ریڈیو زْرمبش بلوچی | ریڈیو زْرمبش بلوچی

راجکاری ءِ پڑ ءَ من گوں چیئرمین زاھد ءَ سک باز رند ءَ ڈیک وارتگ ءُ گوں آئی ءَ یکجاہ بوتگ آں، من چہ آئی ءَ سک باز در برتگ، آئی گْرانبھائیں مھر ءُ دلبڈّی مدام مارا گون بوتگ اَنت کہ آ ھمُک وھد ءَ مئے راھشونی ءَ کنگ ءَ بوتگ ءُ راجکاری ءِ بارو ءَ پنت ءُ سکیںن دیگ ءَ بوتگ۔ چیئرمین زاھد ءِ یات ءُ گیر سک باز اَنت، بلے من ءَ چہ آئی ءِ ترانگاں یک نیادے مدام گیر کیت ءُ بے چاڑ کنت۔ سال دوھزار سیزدہ ءِ گُڈّسر اَت کہ ما سنگت جاھے ءَ پکنک کنگ ءَ اَت ایں۔ سنگتاں پَسے ھم کُشتگ اَت ءُ سنگتے مئے نزّیک ءَ پس ءَ گْرادگ ءَ اَت، مئے گپّ ءُ دیوان برجاہ اَت۔ چیئرمین زاھد ءِ گیشتریں گپ کتابانی سر ءَ اِت اَنت کہ پہ سْیاسی کارکن ءَ پلاں کتاب ءِ وانگ ھژدری اِنت، یا پلاں راج ءِ آجوئی ءِ تھریک ءِ وانگ مارا کُمک کنت ءُ سرپدی دات کنت۔ مئے دیوان ھمے وڑ ءَ برجاہ اَت کہ گوشت تیار بوت ءُ ما سنگتاں نان ورگ بندات کُرت۔ نان ءِ ورگ ءَ پد ھر کجام سنگت وتی پلیٹ ءَ زورگ ءُ آپ ءِ سر ءَ رَوگ ءُ شودگ ءَ اَت۔ ھمے وڑ ءَ چیئرمین زاھد ءَ ھم وتی پلیٹ زْرت ءُ پاد آتک دیم پہ آپ ءَ روگ ءَ اَت، ما چار سنگت ءَ وس کُرت کہ چہ آئی ءِ دست ءَ اے پلیٹ ءَ بہ زُور اِیں ءُ وت بہ شود اِیں، بلے آئی ءَ وتی دست ءِ پلیٹ پہ شودگ ءَ کس ءَ نہ دات ءُ وت ئِے شُشت واتر آتک مئے دیوان ءَ نشت۔ سنگتے ءَ درائینت ءُ گْوشت واجہ چیئرمین تو مئے راھشون ءُ راھدربر ئِے باھد اِنت کہ اے وڑیں کسانیں کاراں تو مارا آدگہ سنگتاں موہ بہ دے۔ ما اے دیوان ءَ نشتگ اِیں، ءُ اے درس تئی پگری سنگت ءُ شاگرداں۔۔۔۔۔ چیئرمین زاھد ءَ پچکند اِت ءُ گْوشت سنگت تئی ھبر داں ھدّے ءَ راست اِنت، بلے راجکاری ءِ لوٹ دِگر اَنت۔ ھر یک سْیاسی کارکنے ءَ چاگرد ءَ پیش وتی تہ ءَ آشوب آرگی اِنت۔ چہ جُھدکار ءِ جْوانیں رَوِشتاں مردُم سانمنْد بوان کن اَنت ءُ ھرکس دومی ءِ جْوانیں رَوِشاں وتی تہ ءَ آرگ ءِ جُھد ءَ کنت، ھمے وڑ ءَ اے آشوب چاگرد ءَ مٹّ کنت۔ ھمُک نوکیں سنگت چہ وتی کلانھیں سنگتاں دربارت ءُ آئی ھمُک آدِت ءَ وتی تہ ءَ آرگ ءِ جُھد ءَ کنت۔ چوشیں کسانیں کار یکروچے یا یکرندے ءَ ھچ پرواہ نیست، اگاں اے ھمُک روچ برجاہ بوت اَنت گڑا یک دودے جوڑ بیت ءُ تیوگیں چاگرد ءَ سانمند کنت۔ منی گوں شما سنگتاں دزبندی ھمیش اِنت مدام وتی رَوِشتانی سر ءَ دلگوش ءَ گور بہ کن اِت۔ ھما رَوِشتاں وتی تہ ءَ آرگ ءِ جُھد ءَ بہ کن اِت کہ آ مھروانی ءُ تپاکی، جھد ءُ جپاکشی ءِ سوب جوڑ بہ بنت۔ دومی گپ ایش اِنت کہ مئے مستریں کار راھوتکاری ( ھال ءُ اھوال ) کنگ اِنت، گوں وتی پگری سنگتانی ھواری ءَ گوں لّس مردُماں راھوتکاری برجاہ دارگی اِنت۔ ھال پرسی کنگ مردُم ءِ سْیادیاں مُھکم کنت، آ پگری سْیادی بہ بیت یا ھونی، اگاں مردم چہ اے کار ءَ دور بوت چہ درستاں یکِرّ بوان کنت۔ راجکاری چہ چاگرداں دیمروئی کنت، مارا جْوانیں چاگرد ٹاھینگی اِنت۔ اے دیوان ءِ تہ ءَ شما درسیں ھمبل لاھک ءُ شیواریں جھدکار اِت، مارا ءُ شمارا پہ ھمُک کار ءَ وت ءَ تیار کنگی اِنت۔ اد ءَ کس مستر ءُ کستر نہ اِنت، ما درست چہ یک دومی ءَ دربرگ ءَ اِیں۔ مئے ءُ شمئے ھمبلانی مول ءُ مراد ایوک ءَ بلوچستان ءِ چہ زورگر ءَ آجو کنگ نہ اِنت، بلکیں بلوچ راج ءَ پُر ایمن ءُ وشھالیں بانداتے ءَ سر کنگ اِنت۔ گڑا اے پگر ءِ مردم ءَ سکیں بلاھیں سگ ءُ اُوپارے وتی تہ ءَ آرگ ءُ ھمُک کدم ءِ سر ءَ ھیال گور کنگ ءُ آشوبی بوگ لوٹ اِیت۔ ھو! چیئرمین زاھد ءِ داتگیں درونت ھمک گام ءَ مئے راھشونی ءَ کنگ ءَ اَنت، راھشون زوت واتر کن کہ ما انگت ءَ تئی پنت ءُ سکینانی وادریگ ایں۔ مارا انگت چہ تو باز دربرگی اِنت۔