ریڈیو زْرمبش بلوچی | ریڈیو زْرمبش بلوچی

کسہ سرجم نہ اِنت نبشتہ کار : داد شاشانی

کسہ سرجم نہ اِنت   نبشتہ کار : داد شاشانی

SEP

09
09 / 09 / 2022 نبشتانک 63

اولی بھر مات ءَ چَہ مَشّکّ ءَ آپ کَش اِت ءُ اَتک آپ وتی مستریں زھگ سوالی ءِ دیم ءَ ایر کُت اَنت چَہ ماھل ءَ جُست ئِے کُت ، تو ساھل ءَ مرچی ھال کُتگ ؟ ماھل ءَ گوں وشیں بچکندے ءَ گْوشت ، ھو اَمّا ھال کُتگ وش اَت ۔ پت ءَ را پیش ءِ جَھتکے دست ءَ اَت کہ روچ ءَ چُپتگ اَت پہ وتی گوکانی ننگار ءَ سِیتّے کنگ ءَ دلمانگ اَت، پت ءَ وتی دیم گوں ماھل ءَ کُت ءُ چو بے وسیں دابے ءَ جُست ئِے کُت ، گُڑاں ساھل جان ءَ نہ گْوشت کدی کایاں ؟ ماھل ءَ زانت کہ پت پہ ساھل ءَ بے وار انت، پمیشکا اے داب ءَ جُست ئِے کُت، ماھل وتی نشتگیں جاہ ءَ چَہ پاد اَتک وتی پت ءِ کَش ءَ شُت نشت ءُ پت ئِے امباز ءَ کُت ءُ گْوشت ئِے ، ابّلی ساھل ءَ گْوشتگ چکاس نزدیک اَنت چکاسانی دیگ ءَ پد کایاں ، وتی سنگتانی کِر ءَ دگہ وش ءُ سلامت اِنت تو وت ءَ مہ رنجین ، ماھل ءَ وتی پت ءَ را بوسگے گِپت ءُ کمو کِنز اِت ، مستریں بْرات ءَ تاس ءِ آپ وارت اَنت تاس ایر کُت ءُ دیم گوں ماھل ءَ کُت جُست ئِے کُت ، گُڑا تو کدی روگ ءَ ۓ باریں شال ءَ منی ھیال تئی موکل ھم نوں تمام اَنت ؟ ماھل چَہ پت ءِ کَش ءَ پاد اَتک وتی بْرات ءِ کَش ءَ نشت ءُ وتی بْرات ءِ باھُڑانی سر ءَ سر ئِے ایر کُت ءُ گْوشت ، لالا من دہ روچ ءَ پد رو آں شال ءَ منی دزگْوھار سمُل ءِ آروس اِنت چار روچ ءَ پد من وتی دزگْوھار ءِ آروس ءَ نند آں اگاں مہ رو آں پد ءَ گوں من زار بیت، بْرات ءَ بچکند اِت وتی دست ماھل ءِ سر ءَ سمارت پہ مِھرے ماھل ءَ چارگ ءَ لگ اِت ، نشار دیم پہ دیم ءَ نشتگ اَت بچکند اِت ئِے چَہ وتی مرد ءَ جُست ئِے کُت ، تو ماھل ءَ چی ءَ چو ھُورت ھُورت چارگ ءَ ۓ ؟ نشار ءِ گپ ءَ چَہ دْرست ماھل ءِ مستریں بْرات سوالی ءِ چارگ ءَ لگ اِت اَنت ، سوالی ءَ ماھل ءِ پیشانی ءَ بوسگے گِپت ءُ گْوشت ئِے، من بزان آں منی گْوھار شُمارا چے کار ھرچ داب ءَ کہ چار آں منی اِنت ۔ دْرستاں کند اِت ، سوالی چوناھیگا سرکاری اَپسرے اَت بلے وتی بازیں کار ءُ کسب ھست اِت اَنت ئِے ، سوالی ھوار چار بْرات اِت اَنت سے گْوھار اِت اَنت ، دْرستانی مستریں بْرات سوالی اَت لوگ ءِ مستر ھم سوالی اَت ، چَہ سوالی ءَ کستریں گوھار ءَ ھشت وَنتگ اَت پد ءَ سور کُتگ اَت ئِے سور ھم وتی دوستی ءَ کُتگ اَت ئِے بلے آئی ءِ انچیں رد ھیالیں مردے اَت نوں مُدام وت ماں وت نہ ٹھ اِت اَنت بلے آ گوھار ءِ مرد ءَ سوالی ءُ پت ءُ ماتانی لوگ ءَ سال ءِ سر ءَ یک روچے آؤرت پد ءَ بُرت بزان سال ءِ سر ءَ دیدار ئِے بوتگ اَت بس ، چَہ آ گوھار ءَ کستریں بْراتے جنگ ءَ نمیران بوتگ اَت سور کنگ ءَ چَہ پیسر نمیران بوتگیں بْرات ءَ چاردہ وَنتگ اَت بلے جاورانی نہ گیگی ءَ دیم ءَ وانت ئِے نہ کُت ، چَہ نمیران بوتگیں بْرات ءَ کستریں بْرات سوبان اَت کہ دو سال ءَ پیسر شال ءَ مزن شاہ دربرجاہ ءَ چَہ وتی کوٹی ءَ چِست کنگ بوتگ اَت انگت بیگواہ اَت ، سوبان ءِ سانگ ھم بوتگ اَت دِشتار ئِے ھم شال ءَ وانگ ءَ اَت، چَہ بیگواھیں بْرات ءَ کستریں بْرات ساھل اِنت کہ انوں شال ءَ چاردہ ءَ میڈیکل سائنس وانگ ءَ اِنت ، چَہ ساھل ءَ کستریں گوھار ماھل اِنت کہ انوں شال ءَ وانگ ءَ اِنت دوازدہ ءَ بلے شپ ءُ روچ ھمے دگانی سر ءَ کَپتگ پہ وتی بیگواھیں بْرات سوبان ءَ واہ ءُ زار ءَ اِنت ، چَہ ماھل ءَ کستریں گوھار سد گنج انت کہ سید دربرجاہ ءَ دہ ءِ تبک وانگ ءَ اِنت ، نو لوگ ءِ یک مردُمے کہ ساھتے چَہ چماں اندیم بوت پہ اے لوگ ءِ مردُماں کیامت بیت پمیشکا پاس ءُ دماں مات ءُ پت ساھل ءِ جُست ءَ کن اَنت کہ بدواہ بیگواہ ئِے مہ کن اَنت، سوالی ءَ ماھل ءَ پد ءَ گْوشت تو وتی دزگوھار ءَ سور دے بُرو شال ءَ کہ من اِش کُتگ مزیں زھرشانی یے بیگ ءَ اِنت پہ بیگواھیں مردُماں تو وت ءَ سر کن جلدی ، گوں اے گپ ءَ دْرستانی چم ارسیگ بوت اَنت ماھل ءَ وتی گُشان ءِ لَمب ءَ چَہ وتی ارس پھک کُت اَنت دیم گوں سوالی ءَ کُت گوں ارمانیں نگاھے چار اِت ئِے ءُ گْوشت ئِے لالا من الم وت ءَ زھرشانی ءَ سر کن آں من ءَ ھال اِش داتگ گْوشتگ اِش بْیا من گْوشت ھو من کایاں ، کمو بے تواری ءَ پد سوالی ءَ گْوشت نپاداں پچ کن اِت کہ شپ بے وھد اِنت من ءَ سُھب ءَ مھلہ روگی اِنت ، دْرست یک یک ءَ وتی وابجاھاں شُت اَنت ۔۔۔۔۔۔۔ روان اِنت ۔۔۔۔۔۔۔۔