ریڈیو زْرمبش بلوچی | ریڈیو زْرمبش بلوچی

مرچان چیزے وھد بیت کہ مزن مزنیں سیاستدان ھمے گپ ءَ کنگ ءَ اَنت کہ بلوچاں زھن سازی، بِزاں برینواشنگ کنگ ءَ اَنت ءُ بازیں مردُم گوں اے گپ ءَ تپاک کنت۔ بلے من اے ھبر ءَ ھچبر نہ منّان ءُ گوں اے مردُمانی گپّان تپاک نہ کن آں، پرچا کہ اے بے بُن ءُ ردیں گپ اَنت۔انچو کہ ما بچار ایں، گوستگیں سال ءَ بانُک شاری ءِ بابت ءَ ھمے گپ کنگ بوتگ اَت کہ آئی ءِ مرد ءَ آئی ءِ زھن سازی کُتگ۔ بلے اے گپ بے بُن اَت، آ پمشکا اے گپ ءَ پد بازین انچین پَسّو ماں چاگردی رسانکدر ءَ شِنگ بوتگ اَت کہ اے گپ ءِ کنوک ھم بےتوار بوت اَنت۔ مرچی ءُ باندا بلوچ ءِ پاد آھگ ءُ جنگ کنگ ءِ سْوب زھن سازی نہ اِنت بلکین بلوچ ءَ ھما سرپدی دیگ بوگ ءَ اِنت کہ آئی ءَ چہ مئے گوستگیں بلوچ بے سما بوتگ اَنت۔اے دور ءَ بلوچ راج وانگ ءُ زانگ ءِ سپر ءِ تھا شون زورگ ءَ اِنت، ءُ سرپد بوگ ءَ اِنت۔ شون زورگ ءَ پد بازیں مارِشت ودی بنت ءُ بلوچ راج ءِ نوجوان،کسان ءُ پیر پہ وتئ آجوئی ءَ در کاینت۔گپ ءِ گوشگ ءِ مُراد اِش اِنت کہ بلوچ ءِ زھن سازی کنگ بوگ ءَ نہ اِنت، بلکیں بلوچ راج ءَ نوں سما کُتگ کہ آ گُلام اِنت، ءُ آئی ءَ پہ آجوئی ءَ گام جُھد کنگی اِنت۔ اگاں ما پہ درور بہ چار ایں، مرچی ریکوڑیک ءَ ھزاراں ٹن سُھر ءُ دگہ شے در آھگ ءَ اِنت بلے بلوچ راج ءَ آیانی چارِکے ھم دیگ بوگ ءَ نہ اِنت، بِلّے کہ اے بلوچ ءِ مڈّی اَنت ءُ چہ بلوچ ءِ زمین ءَ در کاینت۔ اے دُرسیں چیز مردم ءَ وت شون ءُ سرپدی دے اَنت، پہ ایشاں دگہ زھن سازی نہ لوٹ ایت، بَس چمے بہ بیت پہ گندگ ءَ گوشے بہ بیت پہ اِشکَنگ۔