ریڈیو زْرمبش بلوچی | ریڈیو زْرمبش بلوچی

ھُور ءَ دو ادار بیت کہ داشتگ ئےِ دوشی سرجمیں شپ ءَ پِژ پِژ ءَ ریتکگ شپ ءِ ھور مَزنیں جنجالے منی دل ءَ باز کم مَردم ءَ شپ ءِ ھور تب بہ کنت، اَسل ءَ من ءَ ھور سک وش بیت بلے شپ ءِ ناں پد ءَ کوہ ءَ ھردیں کہ ھور بیت من سک بے چاڑ بان ءُ میتگ ءِ تْرانگ ءَ کپاں۔ جمّبری موسماں من ءَ لوگ، میتگ، سنگت ءُ کورانی سر ءِ تر ءُ گَرد سک گیر کاینت ،دوشی سَرجمیں شپ ھور ءَ وتی کُت ،من تاں گْوربام ءَ نِشتان ءُ سوت گوش داشت۔۔۔ اے ساھت ءَ من مَزنیں پرّگے ءِ سر ءَ نشتگ اوں جمّبراں آزمان تانسر ءَ مان پوش اتگ بس اے دمان اِنت یا آ دمان اِنت ھور یل دنت، جمّبر ءِ گْوات سُبک سُبک ءَ کَشگ ءَ اِنت۔ پَرّگ ءَ جل شیپ ءِ نوک آپ تچگ ءَ اِنت، دازانی پیش ھور ءَ شُشتگ اَنت سبز سبز اَنت، گُش ئے زان ءَ لھتیں روچ ءِ ڈبّگ ءَ پد مرچی سرگْوپ ءَ ایشانی دیم دْرائی کُتگ، چو بانور ءَ اَنت ،موسم ءِ ساپی ءَ دیم ءَ دور میتگے چمّاں پدّر اِنت، مزن دگّ ءَ پرپٹ ءُ گاڑیانی رو آ اِنت، باریں کے کُجا روگ ءَ اِنت؟ کے اے موسم ءَ مَلار اِنت ءُ کے دیم پہ نوشگ ءَ کور ءُ کوھانی دیم ءَ سر گِپتگ۔۔۔۔۔۔۔۔؟ ھورانی گِیشتر روچاں من بلاھیں پَرگّانی سر ءَ کایان ءُ وتی میتگ ءَ جیڑ آں، گْوستگیں یاتاں پَرّیچان ءُ مَلار باں داں دیر ءَ تھنا نند آں گوں وت ءَ مُلمہ باں اے دمان ءَ ھم من ایوک آں بُرز ءَ، دگہ کس نیست سنگت ھور ءِ تُرس ءَ شپ ءِ ننگری ءِ چن ءُ لانچ ءَ اَنت کہ بلکیں پد ءَ ھور موہ مہ دنت۔ یکے ءَ کیتلی دست ءَ اِنت دیم پہ شیپ ءَ آپ ءَ روگ ءَ اِنت، دیدگ وتی تُپنگ ءَ ٹیل مُشگ ءَ اِنت، دو سنگت گوں آس ءَ سر ءُ لینڈ اِنت،دار ھور ءَ تر کُتگ اَنت اِیشانی روک کنگ انو مَرگ اِنت ءُ سنگت سک جنجال بنت۔ ۔۔۔ چوشیں موسم ءَ بُرز ءَ نندگ ءُ سگریٹ ءِ کَشگ ءِ دگہ لِزتے منی سگریٹ روک اِنت ءُ دوت آزمان ءِ نیمگ ءَ لم لم ءَ گام جنان ءُ گار بوان اَنت، تُپنگ منی کَش ءَ ایر اِنت چادر پِر داتگ ءُ جانٹہ گْور ءَ اِنت ءُ دور گِند چم ءَ انت ،گوانکو ءَ وھاب بلوچ ءِ سوتے پِر اِنت۔ موسمی ھوراں بیا دمے گْوار اِت ملپد ءُ زیداں ڈیھ ءِ سنگار اِت مُدّتے بیت کَت ءُ ڈُکّال اِنت مَکران باگیں ھُشک ءُ بدھال اِنت بزگ اِنت راج ءُ ڈیھ جنجال اِنت دلوت ءُ ھُورتاں ھِرّاں چیھال اِنت اَرسیگ اَنت چم ءُ دل زھیر نال اِنت دست ھمک شکس ءِ پہ دُوا ٹال اِنت ۔۔۔۔۔۔۔۔۔۔۔ شانتُلے دیم ءِ کوہ ءَ دْرچکے ءِ سر ءَ نشتگ ءُ وت ءَ ھُشک کنگ ءَ اِنت، تھنا اِنت باریں چے پِگر کنگ ءَ اِنت؟ کمو چیر تِر دو سیسو ماتکینُکے ءِ کوسگّاں ءَ چَرّگ ءَ اَنت۔ بِہ گند ئے شپ ءَ ھم ھمے نَزیک ءَ دْرنگ بکن اَنت۔ جمّبر سیاہ ترّان اِنت، گْوات ءِ شیکگ ھم تُرند بوان اَنت۔ دست سارتی ءَ ٹنٹّورّان اَنت۔ نو جان ءِ سارتی گیش بوتگ گُش ئے سارتی جان ءِ تہ ءَ اِیر راوان اِنت، گْوات ھم پاد آیگ ءُ جل ءَ روگ ءِ گُشگ ءَ اِنت، بلے اَنگت گُڈی سگریٹ ءَ روک کنان ءُ کش آں گڑا پاد کایاں، تناوھدی ھور ھم اِیر دنت۔۔۔۔۔۔۔۔۔۔۔۔