ریڈیو زْرمبش بلوچی | ریڈیو زْرمبش بلوچی

نمدی یے پہ شھید سنا جان سوگات ءَ نبشتہ کار ۔ ناکو ھسار بلوچ

نمدی یے پہ شھید سنا جان سوگات ءَ   نبشتہ کار ۔ ناکو ھسار بلوچ

NOV

23
23 / 11 / 2021 نبشتانک 70

پھل کن سنا جان! بلکیں تو دلگران ئے اَچ من کہ پہ من نمدی یے راھی نہ کنت ءُ گُلزمین ءُ سنگتانی ھال ءَ نہ دنت۔ گپے زان ئے سنا جان! من کدی نہ گْوشاں کہ تو اَچ ما گسر بوتگ ئے،من ھر وھد ءَ ھمے ماراں کہ تو گوما گون ئے، بلکیں سنا جان! تو دل ءَ ھمے جیڑ ئے کہ باریں منی سنگت ءَ راہ ءِ نیم ءَ دمبرتگ یا انگت پہ منزل ءَ سپر کنگ ءَ اِنت یاکہ چہ بیھال اِنت، بلے اے چیز ءَ ھِچ مہ جیڑ ءُ وت ءَ تکانسر مہ کن من وتی ءُ تئی واھشت ءَ الّم سرجم ءَ کناں،منی پگر اے روڑانی سر ءَ گونڈواں کہ کُنر بھا کن اَنت ایشاں انچش مُھکم کتگ کہ مال ءَ مالیں بلوچستان ءِ زھگ نشتگ اَنت روڑانی سر ءَ کُنر بھا کن اَنت،گُڑا یار پہ ما بلوچاں چی پشت کپتگ،ما انگت گُلامی ءَ بہ منّ ایں مارا واجھیں ھُدا لانت کنت بنی آدم ءَ بِل! بلے سنا جان! دگہ ھالے ھم ترا دیاں تئی دوستیگیں سنگت میراس ءَ وتی ھَک پیلو کُت گُل زمین ءِ میار بوت،میراس ءَ مُدام ترا نازینت ءُ من گوشداشت تئی بازیں سنگتے ءَ وتی ھک پیلو کُتگ ءُ گُل زمین ءِ میار بوتگ اَنت۔ بہ گند ئے شُما اود ءَ وت درس یکجاہ اِت، پُلانی ساھگ ءَ نشتگ اِت ءُ مئے ودار ءَ کنگ ءَ اِت، چم شُمئے راھیگ اَنت کہ کدی مئے سنگتے ءَ مئے چم کپ اَنت ءُ مارا گُل زمین ءُ سنگتانی ھال ءَ دنت بلے نوں منی دل ءِ سر ءَ اے گپ ایر اَت دل ءَ گْوشت ترا ھال بہ دیاں بہ گندئے چیزے وھد ءَ پد من وت آتکان ءُ پُلانی ساھگ ءَ گوں شُما ھم دیوان بوتاں،چے ءَ کہ من ءَ پہ ماما بُگٹی ءَ ھم سک زھیر کنت وھدے ماما شُمئے دیوان ءَ کیت ماما ءَ منی سلاماں بہ دئے۔ سنا جان! تئی گُڈّی دیدار ءَ من پمشکا گون نہ کپت آں چے ءَ کہ من دمگ ءَ ساڑی نہ اِت آں۔ پیسری روچ ءَ ھور بوتگ اَت شپ ءَ سنگتاں شور کُت کہ سُھب ءَ رو ایں گرد ایں ما چار پنچ سنگت درتک ءُ سیل ءَ رھادگ بوت ایں مئے سر سیاجی ءَ کپت سیاجی ءِ مزنیں بند ءِ سر ءَ اے روچ ءَ ھم جمبر اَت من وتی گوانکو پَچ کُت کہ لوگ ءَ ھالے کناں بلے منی سیم بند اَت نٹورک آرگ ءَ نہ اَت سِم ءِ ھُدا بُند ءَ بند کُتگ اَت منی سِم گُڑا سنگتے ءَ وتی گوانکو من ءَ دات ءُ من کہ لوگ ءَ پون کُت داں شُور شار اِنت من جُست گپت اَنت کہ شُمے گور ءَ شُور شار اِنت زاناں کُجا اِت من اِش پَسّہ دات کہ تو زاناں سھیگ نہ ئے من گُشت اناں پَسّہ اِش دات کہ سنا جان مرچی شھید بیتگ ءُ ما آورتگ گوادر ءَ ما گوادر ءَ ایں۔ سنا جان من کمو تکانسر بوتاں بلے من ءَ تئی گپ یات آتک تو گوشتگ اَت کہ پہ شھیداں ارس گوارگی نہ اِنت۔شھیدانی جُنز دیم ءَ برگی اِنت ءُ شھیدانی ارواہ ءَ بکشگی اِنت۔ من انگت سنگت ھال نہ داتگ اِت اَنت ءُ من یک نیمگے گپ ءَ اِت آں کہ سنگتے ءِ توار آتک کہ سنا گوں دو سنگت ءَ شھید کنگ بیتگ آ دگہ سنگتاں ھال دیگ ءَ اَت۔ جمبر ھم سیاہ تر اِتگ اَت سنگتاں من ءَ توار کُت کہ ھال کن گپ ھلاس نہ کُتگ رو ایں مارا اد ءَ اے سیاجی ٹُلّ ءَ ھور بہ گیپت بزّگ کنت۔گوں سنگت ءِ گپّ ءَ ترمپاں رچگ بندات کُت ما دلمانگ اِت ایں پہ ایرایگ ءَ رگاماں ھم ایردات ما ھمے مزنیں سیاجی ءِ ٹُل ءِ سر ءَ تلمبے ءِ چیر ءَ پُترت ءُ ساہ داشت۔ سھتے ءَ پد ھور تَم اِت ما ایرتک ءُ رھادگ بوتیں پہ اوتاگ ءَ آ وھد ءَ دیر اِنت، نوں من بیھالاں کہ چے وھد اَت پد ءَ اوتاگ ءَ سربیت ایں بلے پمشکا من تئی گُڈی دیدار ءَ اَتک نہ بوتاں بلکیں تو بہ گْوش ئے کہ سنگت منی گُڈی دیدار ءَ ھم نیاتک کہ من بچار اِت ایں ھیر سنا جان گپ باز اَنت دل اوں نہ گُش ایت کہ بس کن بلے من ءَ سنگتے ءَ ھم لوٹ اِتگ کہ بیا من ءَ جاھے روگی اِنت پد ءَ شپ ءَ کائیں دو بئیں سپر وشتر بیت نوں من تیاری کناں کہ سنگت پد ءَ گْوش ایت تو پرچہ دیر کُتگ گُڑا من ترا موکل کناں!!! تئی سنگت ناکو ھسار بلوچ