ریڈیو زْرمبش بلوچی | ریڈیو زْرمبش بلوچی

سرگوست "مھروانیں ھمبل نبشتکار : شے مرید شاد

سرگوست "مھروانیں ھمبل  نبشتکار : شے مرید شاد

SEP

14
14 / 09 / 2022 نبشتانک 79

سیمی بھر گُڑا من چہ آئی ءَ وتی دل کُشت ءُ پد ءَ گیشیں سر ءُ سوج نہ کُت سک ترانگان ئِے نہ کپت آں پرچا کہ آ لگور بوت ءُ شُت، نو آئی ءِ یات ءُ ترانگان ءَ گوں جیڑگ منی درد نہ وارت من چہ آئی ءِ دیوانگی ءُ مھروانیاں دل شُت ءُ ساپ کُت، من انچو پھم اِت کہ من چوشیں مھروانے ءَ گوں ڈِیگ نہ وارتگ ءُ نہ زانان ئِے پرچا کہ چہ کاروان ءَ گستر بوتگ۔ گُڑا یکروچے من نندوک اِت آن ءُ گوانکو منی دست ءَ اَت ءُ من بستارالاں (اسٹیٹساں) گلائیش اِت آن ءُ چارگ ءَ اِت آں داں ھمد ءَ سنگتے ءَ بستارال اِیر کُتگ اَت ءُ نبشتہ ءَ ئِے کتگ اَت۔ کہ " کربان اَڑے " ارسیگیں بُتے اِیر ئِے کُتگ اَت، گُڑا من سنگت ءَ را جست کُت۔ " ھالاں بہ دے باریں ترا ھیر اِنت کہ تو چشیں بستارالے اِیر کُتگ ؟" گُڑا آئی پسو دات "ھو یار انچو سوج اِنت کہ نوشکی ءَ استان ءِ مزنیں بُنجلے ءِ سر ءَ اُرشے بوتگ ءُ انگت اِستان ءِ لشکر ءُ ایدگہ مَلمیڑانی دیم پہ دیمی ءَ گوں تْرندی ءَ جنگ اِنت من گُشت " زانگ نہ بیت باریں چونین اَنت ؟" آئی گشت "اِناں یار ! من ءَ انچو شک بیت کہ پدائین لھتیں سنگت شُتگ ءُ بُنجل اِش انگر ءَ کُتگ۔" من گُشت "بس اللہ ھیر کنت ءُ سوبین بات اَنت ۔" گُڑا کمّو دمان ءَ رند من ءَ یکے ءَ گُشت "پنجگور ءَ اوں مزن بُنجل ءَ مزنیں تراکے ءِ توار بوتگ ءُ ھمے چہ تراک ءِ توار ءَ پد تیر ءُ ٹوپانی توار گون اِنت بَلے زانگ نہ بیت چونین اَنت ۔ ھمے وھد ءَ رسانکدار ءَ ھم ھالے شنگ بوت کہ پنجگور ءُ نوشکی ءِ مزن بُنجل ءَ بلوچ سرندر کنوکیں بچاں انگار کُتگ اَنت ءُ جنگ چوپ گوں تْرندی ءَ برجاہ اِنت، بَلے زانگ نہ بیت کہ کے ءُ کے اَنت۔؟ وھدے کہ اے ھمبل پہ وتی پدا کنگ ءَ رو اَنت گُڑا ایشانی پجار کنگ نہ بیت پرچا کہ اِیشانی مول ءُ مراد وتی شھید کنائینگ اِنت ءُ دژمن ءَ را ٹوھیں تاوان دیگی اِنت ، گُڑا اے شپ ءَ ھر کس نشتگ ءُ جیڑگ ءَ اَت باریں دژمن ءَ را چنچو تاوان رس اِیت ءُ پدائین ھمبل کے ءُ کے اَنت؟ ھمد ءَ من ءَ گوانکو دست ءَ اَت ءُ من کدی پیسبک ءُ کدی انسٹاگرام ءَ چارگ اِت آں کہ نوکیں ھال ءُ اھوالے بلکیں مئے چماں بہ کپ اِیت، اگاں من ءَ یات بیت شپ ءِ یازدہ یا دوزدہ ءِ وھد بوت کہ رسانکدار ءَ پد ءَ ھالے شنگ بوت ءُ گُشت ئِے کہ جنگ انگت یکشل ءَ گوں ترندی ءَ برجاہ اِنت۔ چہ پدائین ھمبلاں دو پنجگور ءَ شھید بوتگ ءُ دو نوشکی ءَ، نوشکی ءِ پدائین ھمبلاں دراھیں شپ ءَ اِستان بُنجل وتی انگر ءَ کُتگ ءُ جنگ ءَ اِت اَنت، دژمن ءَ را مزنیں کچے ءَ تاوان اِش دات داں ایدگہ سُھب ءِ دہ ءُ یازدہ ءَ آیانی جنگ سرجم بوت ءُ جند اِش شھید بوت اَنت۔ نوشکی پدائین ھمبل نھ اِت اَنت، چہ ایشاں پد انگت پنجگور ءِ بُنجل پدائینانی انگر ءَ اَت ءُ جنگ ترندی ءَ برجاہ اَت دژمن ءَ را دمان پہ دمان ءَ ٹوھیں تاوان رسگ ءَ اَت، بَلے ھمبلاں گوں جوانیں وڑے ءَ وتی سنگر مھکم داشتگ اِت اَنت، ھپت پدائین ھمبل ءَ داں چار روچ ءَ آیاں گوں دژمن ءَ دیم پہ دیمی ءَ جنگ دات ءُ شھید بوت اَنت، چہ شھید ءَ رند آیانی اکس ماں رسانکدار ءُ ایدگہ جاھاں شنگ بوتگ اَنت، ھمے شنگ بوتگیں اکساں من چارگ ءَ اِت آں من ءَ یکے ءِ اکس سک دوست بوگ ءَ اَت۔( چوناھا پہ وتن ندر بوتگیں شھید مردم ءَ را سک ءَ دوست بنت) پرچا اے ھمبل ءَ گوں دچار کپتگ اِت آں من ءَ سک ءَ دوست بوگ ءَ اَت ،انچو گُش ئے اے ھمبل من جاھے ءَ دیستگ ءُ گوں من دچار کپتگیں مردمے بَلے اے وھد ءَ زانگ ءَ ئِے نیاں ، پرچا کہ آ وھد ءَ من دیستگ نو آ وھد ءَ را دِیر اَت تکریبن سے سال ءِ گپ اَت کہ من ءُ اے ھمبل پد ءَ دچار نہ کپت اِیں۔ ھمد ءَ من جیڑگانی تہ ءَ اِت آں یکے ءَ منی سر ءَ ھمے اکس دیم دات ءُ من ءَ جست ئِے کُت۔ " تو ایشی ءَ زانگ ءَ ئے کے اَنت ؟" من گُشت " اِناں " ، آئی ءَ گُشت " اے ھما ھمبل اِنت گند ئے ما شُت اِیں کولواہ ءَ کماش ءِ لوگ ءَ اے ھمود ءَ اَت سکیں وش تب ءُ مھروانیں ھمبلے اَت نام ئِے پراز اَت" من گُشت "راست گُش ئے بَلے ایشی بابت ءَ دِیری یکرندے من کسے ءَ را جست کُت آئی ءَ من ءَ گُشت کہ اے لگور بوتگ ءُ دژمن ءِ دیم دست ئِے چست کُتگ اَنت مرچی اد ءَ چون ؟" چہ ھمد ءَ من اَبکّہ بوت آں ! آئی من ءَ گُشت ۔ "اِناں لگور نہ بوتگ کسے ءَ اگاں ترا گُشتگ دروگ ئِے بستگ، مرچی چار روچ اِنت کہ اے گوں دگہ شش ھمبل ءَ پنجگور ءِ مزن بُنجل ءَ پدائین ئِے کُتگ ءُ مرچی شھید بوتگ ۔" ھمد ءَ من ءَ دراھیں یات ءُ گیراں مان پتات ءُ آئی ءِ مھروانی دوبر منی دل ءَ نکش بوت۔ ھلاس