ریڈیو زْرمبش بلوچی | ریڈیو زْرمبش بلوچی

کسہ سرجم نہ اِنت نبشتہ کار : داد شاشانی

کسہ سرجم نہ اِنت   نبشتہ کار : داد شاشانی

SEP

14
14 / 09 / 2022 نبشتانک 82

دوھمی بھر ماھل پہ شال ءَ روگ ءَ تیاری کنگ ءَ اَت ، کَاپر ءِ چیر ءَ مات ءُ پِت ءُ سوالی نشتگ اِت اَنت گپ ءَ اَت ، نشار چُل ءَ اَت شپ ءِ ورگانی جوڑ کنگ ءَ اَت نشار ءِ نام مھناز اَت ، مھناز ءَ دہ ونتگ اَت دیم ءَ پہ وانگ ءَ مھناز ءِ لوگ ءِ مردُمان ءَ ھرچ ءُ درچ نیست اَت پمیشکا مھناز دیم ءَ ونت نہ کُت مھناز ءِ سے گوھار اِت اَنت بْرات نیست اَت ئِے پت ءَ را دُکانے ھست اَت بازار ءِ میان ءَ ھشت سال ءَ پیسر پجار نہ بوتگیں سِلاہ بندیں مردُماں تیرگواری کُتگ اَت نمیران کُتگ اَت مھناز ءِ مات نوں وتی لوگ ءَ مشین دوچ اِیت وتی زھگانی لاپ ءَ پہ اَزابی کَش اِیت پت ءِ مرگ ءَ پد مھناز ءَ وانگ یل کُت گوں مات ءَ وتی لوگ ءِ ھرچ ءُ درچاں پہ دستکاری کُتگ شش سال اِنت کہ مھناز ءَ سور کُتگ ، مھناز ءِ لوگانی کَش ءَ مھناز ءِ مات ءِ لوگ اِنت سوالی ءُ مھناز چَہ کسانی ءِ دوست اِت اَنت ، مُدام گپ ءُ دیوان وش گپی بوتگ اِش مھناز سکیں دیم پچیں ءُ مھروانیں جنکے اَت گوں میتگ ءِ دْرستیں مردُماں گپ ءُ دیوان اَت ، وش روھے اَت ،پت ءِ مرگ ءَ پد مھناز باز رنج اِتگ اَت ،گوں کَس ءَ دیوان ءُ گپ ئِے نہ کُت مُدام گریوگ ءَ اَت سوالی ءَ مھناز اے وڑ ءَ دیست سوالی ءِ دل ءَ تُرسے کَپت، کہ مھناز گنوک مہ بیت دیم پہ وت مہ بیت سوالی چَہ کسانی ءَ ھمے واھگ داشتگ اَت کہ منی سور گوں مھناز ءَ بہ بیت مھناز ھم ھمے واھگ ءِ ساھِگ ءَ نشتگ اَت پت ءِ مرگ ءَ پد جاور سک بدل بوت اَنت میتگ ءَ تُرسے ءَ سر چِست کُتگ اَت روبرکت ءَ پد کَس وتی لوگاں چَہ در نیاَتک کہ مارا پجار نہ بوتگیں مردُمے مہ کُش اِیت یا گار ءُ گور مہ کنت مھناز ءِ پت بلوچ جُنزے یک زنڈیں باسکے اَت راجکاری ءَ سک بلد اَت مھناز ءِ پت میتگ ءِ اولی جُھدکارانی نام ءَ زانگ بوت مھناز ءِ پت باز واندہ ءُ زانتکاریں مردُمے اَت مُدام وتی راج ءِ بزگی ءُ لاچاری ءِ گپ کُت ئِے پت ءِ مرگ ءَ پیسر مھناز ھم گوں پت ءَ جُنز ءِ بازیں کاراں گوں ھم کوپگ اَت بلے پت ءِ مرگ ءَ پد مھناز ءَ باز پْروشتگ اَت گوں سوالی ءَ سور کنگ ءَ پد مھناز کم کم ءَ یکبرے پد ءَ وت ءَ نَزّ آران کُت انوں مھناز بازیں جُنز ءِ کاراں گوں گُلائیش اِنت بلے سوالی ءِ لوگ ءَ ھم بازیں رنج ءُ گماں مھناز ءَ انگیر کُتگ نوکیں پد ریچ چَہ مھناز ءَ باز دربرگ ءَ اَنت جنک روچ پہ روچ گیش جُنز ءَ گوں ھوار بْیاں اَنت مھناز تھنا راجکاری نہ کنت مھناز ءِ دست بلوچ لبزانک ءَ ھم گوں شَریں وڑے ءَ ماں اِنت مھناز ءِ ھیال اِنت راجکاری بے لبزانک ءَ سَنٹ اِنت پُل ءُ بر کُت نہ کنت مھناز چَہ وتی پت ءَ باز در بُرتگ باز بلدین ءُ زانتکار ءُ لائکیں جنکے مھناز ءَ پت ءِ مرگ ءَ باز رنجینتگ بلے نزور نہ کُتگ ۔۔۔۔۔۔۔۔۔۔۔۔ مھناز ءَ ورگ تیار کُت اَنت سدگنج ءَ ورگ کاپر ءِ چیر ءَ آرت اَنت پرزُونگ پچ کُت نان ءُ نارُشت پہ گیگ ایر کُت اَنت ماھل ءَ توار کُت ئِے بیا نان کَش اِتگ اَنت ۔۔۔۔ دْرست یکجاہ نشت اَنت ورگ اِش وارت ، ورگ ءِ ورگ ءَ پد سوالی ءَ چَہ ماھل ءَ جُست کُت۔۔۔۔ تو شال ءَ روگ ءِ سرجمیں وتی تیاری کُت اَنت ؟ ماھل ءَ پہ بچکند گْوشت ھو لالا من وتی تیاری کُتگ اَنت ۔ دیم ئِے گوں مھناز ءَ کُت ءُ گْوشت اَدّی من ءَ سُھب ءَ مَھلہ پاد کن دانکہ چَہ گاڈی ءَ پشت مہ کَپ آں ۔ مھناز لوگ ءِ تھ ءَ دْرستاں اَدّی ءِ نام ءَ توار کُت ۔ لوگ ءِ تھ ءَ ھر وڑیں کارے بوتیں دْرستاں چَہ پیسر مھناز ءَ چَہ جُست گرگ بوتگ اَت پد ءَ آ دگراں چے ، لوگ ءِ سرجمیں زمہ داری گوں مھناز ءَ اَت اَنت ۔ سُھب ءَ مھناز ءَ مَھلہ ماھل چَہ واب ءَ پاد کُت ارزبند تیار کُت ارزبند کنگ ءَ پد ماھل رُکست کنگ بوت ماھل ءَ شُت دیم پہ شال ءَ ۔۔۔۔۔۔ اے میتگ ءِ نام اَت شارُل ءِ ھلک شارُل اے میتگ ءِ اولی شیر زال بوتگ انگریز ءِ وھد ءَ ھمے ھلک ءِ سرکماش بوتگ دُزّ جنگی ءَ سک بلد ءُ نامدار بوتگ شارُل وتی زند ءَ وتی میتگ ءَ بداں پہ یک کوھی پُلنگے بوتگ شارُل رنگ ءُ ڈیل ءُ بالاد ءَ ھم سک نامدار بوتگ آ وھداں اے میتگ ءَ اگاں کَسے بے جُست ءُ پُرس ءَ ایر کَپتگ پد ءَ وتی مرزی ءَ واتر نہ بوتگ شارُل انچیں بلاھیں بیمے بوتگ انگریز بوتگ اَنت یا دگہ دُزّ ءُ جنگول آ شارُل ءِ میتگ ءَ پہ ردی نیاتکگ اَنت ، پمیشکا اے میتگ ءِ نام چَہ شارُل ءِ مرگ ءَ پد ایر کنگ بوتگ ھما اِنت اے میتگ ءِ مردُمانی ھیال اِنت ، مئے میتگ ءَ کَس پہ بدیں نگا بچار اِیت ما آئی ءِ چماں چَہ رُوتگاں در کن اِیں بلے انوں اے میتگ ءِ جاور سک ھراب اَنت انوں بدواھاں اے میتگ سک نگیگ کُتگ بدواہ زان اَنت اگاں ما اے میتگ ءَ کمو نادلگوش کُت اے میتگ یکبرے مئے دست ءَ چَہ کمو لگْوَشت پد ءَ مارا پہ اے میتگ ایر کَپگ ءَ مھشر بیت ، چونائی ءَ بدواہ اے میتگ ءَ ایر نہ کَپت یک مزیں زمین چنڈے ءَ میتگ باز تاوان داتگ اَت میتگ ءِ مردُم زمین چنڈّ ءَ بیوار کُتگ اَت اَنت گُڑا بدواہ ءَ سوب کُت میتگ ءَ ارزانی ءَ ایر کَپت میتگ وتی انگیر ءَ کُت ھما اِنت روچ پہ روچ میتگ ءَ بدواہ ءِ بُنجل گیش بْیاں اَنت کمی ءِ نام نہ زان اَنت جاور ھم روچ پہ روچ گیش نہ گیگ بیاں اَنت ۔۔۔۔۔۔۔ روان اِنت ۔۔۔۔۔۔۔۔۔۔۔