ریڈیو زْرمبش بلوچی | ریڈیو زْرمبش بلوچی

مرزبوم بھشت ءَ دیم ءَ انت نبشتہ کار: ھان تگرانی

مرزبوم بھشت ءَ دیم ءَ انت  نبشتہ کار: ھان تگرانی

SEP

19
19 / 09 / 2022 نبشتانک 64

اے سما منی ھیال ءَ ایوک ءَ انسان ءَ ناں بلکیں ھمک گوسپند ءُ ساھدار ءَ بیت ،ایوک ءَ انسان پہ مرزبوم ءَ زھیروک نہ جنت ،ھمک ساھدار ءَ وتی مرزبوم چو بھشت ءَ دوست بیت ،گوش انت کہ وائے وتن ھشکیں دار۔ یک کپوتے ءَ باگ ءُ بھاراں یل دے بلے انگت پہ وتی مرزبوم ءِ سر ءَ ھشکیں دار ءَ تلوس ایت ،وتی مرزبوم ءَ ترا ھما وشی ءُ آرام ءُ سکون رس ایت کہ تو آزات ءِ ھمک چیز ترا دوست بیت تئی وتیگ انت ، ھمک ریکبار، کور ،شیپ، درچک ءُ دار ترا دوست بیت ترا ھم دوست دار انت ، ھمے ندارگ شیپ ، کور ،کوہ ،درچک، آپ ،سِک دار ءُ پیش درست گوں تئی ساھ ءَ بندوک انت گوسپند ءَ ھم ھمے سما گور جنت بلے ھما ساچان ءِ موسم کہ بیت انچو گش انت مرد ءَ جن ءِ ملکءَ چار گوک ءَ چہ بن ءِ واھند ءَ ۔۔۔۔ اگاں تو گوکے کجا چہ زرت گار بیت گڑا ھما جاہ ءَ کہ تو زرتگ بنی واھند ءَ ھما جاہ ءَ شوھاز ئِے کن ، اے گپ راستے وھدیکہ نود ءُ ساچان بیت ھشتر وتی ھما بنکی ھند ءَ اومان کنت وھدیکہ گار بیت ھمود ءَ بہ شوھاز ئِے ترا دست کپ ایت منی جند ءِ لھتیں پس اتاں چہ زامران ءَ آؤرتگ ات اَنت، تانکہ شش ماہ ءَ تگران ءَ جل اتاں رامگ ات اَنت، کا ءُ کدیم کتگ ات اَنت، یک روچے اناگاہ ءَ شپ ءَ نیتکاں من ایندگہ روچ ءَ ھمے کوہ ءَ شوھاز کت انت دست نہ کپت انت سیمی روچ ءَ اناگاہ ءَ مردمے چہ زامران ءَ آتک منی مردمے ءَ کلو کتگ ات کہ پساں شوھاز مکن پس اتکگ انت، ھمے وڑ ھمک ساھدار ءُ انسان ءَ پہ وتی مرزبوم ءَ اومان کنت منی مرزبوم تگران انت منی بیھ انت من ھمود ءَ رستگ ءُ مزن بیتگاں ۔۔۔۔۔ تگران ءِ زید سک وش انت، کوہ انت ،کور انت، شیپءُ تل سبزیں سک ، چمگانی سارتیں آپ درچک ءُ دار داز، پیش ،کنر ءُ مرگ ءُ ماھیگ ،بینگ، کرگوشک ،سید ءُ شکار ھمک وھد ءَ موسم ناں سارت ناں گرم انت ، مردم بھشت ءَ انت ھوری موسماں بھارگاہ ءُ شیر شیلانچ بیت، ھینزک ءُ مشک ءُ شیلانچ ءُ روگن ،زیک وتی مٹ وت انت تگران ءَ گروکءُ لین نیست ات ناں وانگ جاہ ناں درمان جاہ ما وتی وھد پہ چراگ ءُ ٹبوک ءُ دار ءُ آس روک کنگ ءَ گوازینتگ سارتدرپ ءِ بدل مشکانی سارتیں آپ بیتگ انت ۔ اسپتال ءُ گولی ءُ درمان ازگند ، گردر، ھشاش بیتگ کسے شھراں شتگ دو گولی آرتگ وتی گرنچان اِش ایر کتگ ،مئے گزران ھمے شھرءُ کلگ بیتگ انت ،مچ بیتگ انت مچ روگنی، مزاتیگ ،شوکشیچ، کروچ ،بیتگ انت ،شھر ءِ آپ تکش بیتگ ، کور ءِ دپ بستگ آپ ترینتگ، جو دیم پہ ڈگارءَ برتگ ڈگار مینتگ کشت ءُ کشار کتگ ۔۔۔ گیشتر یں کشت کشار برنج ،گلہ ، پیماز، چماٹُک ،بٹاگ بنڈا ءُ کوسیچ، کشتگ وتی وھد گوازینتگ مرگ گپتگ، ماھیگ گپتگ ، نارشت کتگ ،پتکگ وارتگ ،تلوک ءُ پررانیگ شلو سیسرک بینگ وارتگ کسی سما ھم پر نہ بیتگ وشدلی وشھالی گپ ءُ دیوان مجلس دوستی مھر تالان بیتگ، ھچ چیزے گم ناں ترس ماراتگ، سیادی وارسی گند ءُ گدار بیتگ ، مھمان ءُ مھمان نوازی بلوچی دود ءُ ربیدگ برجاہ بیتگ سواس ءُ تگرد ،پیش پات گوپتگ ، ما شپ روچ وتی دمگ ءَ ویل ات ایں ، پہ مرگ ءَ ماھیگ ءُ سید ءِ شکار کت پہ وشدلی ناں ترسے ھست ناں بیمے وتی شیپ ،تل ،کور ،کوہ ءُ درچکَ ءُ دارانی بو ھمک نیمگ ءَ تالان ات مردم بھشتءَ ات۔۔۔ ھمے وھداں مردم یک پہ یک لڑان ءُ درایان بیت انت ،دیم پہ شھر ءَ کہ اود ءَ مئے زند ءِ آسراتی وش ءُ شر تر بنت ، وانگ جاہ ھست چکاں وانین ایں درمان جاہ ھست گروک ءُ لین ھست زند وشتر بیت مردم درست لڑان ءُ درایان بیت انت چوش اے نزانت کہ وتی مچ اگاں کروچے بہ بیت بلے چہ آزات ءَ شر تر انت تانکہ ما یک ءُ دو پشت کپت ایں، ما ھم آھر ءَ لڈ ات ءُ شھراں شت ءُ جاھمنند بیت ایں ،من ءَ ناکو ءَ چنڈے زمین دات من لھتیں کڑک ڈک دات چاتے جت آپ چات ءَ کش اِت وارت یک باگے اڑ کت دہ بن مچ کشت چات ءِ سر ءَ آپ دات انت گڑا دیر نہ گوست پاکستان ءِ نیم بندگیں لین اتک انت ، روچے لین ھست روچے نیست ساھتے ھست ساھتے نیست ھمے ھال وانگ جاھانی ات روچے استاد کیت روچے نئیت ، ناں کتاب ھست ناں آپ ءُ لین نادرھجاہ ءِ ھمے ھال برے داکتر نیست ءُ برے گولی ءُ دوا، نام گپتیں پاکستانءِ جند نیم بنڈگ انت ۔ ھمے میانءَ ما دہ سال پہ نگیگی گوازینت منی وتن ات وتی مردم ات انت بلے منی ناپگ ھمودءَ کل ات دل تلوس ات پہ تگران ءَ من ماہ ءُ دوماہ ءِ سر ءَ الم شت آں وتی کوہ ءُ کور، کلگ سیل کت انت دل وش کت ھمے سارتیں گوات ءَ دل تاھیر دات ۔۔۔ بلے اناگاہ ءَ جاور مٹ ءُ بدل بیت انت یک ھژدیائیں مارے ءَ سر کش ات مھلوک ءِ چک پیلک اِت انت، گونڈین ، مزنین چک ءُ چوریگ جنین پس دلوت گس لوگ ءُ جاگہ ھر چیز کہ دپ ءَ کپت روپت ءُ شت انت، پیلک ات کشت ءُ وارت، گار ءُ بیگواہ کت مھلوک چہ اے شومیں جناورانی ترس ءَ ژند ات اَنت ، چیر ءُ زیر ات انت ، شپ جاہ ءُ روچ جاھے ات مھلوک ءَ شپ ءَ لوگاں وپت نہ کت کہ شپ ءَ ایر دنت مارا پیلیک اِیت، روچ پہ روچ تمرد بیان بیت ما شپ ءَ در کپتیں کوھاں وپت ایں ، آھرءَ روچاں ایر ئِے دات شکار ئِے کت مارا دیر گند چمان ات کوھانی ٹلاں نشت ءُ چم داشت چہ کجا کیت ما وت ءَ چیر دے ایں، تانکہ آھر ءَ پہ وت ءَ چریک ءُ چک بر ئِے داشت کہ ھر کجا کہ شما اے بنی آدم دیست انت من ءَ ھال دے اِت ، ما باز بر ءَ بلاھیں مار ءِ دپ ءَ کپتگ ءُ رک اتگ ایں، تانکہ آھری ءَ جاور سک نگیگ بیت انت وتی بنجل ئِے آؤرت انت، مئے ھمک میتگءُ راہ سراں نشت گڑا ما لاچار بیت ایں لڑ بار کت دگہ ھندے ءَ درکپت ایں اے ھند مئیگ انت زند ءِ آسراتی درست ھست بلے نیکہ پما اے ماتے ناں ماتویے چک بر برے برے ھمد ءَ ھم کاینت بلے ما کہ سھیگ بہ ایں، چیر بہ ایں تانکہ یکیم بنت رو انت اے ھند وش انت بلے ما درآمد ایں نیکہ اد ءِ زبان ءَ سرپد بہ ایں نیکہ مئے دودمان یک انت من انگت تلوساں پہ وتی مرزبوم ءَ تگران وتی مٹ وت انت مرزبوم مات انت مرزبوم بھشت انت مرزبوم ءَ چہ دوستریں چیز نیست پمیشکہ کپوت ملامت نہ انت کہ پہ زھیر نالیت کہ وائے وتن ھشکیں دار۔ مرزبوم ءِ مھر مات ءِ مھر انت ھدا انت کہ زند ءَ وپا کت، سیاہ مار ءِ سر گڑاتیں چک بر گار ءُ بیگواہ بیتین اَنت ، ھما نوبت دوبارہ بیاتکین انت ، تگران دوبر بانور بیت انت ، من وتی مرزبوم چم ء وت بہ دیستین ، سارتیں ساھے کش اتیں وتی کوہ ءُ کوچگاں پہ آجوئی ءَ تر ءُ تاب بہ کتیں ھما نوبتانی واھند بیتین اَنت۔۔۔ شالا انچوش بات منی گلزمین میزران بات۔۔۔۔۔