ریڈیو زْرمبش بلوچی | ریڈیو زْرمبش بلوچی

پنجگور: سیمسر ءِ بند بیگ ءِ بگیری ءَ مردماں زھرشانی روانکے کش اِتگ۔ زھرشانی روانک چہ چتکان بازار ءِ بسم اللہ چاراہ ءَ درکپتگ ءُ کمک دمگدار ءِ کارگس ءِ دیم ءَ مچ بیتگ اَنت۔

زھرشانی ءَ سیاسی ءُ چاگردی کارکن، دکاندار ءُ گاڑی واھندانی ھواری ءَ لس مردماں بازیں کچے ءَ بھر زرتگ، آیاں سیمسر ءِ بند بیگ ءِ بگیری ءَ اوگام جتگ ءُ سیمسر ءِ پچ کنگ ءِ لوٹ کرتگ۔ زھرشانی کنوکیں مردماں پلے کارڈ دستاں بیتگ اَنت کہ آیانی سر ءَ جتائیں اوگام نبشتہ بیتگ۔

مردماں تران کرتگ ءُ گوشتگ کہ سرکار باید اِنت مردمانی زورگار ءِ در ءَ بند مہ کنت ءُ سیمسر ءَ پچ بہ کنت دانکہ مردم پہ دو وھد ءِ نان ءَ جنجال مہ بنت۔ چہ سمیسر ءِ بند بیگ ءِ سوب ءَ مردم سکا جنجالانی دیمپان اَنت۔

زھرشانی کنوکیں مردماں گوشتگ دانکہ سیمسر پچ کنگ نہ بیتگ ءُ لڑا شنگ کنگ نہ بیتگ اَنت ما وتی زھرشانی ءَ برجاہ دار ایں ءُ نند ایں۔

زھرشانی داں بیگاہ ءِ ادار سے ءَ برجاہ بیتگ ءُ کمک دمگدار ءَ گوں زھرشانی کنوکیں مردماں تران کرتگ ءُ سیمسر ءِ پچ کنگ ءِ دلجمی داتگ، آیاں وتی زھرشانی ھلاس کرتگ۔

بنشون: اھوالکار / اکس: اھوالکار