ریڈیو زْرمبش بلوچی | ریڈیو زْرمبش بلوچی

جنگولیں سرمچار شھید ابدُالھالک پنام سردو جان نبشتہ کار: یاسر بلوچ

جنگولیں سرمچار شھید ابدُالھالک پنام سردو جان  نبشتہ کار: یاسر بلوچ

NOV

29
29 / 11 / 2022 نبشتانک 142

وھدے کہ ماتیں وتن ءَ زوراکیں دژمن ءِ زورگری برجاہ بہ بیت ءُ ورنا ءُ کماش، زھگ ءُ جنین زوراکیں دژمن ءِ زوراکیانی نشانگ بہ بنت، وھدے زھگ ءُ جنین گسانی تہ ءَ مہ رکّ اَنت، ماتیں وتن چہ وتی دلیریں بچاں دژمن ءِ بگیری ءَ گھگیری ءِ لوٹ ءَ کنت، بازیں ورنا ءُ کماش ،زھگ ءُ زالبواں اے توار ءِ پُشت ءَ وتی جان ءِ دیمونی پہ ماتیں وتن ءَ داتگ اَنت، اے دیمونیانی کسہ ھمک روچ گیش بیگ ءَ اِنت کجام رنگ ءَ کہ بہ بیت کسّے زندانی بہ بیت یا کہ کسے شھید بہ بیت یا کہ جھد ءِ راہ ءَ راہ کپتگ ءُ روان اِنت ھر وھد ءَ وتی ھک ءَ پیلو کنگ ءَ اَنت اے ھما ورنا ءُ کماش اَنت ھما زھگ ءُ جنین اَنت کہ ماتیں وتن ءِ لوٹ ءِ پد ءَ در کپتگ اَنت، زند ءِ کُلّیں وشی یک کِرّ اش کرتگ اَنت ءُ ماں کوہ ءُ گیاباں کپتگ اَنت، اے ماتیں وتن ءِ ھما توار اِنت کہ زانتکاراں جھد ءِ راہ ءَ پیش داریت ءُ اے راہ ءَ ھما مردم درکپ انت کہ آ گُلزمین ءُ راج ءِ درد ءَ مار اَنت اے ھما توار اِنت کہ آیاں گوں گلزمین ءِ زورگری سگّگ نہ بیت، گلزمین ءِ درداں ھما مردم مارِ اِت کنت کہ آئی ءَ گوں گلزمین ءَ مھر بیت گوں راج ءَ گوں گلزمین ءِ سبزیں کشاراں مھر بیت، چوشکہ ماتیں وتن ءِ توار ءِ پُشت درکپتگیں ورناھانی یک مزنیں کاروانے کہ دیم پہ منزل ءَ جنزان اِنت اے ورناھانی منزل آجوئی اِنت یا کہ گُڈی تیر اِنت کہ وتی نام ھمے گُڈی تیر ءِ سر ءَ نبشتگ۔۔۔ ماتیں وتن ءِ ھمے لوٹ ءِ پد ءَ درکپتگیں ورناھانی ھمراھی ءَ درکپتگیں یک ورناھے شھید ابدُالھالک پنام سردو اِنت کہ پہ وتی ماتیں وتن ءِ لوٹ ءُ واھشت ءِ پد ءَ گوں وتی ھمراہ شھید رشید پنام پیٹر ءِ ھمراھی ءَ وتی دوستیگیں ساہ اِش ندر کرت ءُ نمیران بوت اَنت، اے کاروان راجی شھیداں گوں وتی ھوناں انچو مھکم کرتگ کہ اے کارواں گیش دیم ءَ جنزان ءُ منزل ءِ نزیک ءَ روان اِنت، شھید سردو ءُ شھید رشید ھم ھمے کاروان ءِ بھر اَنت۔۔۔۔ شھید ابدُالھالک پنام سردو مشکے ءِ ھند کندڑی ءَ یار مھمد ءِ گس ءَ ودی بیتگ شھید سردو بنداتی وانگ مشکے کندڑی ءُ نلی ءَ ونتگ دیمتر ءَ نہ ونتگ ءُ وتی باپاری دکانے پچ ئِے کرتگ دکان ءَ کار کنگ ءِ ھواری ءَ آ مال ءُ دلوتانی ڈاکٹرے ھم بیتگ، ھمے میان ءَ شھید سردو وتی لھتیں زاتی جیڑھانی سوب ءَ پولیس ءِ دست ءَ دزگیر بیت ءُ بازیں وھدے پولیس ءِ زندان ءَ بندیگ بیگ ءَ پد آجو بیت، شھید ابدُالھالک پنام سردو 2009 ءَ بلوچستان آجوئی سنگر (بی ایل ایپ) ءَ بھر ئِے زرتگ ءُ پاکستانی لشکر ءِ بگیری ءَ تپنگ ئِے چست کرتگ ءُ جھد ئِے کرتگ، شھید سردو چیزے وھد ءَ بلوچستان آجوئی لشکر بی ایل ایپ ءَ کار کرت ءُ آ وتی مھکمیں جھداں کم وھد ءِ تہ ءَ کمانڈری اُگدہ ءَ گچین کنگ بیتگ اَت ءُ آ یک جنگولیں سرمچارے اَت گوں وتی سنگتاں دژمنیں لشکر ءِ بگیری ءَ وتی جھد ترندی ءَ برجاہ داشتگ اَت ءُ گوں وتی جنگی تمردیاں مدام وتی کاراں سوب مند اَت، شھید سردو یک تامر بندے ءِ تہ ءَ گندگ بیت کہ ایپ ڈبلیو او ءِ گاڑی یے کہ پہ سی پیک دگ ءَ کار کنوکیں گاڑیاں ءُ لشکر ءِ گاڑیاں پہ تیل برگ ءَ انت ھمے گاڑی دار اَنت ءُ مردماں پہ سلامتی یل دینت ءُ گاڑی ءَ گوں تیلاں مان دارنت، ھمے وڑ ءَ شھید سردو مشکے ءِ ھند بُنڈکی ءَ گوں وتی سنگتاں لیویز گِس ءَ اُرش کن اَنت ءُ اود ءَ لیویز کارمندانی توپکاں دستیگ کن اَنت کہ ھمے وھد ءَ تیرگواری ءِ وھد ءَ آئی یک سنگتے تیر وارت ءُ ٹپی بیت بلے آ وتی سنگت ءَ تھنا یل نہ کنت ءُ بلکیں گوں دلیری ءَ وتی سنگت ءَ کمک دنت ءُ در کنت، شھید سردو ھما دلیریں جنگولیں سرمچار بیتگ کہ آئی ءَ وتی زند ءِ ھر وشی گوں وتی ھمراھاں وتی جنگی سنگراں گوازینتگ اَنت شھید سردو بی ایل ایپ ءِ سنائیپر مین (Sniper man) ءِ نام ءَ زانگ بیتگ آئی دلیری ءِ سوب ءَ پاکستانی لشکر ءِ دل ءَ یک بیم ناکیں ترسے کپتگ اَت، ھمے وڑ ءَ 30 جون 2015 ءَ مشکے ءِ ھند میھی ءَ مزنیں لشکر کشی یے بیت ءُ ھمے لشکر کشی ءَ سرجمیں روچ ءَ پاکستانی لشکر ءُ سرمچارانی میان ءَ میڑ برجاہ بیت ءُ ھمے جنگ ءَ کمانڈر شھید سلیمان پنام شیھک ءُ آئی ناکو سپر ھان ءُ براس زاکر ءَ ھوار 12 سنگت شھید بیتگ اَت، آیانی شھیدی ءَ پد شھید سردو مشکے ءِ ایریا کمانڈر گچین کنگ بیت ءُ درسیں زمہ واری آرا دیگ بوت اَنت، بلے دیر نہ گوست کہ شھید سردو گوں وتی سنگتاں یک سپرے ءَ درکپیت ءُ وتی گل ءِ کاراں کنت ءُ پد ءَ پہ وتی سنگتاں سلاہ ءُ سامان زور اَنت واتر دیم پہ مشکے ءَ روگ ءَ بنت کہ ھمے سپر ءَ 12 دسمبر 2015 ءِ روچ ءَ مشکے ءِ ھند تنک ءَ سر بنت بلے تنک ءِ کور ءَ دژمنیں لشکر پیسر ءَ آیانی راھ ءِ سر ءَ سنگر گیپت ءُ راہ ءِ سر ءَ نندوک بیت کہ ھمے کور ءَ دژمنیں لشکر ءِ میان ءَ کپ اَنت ءُ یک ترندیں میڑے برجاہ بیت۔۔۔ داں دیر ءَ تیرگواری ءُ بمب گواری ءِ میان شھید ابدُالھالک پنام سردو ءُ آئی سنگت شھید رشید پنام پیٹر ٹپی بنت ،بلے ٹپی بیگ ءَ ابید آ وتی سنگتاں گوں سلاہ ءُ ساماناں پہ سلامتی در کنگ ءَ سوبین بنت ءُ وتی داں گُڈّی تیر ءَ جنگ دے انت ءُ نمیران بنت، آیانی جوناں دژمنیں لشکر دستیگ کنت ءُ مشکے گجر ءَ بارت ءُ آئی کھول ءِ دست ءَ دنت، شھید ابدُالھالک پنام سردو ءُ شھید رشید پنام پیٹر ماں مشکے کندڑی ءَ گُلزمین ءِ میار کنگ بوت اَنت شھید ابدُالھالک پنام سردو ءُ شھید رشید پنام پیٹر داں گُڈّی تیر ءَ جنگ دات ءُ وتی ماتیں وتن ءِ ھک پیلو کرت ءُ گُلزمین ءِ دلبند ءَ وتی ھون شلینت اَنت ءُ راجدپتر ءَ نمیران بوت اَنت، انچو گوش اَنت کہ راجدپتر پد ءُ دیم بیت بلے راجی ورناھانی داتگیں دیمونی الّم بیگواہ نہ بنت ءُ آیانی دیمونی یات دارگ بنت۔۔۔۔۔۔