ریڈیو زْرمبش بلوچی | ریڈیو زْرمبش بلوچی

مات ءُ ماتین سرڈگار نبشتہ کار: سرباز وپاؔ

مات ءُ ماتین سرڈگار    نبشتہ کار: سرباز وپاؔ

NOV

16
16 / 11 / 2022 نبشتانک 105

مات ءُ ماتین سرڈگار دو انچیں لبز اَنت کہ بنی آدم چہ ایشاں اَبید ناسرجم اِنت بزاں بنی آدم ءِ بنگیج ھمیش اَنت۔ بنی آدم چنچو بودناک ءُ مزن بہ بیت آئی درستیں جپاکشیانی بُنھشت مات اِنت، مات ءِ ھک انچش باز اَنت مردم وتی تیوگیں زند ءَ آئی ءِ ھزمتگار بہ بیت بلے مات ءِ ھک ءَ پیلو کرت نہ کنت۔ مات پہ زھگ ءَ سارتیں سْیاھگے، مات چنچو پیر ءُ آجز بہ بیت داں زند ءِ گُڈی ساھت ءَ آئی ءَ وتی زھگ ءِ ھیال گون اِنت، زھگ ءَ مدام ھمے پُرس ایت کہ تئی تب چون اِنت؟ تو ورگ وارتگ یا نہ؟ بزاں چہ وتی ارواہ ءَ گیش وتی زھگ ءَ ارزیشت دنت۔ چہ مات ءَ چورھی ءَ زھگ وار الّم بیت بلے گار نہ بیت روچے نہ روچے الّم بود کنت ءُ وت ءَ دیم ءَ کار اِیت۔ بلے چہ ماتیں سرڈگار ءَ چورہ بوتگیں زھگ وار ھم بیت گار ھم بیت، چی ءَ کہ اَبید ء ماتیں سرڈگار ءَ راجی پجّار زوال بنت۔ اگاں کسے ءَ کہ پجّار نہ بوت گڑا آئی زندمان کجام درد ءَ وارت؟ پمیشکا مردمگری ءِ مستریں لوٹ تئی پجّار اِنت اگاں مردم ءَ را پجّار نہ بوت گڑا مردم ءُ رستر ءَ ھچ پرک نیست بس تھنا بوارت بہ وپس اِیت، آ گوں زندگیناں زانگ نہ بیت۔ اگاں کسے ماتین سرڈگار ءِ اَرزیشت ءَ سرپد بوت گڑا آ ایردستی ءَ پہ وت لانتے سرپد بیت ءُ پہ وتی ماتیں سرڈگار ءِ رکّینگ ءَ داں زند ءِ گُڈی ساھت ءَ جھد کنت ءُ پہ وت ءَ نمیرانی ءِ راہ ءَ گچین کنت۔ اے ھم راستی اگاں کسے راج ءُ سرڈگار ءِ اَرزیشت ءَ سرپد بوت گڑا آ پہ وتی راج ءُ راجی جھدکاریں گیش ھمبلاں مھروان بیت ءُ مھر درنزیت۔ آئی ءِ درور کُرد ءِ جنگولیں جنکانی تامُربند اِنت کہ ماتیں سرڈگار ءِ آجوئی ءَ جھد کنگ ءِ ھواری ءَ یکے دومی ءَ را گوں وتی چنکاں آپ وارینت، گڑا اے مھر ءَ تھنا یک آشوبی جھدکارے بہ پھم ایت۔