ یک ستمبر ءَ آوار جنگ ءُ بیگواہ کنگ بیتگ۔ آئی ءِ زوریں بیگواھی ءَ آئی کھول ءُ تیوگیں سند ءِ سیاسی ءُ چاگردی کارکن ءُ مردمی ھکانی گلانی سروکاں توار چست کرتگ اَت ءُ یک ستمبر ءَ زور بیگواھیں ساجن ملوکھانی ءِ مستریں برات دریا ھان ملوکھانی ءَ ھم چاگردی رسانکدر ءَ وتی برات ءِ زور بیگواھی ءِ بابت ءَ تران کرتگ۔ آئی ءِ زور بیگواھی ءِ ارزی ھیدر آباد ءِ آمیدگس ءَ دیگ بیتگ، ساجن ملوکھانی ءَ ھوار انوگیں اگست ءِ ماہ ءَ چہ سند ءَ زور بیگواھیں درسیں مردمانی کیس مردمی ھکانی میان استمانی ادارھانی سر ءَ دیم داتگ۔ سسئی لوھار ءَ گوشتگ کہ 14 اگست ءَ پاکستانی لشکر ءَ تیوگیں سند ءَ درزنانی کچ ءَ سیاسی ءُ راجدوستیں کارکن آوار جتگ ءُ بیگواہ کرتگ اَنت۔ چہ آیاں مھراب پور ءَ جسکم ءِ کارکن دانش موجائی، وھید گھانگھرو، چہ کازی اھمد ءَ نئیم ملوکھانی، ٹنڈو آدم راول ملوکھانی، میرپور ھاس ءَ دلدار شر، دھنی بکش شر، کراچی ءَ راشد شر، کرب شر ءُ سادت شر آوار جنگ ءُ بیگواہ کنگ بیتگ اَنت۔ پہ اے درسیں زور بیگواھیں مردمانی آجوئی ءَ تیوگیں سند ءَ زھرشانی کنگ بوگ ءَ اِنت۔ آئی ءَ گوشتگ کہ ما آمیدگس ءُ مردمی ھکانی درسیں گلانی دیم ءَ یک رندے پد ءَ وتی کیس ءَ یاداشت کنگ لوٹ ایں کہ سند زانشتجاہ ءِ کانود بھرگ ءِ وکیل نودربر دو روچ پیش ھیدر آباد ءَ میتگ ءَ روگ ءِ وھد ءَ پاکستانی چیریں ادارھاں آوار جتگ ءُ زور بیگواہ کرتگ، آئی اگاں چونیں جانی تاوانے بوت ایشی زمہ وار پاکستانی چیریں ادارہ اَنت۔ آئی ءَ گوشتگ کہ زور بیگواہ کنگ بیتگیں نودربر ساجن ملوکھانی، راول ملوکھانی ءُ نئیم ملوکھانی ءَ ھوار درسیں کارکنانی آجوئی ءَ مرچی تیوگیں سند ءَ زھرشانی کنگ ءِ جار ءَ جن ایں۔ بنشون: درشان / اکس: سسئی لوھار