ریڈیو زْرمبش بلوچی | ریڈیو زْرمبش بلوچی

راجدپتر نبشتہ کار: ڈاکٹر نوکاپ بلوچ

راجدپتر   نبشتہ کار: ڈاکٹر نوکاپ بلوچ

SEP

05
05 / 09 / 2021 نبشتانک 102

پہ وتی زانگ ءُ پجّارگ ءَ اے مارا شُمارا کُلّاناں زانگ لوٹ اِیت کہ راجدپتر چہ مرگ ءَ پد کَے ءَ ، ءُ کُجام بنی آدم ءَ یات کنت۔  پمیشکا اے سک ءَ ھژدری ئیں جُستے کہ من  شُمئے دیم ءَ اِیرے کنگ ءَ آں۔ چی ءَ کہ تو وھدے اے جُست ءِ پسُو ءُ مُول ءُ مُراد ءَ زان ئے، گُڑا تو وتی زِندمان ءُ زندگ بُوَگ ءِ راستیں مانا ءُ مکسد ءَ پوہ ءُ سرپد بَہ ئے کہ من ءَ وتی زِندگی کُجام وڑ ءُ ڈول ءَ گْوازینگی اِنت۔ وھدے تو وتی زندگی ءِ اسل مکسد ءَ کہ بلد ءُ سرپد بوت ئے ، گُڑا تو الم پہ وت زیبائیں منزلے گچین کن ئے ءُ ھما پاند ءَ پند بُرّے ءُ سپر کن ئے داں آپسرے ءَ سر بِہ بَہ ئے۔  ھمے رنگ ءَ تو وھدے جھانی راجدپتر ءَ وان ئے ءُ چارے ، گُڑا اُود ءَ ترا اے کوڑھیں گیدی ءِ تہ ءَ بے کِساس اِنسان ھست ءُ گندگءَ کَیت کہ آ اَبدمان اَنت۔ بلے راجدپتر ءِ تہ ءَ ترا لھتیں انچیں تمردیں سرانی نام نبشتگ گِندگ ءَ کَیت کہ آ چیدگ ءُ ھر راجانی اندر ءَ پدّر ءُ سھرا اَنت ، بلے اے لکّاں اِنسانانی تہ ءَ لھتیں پرچا۔۔۔۔۔۔؟ لھتیں اِنسان پرے ھاتِر ءَ کہ ھر یکّے وتی زاتی واھگ ءُ واھِشتاں پہ لس مھلوک ءِ پائدگ ءُ وشھالی ءِ واستا ببا دات نہ کنت ، چی ءَ کہ اے کارِست ءِ پیلو کنگ ھر کسی وس ءُ واک ءَ نہ اِنت کہ وتارا راجدپتر ءِ تاکانی تہ ءَ وژنام ءُ نمیران بِہ کنت ، بلکیں اے ابدمانیں کارِست ءَ ھما تمردیں سر پیلو کن اَنت کہ آ وتی زاتی واھگ ، ھیش ءُ نوشاں ، زِرد اِیمنیں آسراتیاں ، ھاندان ءِ وشّی ءُ وشھالیاں ، بے نپّیں ادارُکی سیت ءُ نپّاں کُربان کن اَنت پہ اجتماعی یا دائِمی ئیں راجی آکبت ءِ واستا دانکہ آیوکیں پدریچ پہ اِیمنی زِندے بِہ گْوازینیت۔ دُگنیا ءِ 100 مزنیں انسان hundred personalities ءِ کتاب ءِ نبشتہ کار  ءُ گْوستانک ( تاریخ نویس ) نویس واجہ مائیکل ایچ ھارٹ  ھما تمردیں متاثر کنوکیں  اِنسانانی بابت ءَ نبشتہ کنت کہ آیاں ھما کار کُرتگ اَنت کہ دگہ کسے ءَ کُرت  نہ کُتگ اَنت ، پمیشکا مرچی بامردیں سر یات کنگ ءُ گیر آرگ بَہ اَنت۔ پرے ھاتِر ءَ مرچی دُگنیا ءِ راجدپتر  ڈاکٹر چے ، نیلسن منڈیلا ، بگھت سِنگ ءُ دگہ بازیں راجی جھد کاراں یات کنت کہ آیاں اِنسانیت ءِ شرپ ، راجی آجوئی ءُ رُوژنائیں باندات ءِ ھاتِر ءَ بے مٹّیں کار کُتگ ءُ دیمونی داتگ۔   بیا اِت ما شُما وتی راجدپتر ، بزاں بلوچ راجدپتر ءِ تہ ءَ ھما تمردیں سراں شوھاز کن اِیں کہ آ بے دروراں انچیں کارست یا انچیں جھد کُتگ کہ آیانی داتگیں کُربانی مئے دیم ءَ زاھر اَنت۔ پمیشکا مرچی مئے راج ءُ بلوچ راجدپتر ھمایاں گیر کار اِیت ساڑا اِیت کہ آیاں وتی ھیشی ئیں سر پہ وتی راج  ءُ بے بھائیں گُلزمین ، پہ آیوکیں پدریچ ءِ ھاتِر ءَ ندْر کُرتگ اَنت۔ چوش کہ مرچی بلوچ راج ءُ ماتیں گُلزمین ءِ نام ءِ گِروگ باز اَنت، بلے ھمے گُلزمین ءِ نام گِروکانی لڑ ءِ تہ ءَ ھما راج دُزّ ءُ راج دژمن ھم ھور اَنت کہ راج ءِ نام ءِ سر ءَ چو پِنڈُوکیں پکیر ءَ کچکول بڈّ ءَ ءُ پہ وتی کھول ءِ وشھالی ءَ سیاست کنگ ءَ اَنت ءُ وت ءَ راجدوست گْوش اَنت ، بلے ھمے پِنڈُوکیں پکیر پہ وتی ادارُکی ھیش ءُ نوش ، گل ءُ وشّیانی ھاتِر ءَ گھیں راج ءُ پُلیں ڈیھ ءِ سودا ءَ گوں دُژمِن ءُ آھِگی دری شریکّانی ھمراھی ءَ جَنَگ ءَ اَنت۔ بلے! راجی جُھد ءُ جنگ ءِ تہ ءَ ھما گوھر ءُ تمردیں سر گون اَنت کہ آ وتی راج ءُ ماتیں سرڈگار ءِ رکّینگ ءَ ھِچ پیم ءَ چک ءُ پد نہ بَہ اَنت۔ مرچیگیں راجدپتر نویس ءُ نبشتہ کار ، مئے راج ءِ یلیں ورنا دُژمِن ءِ کُشت ءُ کوش ، آوار جَنَگ ءُ زِندانی کنگ ءَ ابید پہ مڑاہ ءُ شان شھید پِدا بلوچ ، نواب ھیربکش مری ، شھید واجہ گُلام مھمد، شھید ڈاکٹر منّان جان ، شھید اکبر ھان ، شھید مھراب ھان ، شھید رزا جھانگیر ، شھید اُستاد جنرل اسلم بلوچ ءُ اے دگہ ھزاراں شھید ءُ پہ ماتیں وتن ءَ کولیگ بوتگیں جھدکاراں یات کن اَنت۔ ءُ ھمے رنگ ءَ بیگواھیں چیئرمین زاھد بلوچ ، چیئرمین زاکر مجید بلوچ ءُ اے دِگہ زِندانی ئیں سراں گیر کار اَنت کہ آ انگت دُژمِن ءِ تھاریں کُوٹِیاں بندیگ ءُ وتی راجی آجوئی ءِ دزگِرگ ءَ وڑ وڑیں ٹارچر ءُ زُلمانی دیمپان اَنت۔ بلے آیوکیں پدریچ ءُ راجدپتر نویس، نبشتہ کار کہ وھدے نبشتہ کن اَنت ، گُڑا آئی ند ءِ زُبان ءُ دپتر ءِ تاکانی تہ ءَ  ھما سر نبشتگ بَہ اَنت کہ پہ وتن دیوانگ ءُ گْراں بهائیں سر اِش بکشاتگ اَنت۔ بیا اِت ما شُما ھما دیمونی دیوکیں لڑ ءَ ھوار بَہ اِیں کہ باندات ءِ راجدپتر نویس مارا ھم نبشتگ بِہ کنت راجی راجدپتر ءِ ابدمان ءُ چیدگیں بھر جوڑ بِہ بَہ اِیں ، اگاں نا راجدپتر ھمایاں پہ مُدامی یات کنت ءُ گیر کار اِیت کہ آ پہ گُلیں راج ءُ ماتیں وتن ءِ پھازگ ءَ کولیگ بَہ اَنت۔