ریڈیو زْرمبش بلوچی | ریڈیو زْرمبش بلوچی

چہ مزھبی چست ءُ ایراں آشنائیں ملا پہ زمین دیوانگ اَت، آئی ءِ وانگ ءِ زمانگ ءَ بگر داں وانینگ ءِ وھد ءَ آ مدام پہ زمین ءُ زمین ءِ بچاں جیڑگ ءَ ات. ملا وتی تند بستگیں چاگرد ءِ ھمُک مردم ءَ چہ جِتا اَت تو اے ھم گوشت کن ئے کہ آئی ءَ وتی میتگ ءَ شریں سنگت ھم نیست ات. آئی ءَ وتی ھم پِگریں مردم دست نہ کپتگ ات پرچا کہ ملا ءِ کش ءُ گور ءَ تھنا پہ لاپ زندگیں مردم نشتگ اِت اَنت ءُ پہ نامیں لھتے سنگت اَنت کہ وت ءَ راجی زرمبشت ءِ پلہ مرز ءُ جھدکار گوشت اِش، شلوار ءُ مید اِش دراج ات انت، ھمک دیوان ءَ کہ نِشت اَنت آھانی بٹاکاں دیوان سر ءَ زُرت بلے پہ کار ءُ دیمونی ءَ گون نہ ات اَنت، ملا چہ اے مردماں جتائیں تب یے ءِ واھند ءُ ھاموشیں مردمے اَت ءُ وت ءَ مدام چہ ایشاں گستاہ ئِے داشت. ملا ھردیں کہ گوں من دُچار کپت تہ ھمے سنگتانی کسہ ئِے الم کرت اَنت کہ سنگت مزنیں راج دوست اَنت ءُ پدءَ ھاموش بوت ءُ گپ ئِے دگہ نیمگے بُرت من انچو سما کرتگ ات کہ ملا ءَ ھمے سنگت ھِچ دوست نہ بنت ءُ اے نادوستی ءِ سوب مرچی منی چماں، منی ناں بلکیں ھند ءِ دراھیں مردمانی چماں پدر انت. ھمے پہ نام راجدوستیں ٹولی مروچی ھم زندگ اَنت ءُ وڑے ناں وڑے دژمنیں استان ءِ چانوگری ءَ کنگ ءَ اَنت. ملا ءَ مدام یکیں وھد ءَ دو کار دست ءَ ات. وانگ ءُ جنگ یا وانینگ ءُ جنگ، ملا وتی نودربرے ءِ وھد ءَ راجی آجوئی زرمبشت ءِ کاروان ءِ سرپ ءَ ھوار کپتگ اَت ءُ مولوی یے ءِ پاگ ءِ بندگ ءُ زھگانی وانینگ ءَ ھم ملا چہ زرمبشت ءَ دیر نہ کرت بلکیں پاگ بندی ءَ پد آئی ءِ جوزگ پہ آجوئی ءَ مھکم تر بوت اَنت ءُ آ پہ وتی زمین ءِ موکگ ءَ سلاہ بند بیتگ اَت. وانگ ءِ زمانگ ءَ ملا ءَ پہ سنگتاں مالی کمک ھم یکجاہ کرتگ ءُ پہ آھاں توشگ زرتگ ءُ رسینتگ، ملا وش تبیں مردے ات، آئی ءَ دیوان کدی ھم پہ ھاموشی نہ اشت. ملا چیرجنگی ءِ رِپکاں سوھوئیں سرے اَت، ملا ءَ زانتگ اَت کہ من ءَ چے ءُ چون کنگی اِنت، آ چو پہ نامیں کامریڈاں جزباتی نہ اَت بلکیں آئی ءِ جیڑہ مدام کارانی سر ءَ ات اَنت، ملا مدام پہ زمین پھازاں مالی کمک ءُ وتی ھند ءَ پہ آھاں دوزواہ ءِ جوڑینگ ءَ تچ ءُ تاگ ءَ اَت. من ءَ یات کنت کہ یکرندے ملا ءَ چہ کراچی ءَ منی سر ءَ چیزے زر پہ سنگتانی توشگ ءَ دیم داتگ ات گڑا من ملا جست کرت کہ شریں ملا تو بہ گوش باریں اے تنگدستی ءَ اے زر چہ کجا...؟ گڑا ملا ءَ گوں ٹھکگے پسہ دات کہ اے زر من چہ ھماھاں گپتگ اَنت ءُ ھماھانی کوش ءَ کارمرد بنت. گوں ملا ءِ اے گپاں من ءَ سما بوت کہ ملا چینچو کار زانت ءُ سوگھ اِنت. وھدے کہ ملا ءِ وانگ ءِ وھد ھلاس بیت ءُ آ وتی ھلک ءَ اتک گڑا یک مسیتے ءَ پیش امام بیت ءُ مردماں نماز دنت ءُ چُکاں سی پارہ وانین ایت ءُ دومی نیمگ ءَ پہ راجی آجوئی ءَ چیرجنگی ءَ ھم برجاہ دار ایت. ملا ءَ مدام گوں وتی دوستیں نودربراں ھمے گوشتگ ات کہ دگہ وانگ زان ات اگاں ناں بلے وتی ماتی زبان ءِ وانگ ءُ نبشتہ کنگ ءَ الم بہ زان اِت. ملا وت ھم ھردیں کہ دست ھورک بیتگ اَت گڑا بلوچی کتاب ءِ وانگ ءَ گندگ بوت. ھمے وڑ ءَ وھد گوزان بنت ءُ ملا مدام گوں زمین پھازاں ھوار اَت، توشگ ءِ سر کنگ بہ بیت یا تبلیگ ءِ نام ءَ شش شش ماہ ءَ سنگر ءِ نندگ بہ بیت ملا وڑے ناں وڑے ءَ گون اَت ءُ ھرکس چہ ملا ءِ سرمچاری ءَ بے سُدّ ءُ سما، داں 14 ستمبر 2011 ءِ شپ ءَ آ چہ ھما میتگ ءَ آوار جنگ بیت کہ آئی ءِ مسیت ءِ پیش امام اَت ءُ 67 روچ ءَ پد بزاں کہ 20 نومبر 2011 ءَ ملا ءِ ڈریل کرتگ ءُ تیر سُپتگیں لاش واتر اتک گڑا مردماں زانت کہ ملا کے اَت.