ریڈیو زْرمبش بلوچی | ریڈیو زْرمبش بلوچی

شھید ھالک جان ءِ بیگواھی ءِ روچ نبشتہ کار: واھگ بلوچ

شھید ھالک جان ءِ بیگواھی ءِ روچ  نبشتہ کار: واھگ بلوچ

SEP

13
13 / 09 / 2022 نبشتانک 126

مرچی ستمبر ءِ 14 رمس اِنت مرچیگیں روچ ءَ بزاں یازدہ سال ءَ پیش 2011 ستمبر ءِ 14 رمس ءَ ھالک جان بیگواہ کنگ بوت ءُ پد ءَ 20 نومبر ءَ ھالک جان شھید کنگ ءُ پسنی ءِ دمگ ءَ لاش دور دیگ بوت ، من ءَ یات اِنت ، انگت ھما روچ ءِ اَسُر ءِ وھد ! دُراھیں سنگت مُچ بوت اَنت ءُ سَوْڑگ کُت اِش کہ نمبیگ(بینکو) ءِ شکار ءَ رو ایں، ماھور ءَ چیر کن ایں۔ "تومشان ( ستمبر )" ءَ مکران ءِ تیاب دپی دمگاں "نمبیگ(بینکو)" نامی ئیں مُرگے کیت کہ ھرکس ھمیشی ءِ شکار ءَ وتی ماھور ءَ جنت ھمے پیم ھالک جان ءُ دگہ لھتے سنگت ھم وتی ماھورانی جنگ ءَ دیم پہ جنگل ءَ شُت اَنت، ھرکس گل ءُ شات اَت کس ءَ اے گُمان نہ ات کہ داں مگرب ءَ چی بیت اِے شپ پر ما چونیں شپے بیت ،ھمے پیم ءَ سنگتاں وتی ماھور جت اَنت ءُ دگہ میتگے نزیک ءَ دیوان ءَ اِت اَنت، کہ اچانک گاڑی یے آتک ءُ مارا انگر ءَ ئِے کت، بلے شھید ابدالھالک جان کمے یک کر ءَ اوشتاتگ اَت ھنچو گاڑی ءَ مردم ایر آتک اَنت ، ھالک جان ءَ پجّا آؤرت اَنت، کہ اے ناشر کاریں مردم اَنت ، اے ھما رستراں کہ اِیشاں بازیں سنگتے گار ءُ بیگواہ کُتگ ءُ بازین اِش کُشتگ ءُ شھید کرتگ ، ھالک جان ءَ باز دیر ءَ گوں آیاں گھگیری کُت داں یک ساھتے (گھنٹہ ) ءَ پد ھالک جان دزگیر اش کُرت ءُ شاتکامی کنان چہ میتگ ءَ شُت انت ۔ ھال ھر گْور ءَ شنگ بیت اے ھال ءَ ھر مات ءِ دل تاپ اینت گُھار ارسیگ کُت اَنت، برات ءُ سنگت ابیتک بیت اَنت آ ساھت ءَ من میتگ ءَ نہ اتاں ، مگرب ءَ پد من اتک آں داں ھر نیمگ ءَ ابیتکی ءَ مانشانتگ سنگتے ءَ ھال دات کہ پلاں میتگ ءَ چہ ھالک جان رستراں دزگیر کنگ ءَ پد گار ءُ بیگواہ کُتگ۔۔ جبین ءَ آسے ءَ باھند کُت ءُ چم تھار بوت اَنت، ھما آس انگت جبین ءَ روک اِنت ھردیں تومشان ءِ ماہ کیت سنگت نمبیگ ءِ شکار ءِ تیاری کنگ ءَ بنت گڑا شھید ھالک جان الم گیر کیت آئی ءِ کندگ ءُ مسکرا ءُ آئی ءِ پُر مِھریں دیوان گیر کاینت۔۔۔ آ یک انچیں مھروانیں بچّے اَت کہ آئی ءَ وتی ماتیں زمین ءِ واست ءَ زند کُربان کُت آئی ءِ جُھد ھمیش اَت کہ من وتی راج ءُ آیوکیں پدریچ ءَ یک وش ھالیں بانداتے ءِ واھند بہ کناں ، آئی ءَ وتی دُراھیں زند پہ ماتیں گُلزمین ءَ کُربان کُت، آئی ءَ وتی سرجاہ ءُ بوپ ءُ گندل ڈل ءُ ڈُوک لیک اِت اَنت ۔شھید ھالک جان یک بامردیں ورنایے ءِ دُروشم ءَ نمیران اِنت ، راست اِنت کہ آ گُلزمین ءِ میار کنگ بیتگ بلے مئے ھیال ءَ آ زندگ ءُ ساڑی انت۔۔۔ داں کُوچگاں آسے بل ایت تو زندگ ئے تو زندگ ئے داں کوچگ ءَ گرندے کپ ایت تو زندگ ئے تو زندگ ئے داں آسمی پُلے سْرپ ایت تو زندگ ئے تو زندگ ئے تو زندگ ئے تو زندگ ئے تو پہ سرانی گُڑّگ ءَ زندے ھیالان ءَ کُش ئے پہ سِندگ ءَ داشت کن ئے پُلّاں چہ بُو تالانی ءَ مَرگ ءَ منی لوٹ ئے تا ارواہ ءَ بہ کُش من پہ مِرگ گار نہ باں۔۔۔،،