ریڈیو زْرمبش بلوچی | ریڈیو زْرمبش بلوچی

وھدے کہ من پہ وانگ ءَ لومز شھدربرجاہ ءَ شُت آں گڑا بندات ءَ من گوں کس ءَ درستی نہ اِت آن ءُ منی پجاروک ھم کس نیست اَت، اولی سمسٹر ءَ ھمک روچ وتی کلاس ءَ برو بوان ءُ واتر وتی گِس ءَ بیا، من ءَ ھمے گمان بوگ ءَ اَت کہ اد ءَ شھدربرجاہ ءَ منی مردم کس نیست، بے کسی مردم ءَ سک ھیران کنت ءُ نا درستی پہ مردم ءَ سکیں بلاھیں جنجالے جوڑ بیت، بس ھمے وڑ ءَ منی زندگی ءِ روچ پہ ناوشی گوزگ ءَ اِت اَنت۔ بلے من نا اُمیت نہ اِت آن ءُ وتی جھد ءِ سر داشتگ اَت کہ من ءَ پہ وشیں بانداتے ءِ نیمگ ءَ جنزگی اَت، بس ھمے وڑ ءَ روچ روان اِت اَنت ، کہ یک روچے من لھتیں ھمبل دیست ءُ گوں آیاں منی گپ ءُ تران بوت، آیاں من ءَ بساک ءِ بابت ءَ سرپدی دات، آیاں من ءَ ھمے گوشت کہ بساک یک نودربر گَلے ءُ آئی مول ءُ مراد نودربراں راست ءُ ھکی ئیں سْیاست ءِ بابت ءَ سرپدی دیگ اِنت، اگاں کسے سْیاست ءَ سرپد بوت گڑا آ مردم وتی زندگی، گلزمین، راج ءُ راجی دودماناں سرپد بیت، اگاں تو بساک ءَ بھر زْرت کن ئے گڑا ما ترا وش اَتک کن ایں، من چہ سنگتانی گپانی گوشدارگ ءَ پد رزا بوت آن ءُ بساک ءَ بھر زْرت۔ ھمک وھد ءَ کہ گَل ءِ دیوان بوتگ اَنت ، گڑا من دیواناں بھر زْرتگ، چہ سنگتانی شیرکنیں دانک ءُ گرانبھائیں مھر ءُ دلبڈیاں من ءَ بازیں سرپدی رس اتگ ، مرچی اے ھما ھمبلانی مھرانی برورد اِنت کہ من شھدربرجاہ ءَ پہ وت ءَ گسے سرپد بہ آں من پہ بساک ءِ باسک بوگ ءَ پہ وت ءَ وشبھتی یے سرپد باں۔ آ وھد ءَ کہ من بساک ءَ بھر زرتگ اَت گڑا لومز ءَ بساک ءِ جنکیں باسک ایوک ءَ من اِت آں دگہ کس نیست اَت، من اے گپ کدی ھم نہ مار اتگ کہ جنکیں باسک دگہ کس نیست۔ چہ گَل ءِ دیواناں من ءَ مدام سنگتاں ھمے گوشتگ کہ تو جنکیں نودربرانی سر ءَ کار بہ کن ءُ پہ گَل ءَ دگہ باسک ھم جوڑ بہ کن۔ منی گپ ھمیش اَت کہ من اد ءَ مزن شھدربرجاہ ءَ سھب ءَ کایان ءُ پد ءَ واتر وتی گِس ءَ رواں اے وڑ ءَ آدگہ سنگتانی سر ءَ کار کنگ نہ بیت، من گیش ءَ چہ گیش کنٹین ءَ دہ یا بیست منٹ گوں سنگتاں گپ ءُ تران بہ کن آں انچو وھد ءَ من گوں آیاں وشی ءُ جوڑی یے کرت کن آں بلے پہ انچوکیں وھدے ءَ من آیاں ءَ سرپدی دات نہ کن آں۔ گڑا منی گپ ھمے بوت کہ اگاں من نودربرانی سر ءَ کار بہ کن آن ءُ پہ گَل ءَ نوکیں باسک بہ ٹاھین آں گڑا من ءَ ھاسٹل ءَ دارگ لوٹ ایت گڑا من گوں سنگتاں گپ ءُ تران کرت کن آن ءُ گَل ءِ کاراں کرت کن آں ھمے وڑ ءَ وھد روان اَت گڑا دو سمسٹر ءَ پد من آتک آں ءُ ھاسٹل ءَ داشت۔۔۔۔۔۔ گڑا ھاسٹل ءِ آیگ ءَ منی گوں سنگتاں جْوانیں وڑے ءَ گپ ءُ تران بوان بوت ، ھر وھد ءَ گوں سنگتاں ھوار اِت آن ءُ مئے گند ءُ نند برجاہ اَت۔ مرچی ھمے بساک ءِ برورد اِنت کہ شھدربرجاہ ءَ منی ھندی مردمانی ھواری ءَ ما گوں بساک ءِ دہ دوازدہ سنگتاں یکجاہ این ءُ مئے وانگ یکے دومی ءَ گوں جُست ءُ پُرس برجاہ اِنت۔ مرچی من اے گپ ءَ پھر بنداں کہ وتی گَل بساک ءِ سر ءَ آئی ءَ مارا وت ما وت ءَ مھر کنگ پرماتگ، الّم ءُ سْیاسی زانت ئِے بکشتاتگ چہ اوتل ءِ مزن شھدربرجاہ ءَ اَبید بلوچستان ءُ بلوچستان ءَ ڈن ھر کجام وانگجاہ ءَ کہ مئے سنگت ھست اَنت انچش بزاں آ وانگجاہ پما گس ءِ ھساب اَنت۔ من مرچی اے گپ ءَ پہ شانے گُش آں کہ ھمے مزن شھدربرجاھانی تہ ءَ پہ نودربرانی زانت ءُ سرپدی دیگ ءَ بساک جتا ھم یک شھدربرجاھے ءِ کردار ءِ پیلو کنگ ءَ اِنت۔ بساک پہ نودربراں وت یک شھدربر جاھے بلکیں من ءَ چشیں گال نیست کہ بساک ءِ سر ءَ نبشتہ کنگ ءِ ھک ءَ اد ءَ بہ کنت، من تھنا ھمے گوشگ لوٹ آں کہ نودربر گیش ءَ چہ گیش بساک ءَ بھر بزور اَنت ءُ بساک ءَ مھکم بہ کن اَنت بساک بلوچ نودربراں سیاست ءِ پڑ ءَ شریں وڑے ءَ زانت ءُ سرپدی بکش ایت۔۔۔۔