ریڈیو زْرمبش بلوچی | ریڈیو زْرمبش بلوچی

نبشتانک زندمان نبشتہ کار : مھسود بلوچ

نبشتانک        زندمان   نبشتہ کار : مھسود بلوچ

SEP

07
07 / 09 / 2022 نبشتانک 101

زندمان بَنی آدم ءِ اولی ءُ گُڈی تماہ اِنت، زندگ بُوَگ ھر انسان لوٹ اِیت بلے گیدی ءِ تَہ ءَ ابدمان کسّ نہ بیت روچے نہ روچے ھَرکسّ ءَ اے دُگنیا یل دَیگ کپ اِیت مروچی من پدائی شارُل سر ءَ نبشتہ کنگ ءَ آں، آئی ءِ نام توار راجدْپتر ءَ ابدمان اِنت بلوچ جُنز ءِ تَہ ءَ اولی پدائی زالبول ءِ نام زانگ بیت۔ شارُل پہ بندیگیں سرڈگار شَیدا ءُ بے سار اَت، شاری ءَ اِے زانت ءُ زانشست ھست اَت ، گُلزمین مئے مات انت وھدے مات بے چاڑ ءُ بدانی لگتمال بہ بیت، گُڑا راجے شاری ئیں وتن شیدا چون ءُ چتو ایمن ءَ نشت کناں ؟آئی ءَ زانتگ اَت راجے ابدمان بُوَگ گوں آجوئیں سرڈگار ءَ بندوک انت۔ چُوش کہ بلوچ راج بداں ایر دست کُتگ۔ نا مئے ننگ ءُ ناموس رکّ اتگ نَیکہ ایمن ءَ وش واب انت ءُ گُژن ءُ شُد ءَ ھنکین کُتگ، پوہ ءُ شیواریں ورناھانی لاش ھر روچ راج ءَ تلام انت ، وانگجاہ دْژمن ءَ وتی انگیر ءَ کُتگ ءُ یک یک ءَ نودربراں گار بیگواہ کنان انت، اَنجیں ورنا دہ دہ سال ءَ بُرز انت کہ دْژمن ءِ پلیتیں زندان ءَ بندیگ اَنت ، دْژمن اَنچوش بے لگام بوتگ کہ مئے مات ءُ گوھاراں ھم بیگواہ کنگ ءَ انت نَیکہ کسان سالیں تِپل رکّ اتگ اَنت۔ اِے شاری ءِ زانت اَت ءُ گوں سرڈگار ءُ راج ءَ مھر اَت کہ شاری یک بیم بوت مروچی دْژمن ھر بلوچ پُسّگاں شاری ءِ رنگ ءَ گند ایت پچ لرز اِیت چے ءَ کہ شاری ءِ داتگیں دیمونیاں دْژمن بے آرام ءُ بے تاھیر کُتگ، وھدیکہ گْوات لم لم ءَ کشّ ایت گُڑا شاری پگر ءُ دیمونی ھر کُنڈ ءُ دمگ آتار بہ آن ءُ بلوچ پہ پھر گُش ایت شاری مئے شان ءُ پجّار انت، ھمے ھبر دْژمن ءَ چو کارچ ءَ لگ ایت ءُ گنوکی ئِے زیر اَنت ۔۔۔۔۔۔۔۔۔۔ لھتیں انچیں بے مٹّیں کارست بہ اَنت کہ گراں وابی ءَ واب کپتگیں مردم ءَ آگا کن اَنت ءُ سانکلاں بستگیں ھیال آجو بہ اَنت ۔۔۔۔۔۔۔۔۔۔ مزن پگریں ءُ بھادریں شاری ھما کرد ءِ واھند اِنت کہ مروچی آئی ءِ گراں بھائیں کرد سرجمیں گیدی ءَ چو روچ ءِ رُژن ءَ شنگ ءُ تالان اِنت، چو وشبو ءِ گْوات ءَ ھوار اِنت ءُ بلوچ ڈیھ ءُ ملپداں شنگ ءُ تالان اِنت۔ شاری ءَ تانسریں راج ءَ ھمے کُلوہ دات ، دیمونی دَیگ اَلمی انت ھر پُسّگ ءِ پرز انت کہ وتی بود ءَ گوں جُنز ءَ ھمگرنچ بہ بیت۔ کُربان بُوَگ ءِ یک نوکیں کِشکے پہ بلوچ راج ءَ پلگار اِت ئِے، مروچی راج وتی شارُلاں پہ پھر بندگ ءَ انت بلوچ راج مِرگ زانت ھما راجاں وتی گراں بھائیں مِنزل آپسر کُتگ انت کہ آھاں مرگ اَمباز اِتگ شاری ءَ پیش داشت کہ بلوچ راجے بچک ءُ جنک مزاھمت ءِ شان اَنت، کہ دْژمن ءِ پروش دَیگ ءِ ھاتر ءَ اِلم ءُ زانت ءَ ھوار مزاھمت راجاں زندگ کنت۔۔۔۔۔۔