ریڈیو زْرمبش بلوچی | ریڈیو زْرمبش بلوچی

سرگوست " مھروانیں نبشتکار : شے مرید شاد

سرگوست " مھروانیں   نبشتکار : شے مرید شاد

SEP

07
07 / 09 / 2022 نبشتانک 89

دومی بھر گُڑا ما دُکاندار ءِ لوگ ءَ رھادگ بوت ایں ، آئی منی ستائینگ ءِ واست ءَ پَرپٹ ءِ گاز گپت ءُ کمو تینز روگ ءِ جھد کُت کہ باریں شے چے گُش اِیت ۔ من ھمد ءَ گُشت "تو چو مہ کن کہ لوگانی توک ءَ مردم بہ کپ اِیت پاد آیگ نہ بیت ، پرچا کہ زھگ ءُ زالبولانی دیم ءَ ما سک مَلامت بہ اِیں تو وَ زان ئے کہ ما کسانیں مردم نہ اِیں ھھھھھ " ھمے جیڑہ ءَ گوں ما گَڑ ءُ مَنج اِت اِین ءُ دکاندار ءِ لوگ ءَ سر بوت اِیں دُکاندار گُشت "شما برو اِت من پیداک آں " ما پد ءَ دیم پہ دُکان ءَ رھادگ بوت اِیں ، دُکاندار اَتک ، ما چیز گپت ءُ وتی پَرپٹ ءَ سوار بوت اِیں دیم پہ وتی لوگ ءِ نیمگ ءَ رھادگ بوت اِیں، آئی ءَ مدام منی ستائینگ ءِ واست پَرپٹ کدی تینز برُت ءُ کدی آستو کہ باریں شے چے گُش اِیت گُڑا من گُشت "شَر اِنت کہ تو وتی پد زاھر کُت دگہ وھد ءَ من ھم تئی ھمراہ نہ باں " آئی ءَ پد ءَ گشت "نا شے جان من مزاک کنگ ءَ آں باریں تو چے گُش ئے ، بس من ءَ تئی گپ دوست بنت کہ گپے بہ جن ئے چو وَ سپر وش نہ اِنت ۔" انچش داں ما لوگ ءَ سر بوت اِین ءُ من چہ پَرپٹ ءَ اِیر کپت آں ایدگہ سنگتانی دیوان ءَ شت آن ءُ نشت آں آ دگہ لوگے ءَ راہ گپت ۔ پد ءَ شپ ءِ شام ءِ وھد اَت من چار اِت دہ ءُ بیست دمان ءَ رند اَتک ءُ گُشت ئِے ۔ " سنگت دست شود اِت کہ نان وار اِیں ۔" ما دست ششت ءُ ھواری ءَ نشت ءُ نان وارت چہ نان ءِ ورگ ءَ رند ما دراھیں سنگت پاد اَتک ءُ ھر کس جَتا جَتا بوت اِیں ، دراھیں سنگتاں گُشت شَر اِنت پد ءَ انشاء اللہ ڈیک ور اِیں۔ آ دگہ نیمگے ءَ شت ءُ من پہ دگہ نیمگے ءَ ، گُڑا چہ ھمد ءَ ما دو بھر بوت اِیں شُت ایں پد ءَ دو بر من ءُ آئی ءَ ڈَیک نہ وارت وھد روان اَت، انچو داں سالے گْوست اناگہ ءَ یکروچے ما باز سنگت دیوانے ءَ نندوک اِت اِیں گُڑا سنگتے ءَ دپ ھبرے در اَتک ءُ گُشت ئِے ۔ "پلانی اَتکگ پلاں جاہ ءَ اِنت" من گُشت " ناں یار ! اِیشی ءِ من لوٹُک آں شَر اِنت کہ تو من ءَ ھال دات مردم یکروچے بروت ڈِیک ئِے بہ وارت" ھمے جیڑگانی تہ ءَ اِت آں کہ روچے ناں روچے رو آں مھروانیں سنگت ءَ گوں ڈِیک واراں، پد ءَ وھدے ھال رس اِت کہ آ سنگت چد ءَ درکپتگ ءُ دگہ ھندے ءَ شُتگ ، گُڑا مئے گوں یکے دومی ءَ ڈِیک ورگ نہ بوت گُڑا چہ وھدے ءَ پد من زانت کہ سنگت کج ءَ اِنت ءُ کج ءَ شُتگ بَلے مئے یکے دومی ءَ گوں ھال ءُ اھوال نیست اَت، بس من مدام آئی ءِ مھراں چہ شموشکار نہ بوت آن ءُ بس آئی ءِ دیوانگی ءُ مھروانی منی دل ءَ ھر وھد ءَ زندگ اَت من ھمے جیڑگ ءَ اِت آں اگاں زند ءَ وپا کُت اَلم جاگھے ءَ دُچار کپ اِیں۔ ھمے رنگ ءَ وھد روان ءُ ھر وڑیں جیڑہ ءُ ھبر دیم ءَ کپان اَت کاروان جنزان اَت ، کسے برگ بوان اَت ھمراہ جنگ بوان اِت اَنت، ھمے داب ءَ چیزے لگور بوان اَت وھد دیم ءَ تیلاک گران اَت ۔ یکروچے من دیوانے ءَ نشتگ اِت آں۔ من ھمد ءَ سنگتے ءَ چہ جست کُت۔ "پلان سنگت ءِ ھالاں بہ دے باریں چون اِنت زندگ ءُ ھست اِنت ؟" گڑا آ سنگت ءَ گُشت "من انچو اِشکتگ کہ آ سنگت لگور بوتگ نہ زاناں اگاں دروگے یا راستے بَلے من ءَ دگرے ءَ گُشتگ"