ریڈیو زْرمبش بلوچی | ریڈیو زْرمبش بلوچی

سیمی بھر شال تاکشان ءِ مولُم ءَ بدل کُتگ اَت انچو گُمان بوت یک زنڈیں رنجے ءَ مانشانتگ یک بے تاھیری ءَ سر چِست کُتگ اَت کھریں سردی یے بادشاھی کنگ ءَ اَت روچ ءِ بِرانزاں ءَ ھچ ارزِشت نیست اَت پیسری وڑ ءَ پٹ ءُ پِڑاں دیوان کنگ نہ بوت ، مردُم بازار ءَ انچش ات اَنت پجارگ نہ بوت اَنت ماھل ءَ اے جاور شال ءِ دیست اَنت ماھل ءَ وتی اندر ءِ ویرانگی گیر اَتک شال چو آدینک ءَ ماھل ءِ اندر ءِ اکس ءَ پیش دارگ ءَ اَت آرا گیش بے تاھیر کنگ ءَ اَت آئی گیرانی جمبر سھت ءُ دمان گیش سْیاہ ءُ تھار دیم بْیان اَت اَنت شال آرا دوست نہ بیگ ءَ اَت ۔۔۔۔۔۔ ھمے کھریں سردی ءُ کَترہ شانیں مولُم ءَ ماھل سُھب ءَ مھلہ پاد اَتک کہ بیگواھیں مردُمانی بُنجل ءَ نندانک دیگ ءَ پہ وت ءَ تیار ئِے کُت ءُ سرگیپت ۔ ۔۔۔۔۔۔ مُدامی ئیں وڑ ءَ ناشُناسیں مردُم ماھل ءِ رندگِیر کنگ ءَ اَت اَنت برے چَہ ماھل ءَ ساری بوت اَنت برے رَند ءَ بوت اَنت اِے پہ ماھل ءَ نوکیں گپے نہ اَت ھما روچ ءَ کہ آ بیگواھیں مردُمانی بُنجل ءَ روگ ئِے بِنا بوتگ اَت اِے رَندگِیری ھم بِنا اَت آ انوں کُجا کہ شُت اِے مردُم آئی ءِ پد ءُ دیم ءَ اَت اَنت کُجا روت چے کنت گوں کَے نند اِیت شھر ءَ بازار ءَ یا پہ ساتے ءَ سر بِہ گِپتیں بزان ماھل ءِ چپ ءُ چاگِرد ءَ اِے مردُم مُدام گون اَت اَنت برے بیھار اِش دات برے سر ءَ اُرش کنگ لوٹ اِت اِش برے یک ھُنرے کُت اِش ماھل ازاب کُتگ اَت اِیشاں بَلے چے بِہ کنت ماھل لاچار اَت پہ وتی بْرات ءَ زھرشانی کنگ ءَ بھر زورگ پہ آئی ءَ المی اَت دگہ ھچ راہ ءُ دَر نیست اَت ۔۔۔۔ آ بیگواھیں مردُمانی بُنجل ءَ نشتگ اَت ھمے جیڑگ ءَ اَت باریں کدی منی بیگواھیں بْرات سوبان جان چَہ زندان ءَ واتر بیت منی سر ءَ اے مردُمانی تُرسینگ ھلاس بیت من یک وشیں زندے بِہ گْوازین آں پہ تُر ءُ تابے ءَ آزاب مہ باں روچے ھزار بیھار پہ من ءَ مہ اِت ۔۔۔ ھمے جیڑگ ءَ گوں آئی ءِ چم وتی دیم ءَ نشتگیں پیرزالے ءَ کَپت اَنت کہ وتی نازاکیں زھگ ءِ اکس آئی ءِ دست ءَ اَت لُنٹان ئِے تلک بستگ اَت چم ئِے ارسیگ اَت اَنت چم ئِےسُھر سُھر اَت اَنت ماھل ءِ ھیال ءَ اَتک باریں اے بزگیں زال ءَ را چُنت سال بیت کہ چماں واب نہ دیستگ بے وسی ءَ باریں کدی وتی امبازاں زُرتگ باریں اے زال ءِ سر ءَ روچے چُنت بیھار کیت روچے چُنت بر ءَ تُرسینگ بیت ۔۔۔ ماھل ءَ گوں پیرزال ءِ گندگ ءَ منی ھیال ءُ درد بے ھال کُت ھمے پیر زال ءِ زند ءِ سر ءَ جیڑگ ءَ اَت کہ ناگھاں چَہ پُشت ءَ یکے ءَ ماھل ءِ کوپگانی سر ءَ دست ایر کُت ءُ گْوشت ئِے مرچی پہ گوشتانک ءَ وت ءَ تیار کن ۔۔۔۔ آئی نہ چار اِت کہ کَے اِنت بس انچو گْوشت ئِے ھو الّم ، بلے ھیال کُت ئِے من گوشتانک ءَ چے بُہ گْوش آں اے گپ ما ھر روچ گْوشتگ اَنت کہ مئے مردُماں آجو بہ کن اِت یا وتی آمیدگِساں پیش اِش بہ کن اِت مارا اِنچو بزگ ءُ وار ءُ آزاب مہ کن اِت ما گوں شُما دست بندی کن ایں مارا ناھکیں چُشیں بلاھیں سزا ءَ مہ دے اِت مئے سر ءَ بزگ بہ کن اِت ما ھاٹیگ کُت نہ ایں چِد ءُ دیم ءَ دگہ دگہ ۔۔۔۔ بلے مئے اے گپاں کَس کِمار نہ کنت مارا کَس مردُمے منّگ ءَ تیار نہ اِنت مئے سر ءَ مُدام اے کند اَنت مارا وڑ وڑیں بد ءُ رد کن اَنت برے برے انچو گُمان بیت ما رسترانی مزنیں رَمے ءَ پہ ردی ھور کَپتگ ایں دگہ ھند ءُ جاگے ءَ برگ بوتگ اِیں اے مردُمانی دیارے نہ اِنت اِد ءَ تھنا مردُم گری ءِ نام گِرگ بیت بس مردُم ءِ جند پہ چم ءِ درمان ءَ نیست ۔۔۔ اِد ءَ آمیدگِسانی رھبند ، میان اُستمان رھبند ، ھُدا تُرسانی رھبند ، مردُم دوستانی رھبند مُلک ءُ ڈیھانی رھبند دْرست بس تھنا تاکانی باھوٹ اَت پہ گامگیج ءَ ھچ نیست اِد ءَ نبشتہ دگہ کن اَنت گْوش اَنت دگہ کار دگہ وڑ کن اَنت کارپد دگہ وڑ اَنت دّرست چَپ ءُ چوٹ اَنت ھچ پہ راہ راست نہ اِنت اِد ءَ ھر گال ءِ زگریں بزانت دگرے ءُ کار بندیں بزانت دگرے چوناھیگ ءَ آئی ءِ بزانت دگرے مردُم ھیران اِنت اے کُجام بزانت ءَ کُجام جاہ ءَ کارمرز بنت ما کُجام بزانت ءَ ئِے سرپد بہ بہ ایں اجبیں جھانے کَس نہ زانت چے بیگ ءَ اِنت اد ءَ چے بیت دیم ءَ ۔۔۔۔۔ روان اِنت