ریڈیو زْرمبش بلوچی | ریڈیو زْرمبش بلوچی

پہ وتن شَیدائیں شھید ھالک جان ءِ رپتن ءِ روچ نبشتہ کار: باران بلوچ

پہ وتن شَیدائیں  شھید ھالک جان ءِ رپتن ءِ روچ  نبشتہ کار: باران بلوچ

NOV

22
22 / 11 / 2022 نبشتانک 64

دنیا ءِ تہ ءَ ھر وڑیں بنی آدم ودی بیت ھر بنی آدم یک کِردے ءِ واھُند بیت بلے لھتیں ھنچیں بنی آدم ھست کہ آ چہ دگنیا ءَ رکُست بنت بلے راجدپتر ءَ مُدام زندگ مان اَنت آ کدی وتی غلامی ءَ نہ منّ اَنت آ وان اَنت نبشتہ کن اَنت آ جنگ کن اَنت بلے وت ءَ کدی غلام نہ لیک اَنت پرچا کہ آ تھنا پہ وت نہ جیڑ اَنت ، آ وتی باندات ءُ ماتیں وتن ءِ آجوئی ءَ وت ءَ کُربان کَن اَنت آ ھما بنی آدم بنت کہ مَرگ ءَ پد ھم آ زندگ ءُ نمیران بنت۔۔۔ چہ ھماھاں یکّے شھید ھالک جان اِنت کہ آئی ءَ وتی سر پہ ماتیں وتن ءِ آجوئی ءَ ندر کُت شھید مولانا عبدلھالک کلمتی پلیری ءِ جھمنند اِنت آئی ءَ پنچ تبک ھمد ءَ پلیری ءَ ونتگ ءُ گیشیں وانگ ءَ کراچی ءَ شُتگ آئی ءَ اود ءَ مدرسہ ءَ ھالمی ونتگ ءُ سرجم کُتگ وانگ ءِ ھواری ءَ آ گوں آجوئی ءِ گَل ءَ گوں ھور بوتگ ماتیں وتن ءِ رکّینگ ءَ جُھد ئِے کُرتگ۔۔ شھید ھالک جان 14 ستمبر ءَ چہ پلیری ءَ بیگواہ کنگ بوت۔ روچ ءُ ماہ گْوزان اَت اَنت ھالک جان ءِ ودار ءِ راھسراں مُدام نشتگ ءُ ودار ءَ اِتاں کہ کدی واتر کیت پد ءَ وتی میتگ ءَ دُرست ھما وڑ باں ھما وشّی پد ءَ دوبر کایاں ھما سیل ءُ گردگ، ھما کندگ ءُ مسکرا ءُ ۔۔۔۔۔ بیگاہ ءَ مچھّی ئیں ڈگار ءِ دپ ءَ کرکٹ ءِ لیب ھمے وھد ءَ کہ ھالک جان میتگ ءَ اَت، گُڑا ھر سُھب ءُ بیگاہ کرکٹ لیب ئِے کُت ھالک جان ءِ بیگواھی ءَ پد کرکٹ لیب کنگ وتی جاہ ءَ لیب ءِ چارگ ھم یلدات گْونڈو وھدے دیست انت کہ لیب ءَ آں گُڑا آ ساھت ءَ ھالک جان سک گیر اتک۔۔۔۔ چم وداریگ اتاں کساس 67 روچ ھالک جان ءِ بیگواھی ءَ گْوستگ اَت مرچی کیت باندا کیت بلے ھِچ ھال ءُ توار ئِے نیست اَت چم راھچار اِت اَنت، نوزدہ نومبر ھم ھما دگہ روچانی داب ءَ گوْست کے ءَ زانت کہ باندا چی بیت دمانے واب کپتوں کہ نہ کپتوں کہ ملا ءِ بانگ ءِ توار ءَ گُڑ اِتان ءُ پاد اتک آں ، موبائل ءَ وھد چار ات ادار ! شش ءَ پانزداہ ملٹ کم اَت پد ءَ کمے سر ایر کُت ءُ پد ءَ پاد آتک ءُ نماز ءَ شُتاں بیست نومبر اَتوار ءِ روچ! من ءَ یات انت ھمے روچ سک نمب اَت من گِس ءَ انگت سر نہ اَتاں کہ اچانگ ءَ میتگ ءَ واہ ءُ زار مَچ اِت دل ءَ وڑ وڑیں ھیال چِست بیان بیت ، دل شھید ھالک جان ءَ شُت ھُدا مک اَنت ھالک جان ءَ چیز ے بُوتگ پرچا کہ واہ ءُ زار شھید ھالک جان ءِ گِس ءِ نیمگ ءَ اِت اَنت، من ھُشک ھُشک اِتاں نزانت کہ چون بہ کناں نرم نرم ءَجُنزان بیتاں ھمے ھال اَت کہ ھالک جان شھید کنگ ءُ پسنی ءَ لاش دَور دیگ بوتگ ، اے ھال ءَ پد گُش ئے میتگ ءَ پد ءَ شپ ءِ تھاری ءَ مانشانت کس کسیگی نہ اَت گُش ئے دُراھیں میتگ ءَ آس روک بوت ، ھالک جان کہ میتگ ءِ رُژن ءُ براہ اَت نوکی ھالک جان ءِ آروس ءِ تیاری بندات اَت بلے ھالک جان ءِ مھر گوں زمین ءَ اَت پیش آ پہ ماتیں زمین ءَ سالونک بوت۔۔۔۔۔۔ ھالک جان پہ وتن سالونک انت۔۔۔