ریڈیو زْرمبش بلوچی | ریڈیو زْرمبش بلوچی

سیمی بھر ھیپا ءِ سرڈگار ءِ سر ءَ 254 مردم کُشگ ءُ سدانی کَچ ءَ ارباں ٹپّی بیگ ءِ دیمونی داتگ۔ آیانی ھمے ھیال بوتگ کہ انگت ءَ دگہ مردم ھم کُشگ بیت۔ تیوگیں شھر تُرس آماچ بوتگ، دو روچ ءَ پد اے ترس منی دیم ءَ آتکگ، من وتی زندگی ءِ تہ ءَ اولی بر ءَ مرگ دیستگ۔ من ءَ یاد نہ بیت کہ منی دیم ءَ مُرتگیں مردم یھودی بوتگ اَنت یا ارب، من ءَ بس بمب تراک ءُ مُرتگیں مردُمانی لاپ ءَ بمب لگگ ءِ سوب ءَ در آتکگیں ھون یاد اَنت۔ من پدیانکانی چیر ءَ وت ءَ چیر داتگ ءُ دمکانی تہ ءَ ایریں جون چارتگ اَنت۔ من ھمے جیڑ اِتگ ءُ ترس آماچ بوتگ آں کہ منی پِس مرگ ءِ ارجان مہ بیت۔ اے ترس ءِ چاگرد ءَ منی کھول پہ لڈّ ءُ بار کنگ ءَ لاچار کرتگ، ما بس ھشت بوتگیں۔ 13 اپریل 1948 ءَ ما سور ءِ نیمگ ءَ رھادگ بوت اِیں، من ءَ کس نہ گّْوشتگ کہ ما چی ءَ روگ ءَ اِیں ءُ نہ منی ھم زھن ءَ آتکگ۔ ماس ءَ یک باڑھی گاڑی یے ءَ مارا ءُ مئے لھتیں سامان لڈّ اِت ءُ پہ بے ساری یے درکپتگ اَنت۔ وھدے دیم ءَ شتگ اَنت گُڑا آیان ءَ سما کپتگ کہ اَچما یک مردمے کم اَت پریات ءُ جیھانٹ بندات بوتگ اَنت۔ اے من بوتگ آں کہ منی بارو ءَ کس سرپد نہ بوتگ باز دیراں رند منی دو گْوھاراں من ءَ ھرماگانی ڈبّی ءِ پُشت ءَ چیر بیگ ءَ دیستگ ءُ چو پٹاٹانی تیلی ءِ وڑ ءَ گردن ءَ گپت ءُ ماس ءِ دیم ءَ ایر کرت۔ آئی ءَ گوں گریوگ ءَ گْوشت کہ اگاں تو میا ئے یھودی ترا کُش اَنت۔ آئی ءَ ھمے گْوشت ءُ من ءَ موداں گپت ءُ چک اِت۔ من سک دلگران اِت آں ءُ زانگ ءَ نہ اِت آں کہ ما چی ءَ ھیپا ءَ یل کنگ ءُ سور ءَ روگ ءَ اِیں۔ منی پِس ءَ دُرستیں مردم گوں ارسیگیں چمّے ءَ موکل کرتگ اَنت ءُ وت پشت کپت۔ من ءَ یات اِنت کہ مئے سپر ءِ درآھگ ءِ وھد ءَ داں چمّاں کار کرتگ منی چم بس یک چیزے ءَ سک بوتگ اَنت، گوں گِس ءِ پدیانکاں۔ من داں چُنت ماہ ءَ وتی پس نہ دیستگ، وھدے کہ آ سور ءَ آتک باز گمیگ اَت آئی ءَ ھچ وڑ ءَ ھیپا ءِ یل دیگ نہ لوٹ اِتگ۔ بلے ھیپا ءَ یھودیانی دستیگ کنگ ءَ پد زوت 22 اپریل ءَ اباکہ بزنس ءُ ھیپا دوئیں یل کنگ بوتگ اَنت۔ پد آئی ءَ دیستگ کہ یھودی مئے گساں پُتِرتگ اَنت ءُ مئے گسانی ساماناں برگ ءَ اَنت۔ نوں اباکہ گوں مِسر ءَ مٹّ بوتگ۔ سے چار ماہ ءَ مِسر ءُ آدگہ جاھاں واری ءُ ازابْیاں پد درستیں واری لنگڑی ءُ در پہ دری چمداری ءَ اَبا گُڈی ءَ سور ءَ سر بوت۔ داں سی سال ءَ اسٹور کیپر ءِ بستار ءَ شپ ءُ روچانی کارکنوکیں مردم پہ زْر ءَ چمدار اَت۔ آ اے گپ ءَ سک گمیگ اَت کہ آئی لبنان ءَ شھرمنندی رسگ ءَ نہ اَت۔ آ داں 1966 ءَ بزاں داں وتی بیرانی ءِ وھد ءَ لبنان ءَ درانڈیھ ءِ بستار ءَ بوتگ۔ داں ھژدہ سال ءَ آ واتر ھیپا ءَ روگ ءِ واب ءِ گندگ ءَ زندگ اَت۔ من وتی پِس ءِ جنک بیگ ءِ بستار ءَ وتی پِس ءِ واب ءَ پیلو کنگ لوٹ آں۔ من وتی پِس ءُ راج ءِ واباں ناسرجم بُوَگ ءَ نہ ھِل آں۔ اگاں من پلستین ءَ روگ ءُ آزاد پلستین ءِ تہ ءَ پہ زند گْوازینگ ءَ زندگ مہ بہ آں من سدکاں منی اوبادگ ھما زمانگ ءَ گِند اَنت۔ روکپتی گْوَستانک نبیس ءُ پَٹ ءُ پول کار ھمے نبشتہ کن اَنت کہ ھیپا ء مردم یھودیانی واکداری کنگ ءِ جار ءَ اَبید وت ماں وت چہ بیسّہ، زانت ءُ سرپدی ءَ دوئیں کٹمانی مردم نشت کن اَنت، بلے ارباں چہ ھیپا ءَ لڈّ ءُ بار کرتگ۔ بہ جیڑ اِت کہ اگاں واکداری ءِ جار پہ مھر ءُ یکجاھی ءَ بہ بوتین چے گڑا بندات کنگ بوتگیں کُشت ءُ کُوش دارگ مہ بوتگ اَت۔ چے یھودیانی دمگ ءِ دستیگ کنگ ءِ اشک کم بوتگ اَت ءُ اربانی تاوان دیگ ءَ ردیں ارادھانی تہ ءَ کمی آتکگ اَت۔ اگاں اے وڑ بہ بوتیں مئے بْرات کشگ ءُ مئے گْوھار چی ءَ کمشرپ کنگ بوتگ اَنت؟ اگاں اے وڑ بہ بوتین گڑا " کودک"برتانوی" سرکار ءَ سدانی کچ ءَ کسانیں لانچ داتگ کہ چہ ھیپا ءَ پلستینیاں سور ءَ بہ بر اِت۔ گُڑا ما پہ وشیں دلے وتی گِس ءُ جاگہ یل داتگ ءُ شُتگ اَت ایں۔ گڑا اے چونیں لاچاری یے ءِ اَت کہ آئی ءِ رد ءَ یھودیاں مئے مال ءُ مڈی ءُ ہر ھما گرانھادیں چیز دستیگ کرتگ اَنت۔ اے جُست اَنت کہ ایشانی پسو ءَ ہر ھما کابل شْرپمنْدیں یھودی ءُ ھمے نبشتہ کاراں پولگ لوٹ اَنت کہ آیاں وتی لبزانی تہ ءَ گْوشتگ اَنت۔ اے ھم گْوشگ بیت کہ اربانی نیت ھمے بوتگ کہ آ ھیپا ءَ دوبر دستیگ بہ کن اَنت۔ یھودیاں چِست بہ کن اَنت ءُ دریا ءَ دور بہ دے اَنت، ھمے نیت ءَ ارب ڈیھاں بیست ھزار مردمانی لشکرے برجاہ داشتگ۔ بلکیں نہ آ ھیکاریں بوتگ اَنت ءُ نیکہ آیانی گور ءَ نوکیں سلاہ بوتگ، وھدے پہ آیانی دیم پہ دیمی ءَ شست ھزار ھیلکاریں یھودی لشکری بوتگ۔ اربان ءَ نہ بنجاھی سروک ءُ نہ مھکمیں زْرمبشتے بوتگ۔ اگاں چونیں کارستے بوتگ گڑا آ مچی نہ بلکیں تھنائیں کردے بوتگ۔ ھمایانی کول اِنت ارب لشکر مرتگیں چاگردے ءِ بالاد ءِ دیمونی ءِ دیگ ءِ وڑ ءَ بوتگ اَنت کہ آ نوک ھیلکاریں دُژمنے ءَ یک رمگے ءِ وڑ ءَ تیلانک دات بہ کن اَنت۔ انگت ءَ ھمے سدکی دیگ ءَ بوتگ اَنت کہ آ سوبمند بنت، اربانی اے وڑیں اُرش کنگ ءَ اکوام متھدہ ءِ جوڑ کرتگیں پلستین ءِ جیڑہ زندگ داشتگ اَت ءُ ھمے وڑ ءَ اَرب بادشاہ ءُ چہ آئی کھول ءِ کمک ءَ آدگہ پلسیینیاں گوں اُردن ءَ ھوار کنگ ءِ گپ نیمونے بوتگ اَت۔ اربانی دزمانجنی ءَ یھودیان ءَ مھکمی ءِ دلجمی داتگ اَت۔ روان اِنت۔۔۔۔۔۔۔۔۔۔