ریڈیو زْرمبش بلوچی | ریڈیو زْرمبش بلوچی

من کہ زرا جھانگیر باں بچ ھمل ءِ پدگیر باں نبشتہ کار: سرباز وپاؔ

من کہ زرا جھانگیر باں بچ ھمل ءِ پدگیر باں   نبشتہ کار: سرباز وپاؔ

AUG

13
13 / 08 / 2021 نبشتانک 195

رھشون راجی ھما بامرد ءَ گْوش اَنت کہ آئی ءِ پگر پہ راجی وشھالیں باندات ءَ بہ بیت۔ پہ ھمے مول ءَ وتی جُھد ءَ برجاہ بہ کنت ءُ دیم ءَ بہ جنز اِیت، آ مردم اے گپ ءَ ھم سرپد بیت ءُ زانت کہ من باندا زندگ نہ بہ آں بلے منی پگر سوبین بیت، من راج ءَ وشھالیں بانداتے ءِ راہ ءَ پیشداشت کن آں۔ اگاں کسے کہ پہ وتی راج ءَ رھشون بیت ءُ آجوئی ءِ جُھد ءَ کنت، گڑا آ مردم لیکہ ءَ وتی دین ءُ مھذب سرپد بیت، سوبمندی ءَ وتی ایمان کنت۔ داں گُڈّی ساھت ءَ پہ وتی راجی جُھد ءَ کربان کنت۔ آئی تہ ءَ پہ راج ءُ وتن ءَ یک شیدائی ءِ گندگ بیت، آئی ءِ دل ءُ ھیال ءَ بس ھمے یک گپ پشت کپ ایت راج ءُ وتن، راجی جُنز ءِ دیم ءَ برگ۔ راجی رھشون چہ وتی جُھد ءَ وتی راج ءِ تہ ءَ زمین زادگیں بچّ ودی کن اَنت، آ چہ وتی پنت ءُ سِکیناں دلجم بنت کہ اشاں جھان ءِ ھچ وڑیں زوراک ءُ دگہ کس ھم پروش دات نہ کنت۔ ھمے وڑ ءَ چہ بلوچ راجی رھشوناں یکے شھید رزا جھانگیر اِنت، یک کسانیں وھدے ءَ چہ وتی جُھد ءَ آئی ءَ بلوچ راج ءِ تہ ءَ یک کوھیں کردارے زندگ کرتگ۔ بلوچ سرڈگار ءِ سر ءَ زورگِریں دُژمن ءِ زوراکی یکشلہ برجاہ اِنت، بلوچ ورناھاں ھوار پیر ءُ کماشانی گار ءُ بیگواھی ءُ شھید بُوَگ ءَ پد ھم بلوچ راجی جُنز یک مھکمیں وڑے ءَ دیم ءَ جنزان اِنت۔ چہ گار ءُ بیگواہ، شھید بوتگیں سنگتاں اَبید ھمے راجی بامرد کہ راجی جُنز اِش شریں وڑے ءَ داشتگ ءُ دیم ءَ برگ ءَ اَنت چہ اشاں یک بھرے شھید زرا جھانگیر ءِ پیداوار اَنت، منی ھیال ءَ من اے گپ ءَ رد بوت نہ کن آں پمیشکا کہ اے راجی بامرداں گیش مردم ھمائی ءِ مچّیانی تہ ءَ آئی شیرکین توار اِش اُش کرتگ، چہ آئی ءِ پنت ءُ سکیناں راجی جُنز ءِ بھر جوڑ بوتگ ءُ مھکم بوتگ اَنت۔ اے گپ ءَ من ھاس پہ وت ءَ ھم گُش آں کہ ھما وھد ءَ کہ  من سرپد بوتگ آں کہ راجی جُنزے ھست پہ راجی وشھالیں باندات ءَ جُھد کنگ ءَ اِنت۔ گڑا آ روچ ءَ من ھم اے گپ ءَ سرپد بوتگ آں چہ راجی جُھدکاراں یکے رزا جھانگیر اِنت پہ راج ءُ وتن ءَ جُھد کنگ ءَ اِنت ءُ گوں راجی جُنز ءَ ھوار اِنت۔ شھید رزا جھانگیر یک وتن دیوانگے بوتگ ءُ بلوچستان ءِ کُنڈ کُنڈ گول اِتگ ءُ مردم سرپد کرتگ اَنت کہ بلوچ یک راجے ءُ یک پجّار ءُ زمینے ءِ واھند اِنت۔ اے دُزّ ءُ زورگِریں پنجاپی ءَ بلوچستان ءِ سر ءَ پہ زور کبزہ کرتگ ءُ بلوچستاں ءِ مڈّیاں لُٹ ءُ پُل کنگ ءَ اِنت، پاد بیا اِت پہ وتی وتن ءِ رکینگ ءَ جُھد بہ کن اِت۔ آئی چہ وتی وس ءَ وت ءَ بلوچ ءِ ھمُک گِدان ءَ سر بُوَگ ءِ جُھد کرتگ۔ شھید رزا جھانگیر ءَ جُھد ءِ پڑ ءَ وتی زند ءِ ھمک روچ کیمتی جوڑ کنگ ءِ جُھد کرتگ۔ آئی ءَ وتی جُھد ءَ ھواریں پگری سنگتاں ھمے پنت ءُ سکیں داتگ کہ راجی جُنز ءُ پہ راج ءَ جُھد چی یے؟ مھکمیں پگرانی واھند مُدام وتی کردار ءَ سینگار اِیت ءُ زیبا کنت ءُ راج ءِ دیم ءَ چو کوہ ءَ مک بیت۔ داں کرناں مان اِیت ءُ دور دور ءَ گندگ بیت۔ 14 اگست 2017 ءَ کولواہ ڈنڈار ءَ شھید رزا جھانگیر ءِ یات ءَ یک مچّی یے دارگ بوت۔ گُڑا اے مچی ءَ تْران کناں ءَ واجہ ڈاکٹر نازر نور ءَ گْوشت کہ من ءَ انگت یات اِنت، 2007 ءَ پاکستان ءَ وتی تْراک جاہ ءِ آھو ءَ چکاس اِتگ اَنت، گڑا من، شھید زراجھانگیر ءُ لتپ جوھر ءَ جاہ ء آھو واجہ باگ ءَ شُتگ ایں، شھید رزا جھانگیر ءَ گْوشتگ کہ سنگتاں بلے ما اد ءِ مردماں مُچ کن اِیں ءُ دیوانے کن اِیں۔ من ءُ لتیپ جوھر گْوشتگ کہ تو چے گْوش ئے اد ءَ مئے سَے مردُم ءَ گوں دیوان بوت کنت؟ آئی ءَ گْوشتگ ھو ما  انوں مردماں مُچ کناں ءُ دیوان کن آں۔ آ دگ ءِ سر ءَ اوشتاتگ چادرے یک لمبے من ءَ دست ءَ داتگ ءُ دومی لمب لتیپ جوھر ءَ آئی ءَ گوں مردْماں گپ کنگ بندات کرتگ، مردماں مچّی دیستگ ءُ آیان بوتگ اَنت۔ بازیں مردمے مُچ بوتگ، شھید زرا جھانگیر ءَ تران کرتگ۔ وھدے ما دیوان ھلاس کرتگ ءُ دیم پہ وتی نیمگ ءَ در کپتگ اِیں۔ شھید رزا جھانگیر ءَ گوشتگ کہ سنگتاں مردمانی مچ کنگ ءِ وڑ ءُ ڈول ھمیش اِنت۔ مارا ہر وھد ءَ ءُ ہر وڑ ءَ وتی لیکہ ءُ گَل ءِ کلوہ راج ءَ سر کنگی اِنت۔ اے گُلزمین ءِ اشک بوتگ کہ شھید رزا جھانگیر ءِ تہ ءَ پہ وتن شیدائی گندگ بوتگ۔ آئی مدام پہ وتی مول ءُ مکسد، پہ وتی گَل ءُ راجی جُنز ءِ دیمروئی ءَ مدام جُھد ءَ بوتگ۔ ھمے وڑ آ پہ وتی گَل ءِ کاراں کیچ ءَ روت ءُ پہ چاردہ اگست ءِ بگیری ءَ روانک ءُ زھرشانی کنت۔  شپ ءَ کیچ آپسر ءَ بی این ایم کیچ ءِ کماش ءُ ورنائیں نبشتہ کار شھید امداد بجیر ءِ گِس ءَ دار اِیت۔ 14 اگست 2013 ءَ پاکستان ءِ ھونواریں لشکر کیچ آپسر ءَ رھشون زرا جھانگیر ءَ ھوار سنگت امداد بجیر ءَ شھید کنت۔ ھمے گپ ءَ گَل بیت کہ من راجی سروکے جتگ، بلوچ ءِ جنگ اُوشت ءِ آماچ بیت۔ ھو اے گپ راستے کہ شھید رزا جھانگیر ءِ وڑیں رھشونے ءِ روگ پہ راج ءُ راجی جُنز ءَ زنڈیں تاوانے، بلے شھید رزا جھانگیر ءَ پہ راجی جُنز ءَ ھزاراں پچّ ودی کرتگ ءُ آئی پگر اِش زندگ داشتگ ءُ جنزاں اَنت۔ انُچوش کہ شھید رزا جھانگیر گوش ایت: من کہ رزا جھانگیر باں پچ ھمل ءِ پد گیر باں شھید رزا جھانگیر ءِ اے گپ راست اِنت کہ مرچی بلوچ راج ءِ گیرتمندیں بچ پہ وتی لَج ءُ ننگ، پہ ماتیں سرڈگار ءِ رکّینگ ءَ وتی ھیشی سرانی کربانی ءَ دیگ ءَ چَک ءُ پد نہ بہ اَنت۔ مرچی بلوچ راج ءِ گیرتمندیں بچانی جُھد ءِ سر ءَ بلوچ راج ءَ ھوار جھان ءِ یک سِتکے ھست کہ بلوچ راجی بامرد اے جنگ ءَ ھما جاہ ءَ سر کن اَنت کہ راجی شھیدانی مول بوتگ۔ گُڈسر ءَ من گوں وتی ھما شئیر ءَ کہ شھید رزا جھانگیر ءِ سر ءَ لِکّ اِتگ: ھمک برات ءِ  دل ءِ  تاھیر رزا جھانگیر رزا جھانگیر مدام کایاں تئی یات ءُ گیر رزا جھانگیر رزاجھانگیر