ریڈیو زْرمبش بلوچی | ریڈیو زْرمبش بلوچی

ماھکانی ئیں شپے ات، گْوات لھم لھم ءَ  کشگ ءَ  ات ءُ من ھاسٹل ءِ  کوٹی ءِ  دپ ءَ  اوشتاتگ ات آن ءُ  گوں وتی ھیالانی میان ءَ  باریں چونیں جنگے ءَ  دستگّٹ اِتاں۔۔۔۔ شال ءِ  سارتی، سر ایّوب ءِ بائیولوجی(biology)ءِ  لِکّچر، ہاسٹل ءِ  بےلزّتیں ورگ ءُ  ماھو ءِ  ڈولیں ارواہ ءَ گوں دیوان من ءَ سک دوست اِت انت۔۔۔۔ من گوں وت ءَ سرجمی ءَ ملمہ ات آں کہ انگت ءَ ماھو ءَ  من ءَ توار پِرجت! من گوں وتی مان گیش اتگیں ھیالاں  کوٹی ءَ  شُتاں گوں ارواہ ِ کندگ ءُ مسکّرہ ءَ  سیِر کنگ ءَ  پد من ءَ یات اتک کہ physics ءِ assignment ھم منی منتگ ات اَنت، گڑا من پاد اتکان ءُ  اے ریاضی ءُ  physics  ءِ  سْیادی ءِ نیام ءَ وت ءَ ھم ھور کُت، ساھتے ءَ پد پُشت ءُ  گردن ءِ  درد کہ چہ سگّگ ءَ  ڈن بوت انت ءُ من سر چست کُت ءُ  وتی کِر ءُ  کش ءَ  چارِت گڑاں من پھک ھیران بوتان ءُ  وتی چم پہ مبائل(mobile) ءَ شانک دات انت داں دیست 3:30 اِنت ءُ  ھرکس وتی وابانی تہ ءَ باریں چے چے واب گندگ ءَ  ات اَنت، کدی چہ 11:00 ءَ  3:30 کلاک بوت من سرپد نہ بوتاں، اے زمستانی شپ گش ئے چو (10) دہ سالیگیں زوراک ءِ  دست ءَ لگْوَشتَگیں بےوسیں مردمے ءِ ڈولا  بے سما ءَ  تچگ ءَ  اِنت، من پاد اتکاں کوٹی ءِ  دروازگ پچ کُت ءُ  ڈن ءَ  شُتاں،،ھاسٹل سرجم ءَ  بےترک ءُ توار ات ءُ  شال ءِ  اے سارتیں گْوات گشیگہ من ءَ کُلوھے  دیگ لوٹگ ءَ  ات بلے من پھک آئی ءِ گمان نہ کُت  ءُ  واب انچو منی دیدگاں  چے پھک شموشکار ات ءُ  ایوکی ءِ سوگنِد وارتگ کہ من ءَ ایوک ءَ  کدی ھم یل نہ کنت ، آرام نئیت داں من باریں پہ کے ءَ  ءُ  چے ءَ چو تلوساں گوں ھمے جیڑگ ءَ  من کوٹی ءِ  تہ ءَ شُتاں، دریگے  دپ ءَ  کُرشی جت، چہ ترماس ءَ  یک پیالھے  سْیاہ چاہ ایِر رِیتک ءُ چہ وتی دراز ءِ توک ءَ سیما  سگریٹے  در کُت۔۔۔۔۔ اے ھبر ءَ کس سرپد نہ ات کہ من سیما سگریٹ کش اں بید چہ ماھو ءَ  ءُ  ماھو ءَ  من ءَ مدام گْشت کہ تو چے ءَ سگریٹ کَش ئے، تو جَنین چُکے ءِ ءُ  اے چیز ترا ھچ زیب نہ دنت ءُ  منی مدام یکیں پسو ات کہ ماھو اے ھبر ءَ  بِل۔۔۔۔۔۔۔ من سگریٹ بُن دات، سْیاہ چاہ  زرت ءُ  دریگ ءِ  دپ ءِ  کُرشی ءِ  سر ءَ نِشتاں،، من ءَ گوں تَھاری، سیاہ چاہ، سیما سگریٹ ءُ  ایوکی ءَ  گوں مھر ات یا اے وڑ ھم گْشت کناں کہ ایوکی ءَ  من ءَ پھک بےوس کُتگ ات ءُ  پہ زور گوں وت ءَ  مھر پرمَاتگ ات۔۔۔۔ من یک ھبرے کدی ھم پھم ات نہ کُت کہ من مدام شپ ءِ  4 کلاک ءُ  10 منٹ ءَ  گوں بُن داتگیں سگریٹ ءُ  پیالھے  سیاہ چاہ ءَ من شپ ءَ  دریگ ءَ چے سر کش آن ءُ  بام ءِ  امیت ءَ  کئی راھچار بیاں۔۔؟ منی کوٹی ءِ  جنکاں من ءَ مدام گوں ھبکھی دیدگاں پُول کُت کہ تو پرچا اِنچو سیاہ چاہ ور ئے پھک سیاہ تریتگ ئے اِنچو سیاہ چاہ ءِ  نوشگ ءَ  نوں من چے بُگشاں کہ من ءَ سیاہ چاہ ءِ پیالہ ءِ تہ ءَ  کئی جُھلیں بچکند ءُ  آکس گندگ کیت گڑا من بس مدام ھمے پسؤ دات کہ اے ھبر گشگ نہ بیت ءُ  منی مھراں گوں سیاہ چاہ ءَ  ھرکس پھم ات نہ کنت۔۔۔۔ گوں ترماس ءِ  چاھانی ھلاسی ءَ  من دیست دانکہ دریگ ءَ چے ڈن روچ ءِ برانز زمین ءَ ایر کپان اَنت ءُ ، من ءَ یات اتک کہ باندا  (academy) ءِ  کلاس ءَ  ھم روگی اِنت گڑا من پاد اتکاں ءُ  سگریٹ ءِ بنُڈوکاں  نَزارگ  بندات کُت ھشّت سگریٹ ءِ  بُنڈوک من ءَ دست کپت۔۔۔۔۔!! مرچی گش ئے سگریٹ ءِ  مھر گوں من ءَ چہ پیسریگناں گیشتِر بوتگ َات ءُ  من سگریٹ ءِ  لُنٹ چو بیست سالی نوک سُوریں آشکیں  بچکے ءِ وڑ ءَ گوں دل ءِ سیر ءَ بوسگ ات اَنت، منی دل انگت ءَ چو یک کلمانٹے ءِ پیم ءَ سیما سگریٹ ءِ زپتیں لُنٹاں لوٹگ ءَ  ات بلے منی دل چو یک نادانیں تپّلے ءِ  وڈ ءَ لیس ءُ  لَباس کُت ءُ  وتی نپاد ءِ  سر ءَ دراج بوت آن ءُ  چم بند کُت انت کہ زوت گوں واب ءَ  دوچار بہ کپاں بلے واب چماں دور من گار کتگ ات، منی آگھی باریں کے ءَ  چو بیراں کتگ ات۔ چشیں کس ءَ بھتام نہ جتگ ات کہ ھرکش ءَ  بہ لیٹان ءُ  مباں آرام ، من سُچاں گوں وت ءَ مدام سدبر جُشاں ءُ  انگر باں اے کئی گماں کہ من ءَ دوزہ ءَ  چو پیشدار انت ؟ گوں جیڑگ ءَ  باریں کدی منی چم بند بوت انت ءُ  من دیست کہ یک بارگیں جَنکے گوں پیروزہ رنگیں پشک ءَ  آپ ءَ  مِین کتگیں بلوچی چادرے مان پوش اتگ ات ئِے ءُ  گوں شنگیں ملگوراں سک ڈولدار اَت بلے من پھک ھیراں بوت آں کہ اے زمستاں ءَ  اے چے ءَ چو آپ ءَ تَر اِنت انچو سما بوت کہ آس کپتگ آئی ءِ دامن ءَ  ءُ کسے ءِ  ترانگ ءَ زمزیل آئی ءِ گُٹّ ءَ لوپ اِنت، اے شررنگیں ءُ  ڈولداریں جَنک کُوکار ءُ  زار جنگ ءَ  ات کہ چوں وتی گمانی داماں بہ پیچان ءُ کئی دیم ءَ  دل ءِ ارساں بہ ریچاں بلے آئی ءِ توار ءَ  کس اِش کنگ ءَ  نہ ات بید ءِ چہ من ءَ  بلے من ھچ کُت نہ کُت پہ اے بےوسیں جَنک ءَ ،،اے شوکیں جَنک منی دیداگانی دیم ءَ پُروشگ ءَ  ات چہ وتی زند ءَ  دست پارِگ بوگ ءَ  ات بلے من ھچ کُت نہ کُت ءُ  ساھتے ءَ  پد گش ئے زمین ءِ  دپ پچ بوت ءُ  من ایِر شُت آں وھدے منی ھردوکیں چمانی دیم ءَ اے جنک ءَ  وت ءَ  سادے  گٹّ ءَ مان پتات ءُ  گوں ارسیگیں دیدگاں ءُ جھلیں بچکندگاں وت ءَ  گوں ھاسٹل ءِ  زنگی ئیں پنکاہ ءَ  درتک ءُ  وت ءَ  چہ زندے گماں آجو کُت ءُ  چہ دُنیا ءِ  سمسیراں آ دیم بوت، من باز کوشسِت  کُت، باز گریت پریات کُت ءُ  گشت کہ مکن چُش بلے آئی ءِ چم پھک بند ات انت ءُ  منی توار آئی ءِ گوشاں نہ کپت،، من پھک ھُشک تر اِتاں بلے اے شوکیں جنک گشے نوں گیشتر  زیبدار ات ءُ  انچو گوں بچکندگ ءَ  ساد ءَ آئیءِ جون   درتکگ ات پورہ سر ئِے  وتی مکھیں مات ءِ  زانسراں ایِر ات ءُ  واب ات، من لوٹ اِت کہ من وتی کش ءِ  مردماں بُگشاں سرپدی بہ دیاں کہ چونیں شوکیں ءُ  زیبداریں جنکے ءَ  منی چمانی دیم ءَ وت ءَ ساد ئِے گُٹّ ءَ  دات ءُ  درتک بلے من ھچ گشت نہ کُت، ھچ کس ءَ گوماں ھبر کُت نہ کُت۔۔۔۔ آشوک۔۔۔ آشوک۔۔۔۔۔۔ کسے من ءَ توار کنگ ءَ  ات من پچ لرزتاں داں چاراں ماھو منی پلنگ ءِ  کش ءَ  اوشتاتگ ءُ  سک تکانسر اِنت۔۔۔۔۔۔۔۔۔۔۔