ریڈیو زْرمبش بلوچی | ریڈیو زْرمبش بلوچی

شھید تاج بی بی ءِ نام ءَ نمدی یے-  نیاز ناز بلوچ

شھید تاج بی بی ءِ نام ءَ نمدی یے-  نیاز ناز بلوچ

SEP

25
25 / 09 / 2021 نبشتانک 171

دروت تاج بی بی من زیکیں بیگہ ءَ پیسر تئی نام اش نہ کتگ ات ءُ ترا نہ زانتگ ات بلئے نوں ترا زاناں نوں تنھا من نا تیوگیں بلوچستاں ترا زانت ترا پجہ کاریت، تئی نام ءَ گیپت، ترا یات کنت ءُ راج دپتر ءِ تاکاں تئی نام گوں سھرچکیں ھونان نبشتہ کنگ بیت۔۔۔۔۔۔۔ تاج بی بی! بوت کنت ترا چہ ھوناں ترس اتگ، بوت کنت ترا چہ کبر ءَ ترس اتگ، بوت کنت ترا چہ کپن ءَ ترس اتگ ءُ اے ھم بوت کنت کہ ترا چہ میتی گوانزگ ءَ ترس اتگ۔۔۔۔۔۔ بلئے مرچی من دل ءَ سدکان ءُ اے ھبر ءَ پہ شانے گشاں کہ ترا چہ وتی لوگ ءِ پشت ءِ اوشتوکیں دری زبان ءَ ھبر کنوکیں سپاھی ءُ آئی ءِ توپک ءَ چہ نہ ترس اتگ بلکیں ھما دری زبان ءَ ھبر کنوکیں سپاھی ءَ اچ ترا بیم اتکگ۔۔۔۔۔۔۔۔ تاج بی بی! تو بلکیں نہ زانتگ تو بلکیں سرپد نہ بوتگ ئے بلئے مرچی من ترا ھال دیگ لوٹاں کہ تو سکیں سیر ءُ ازگاریں زالے بوتگ ئے، تاج بی بی تو پُر گنجیں زمینی ءِ واھُند بوتگ ئے، تئی زمین ءَ دگنیائے گران نھاد تریں مڈی ھست اَنت، تاج بی بی! مروچی اے گپ ءَ بزاں کہ تئی زمین ءَ ھما مڈی ھست اَنت کہ تو آھانی بابت ءَ بلکیں جیڑ ات نہ کتگ  سھر ، چاندی، سنگِ مرمر، اشکر، تیل ، زر ءُ دگہ باز۔۔۔۔۔۔ تاج بی بی تو اے ھبر زانتگ کہ اے گیس کہ بازاراں رسیت اے تئی اِنت؟ تئی زمین ءَ در کیت؟ تاج بی بی! بلکیں منی نمدی ترا سر بہ بیت ءُ نمدی ءَ پد تو پدا منا جست بکن ءِ کہ گڑا من پہ سرے دار ءَ چیا شل سریں تیرانی آماچ کنگ بوتاں، اے گیس کہ منیگ ات گڑا پرچہ منی چمانی اونڈال ببری دارانی ھپ کنگ ءَ شتگ اتاں؟ بوت کنت کہ نمدی ءَ پد پدا من تئی پسو ءَ دات مہ کنان پمیشکہ نمدی ءِ توک ءَ نبشتھے کنان، ترا سک باز بوتگ ءُ اشانی ھوری ءَ دراجیں زمین ئے ھم تئی بوتگ بلئے اے دراہ ایردستی ءَ اچ تو پل اتگاں ءُ تئی بزگی، تئی بیوسی اے کل ایردستی ءِ داد اَنت۔ تاج بی بی! ما پہ ترا ھچ نہ کنیں، بس دو ترمپ ارس ریچیں، وتی وٹسپ آنی پروپائل ءَ مٹ کنیں، دو روچ ءَ پیسبک ءَ سرا زوریں، سے روچ ءَ تئی پرس ءَ داریں، ھپتگے کوکار وائی، جاک ءُ سلوات ءُ روانک کشیں ءُ پدا ترا شموشیں نندیں ءُ وتی باریگ ءِ ودار ءَ کنیں۔ تاج بی بی! نمدی ءَ لک کنان کہ بوت کنت تئی کرا پہ وانگ ءُ گوشدارگ ءَ بازیں وھد مہ بیت۔ ھیات ءَ، ملک ناز ءَ، کلثوم ءَ،  کریمہ ءَ، شائینہ شاھین ءُ پہ زمین ءَ ندر بوتگیں ھمک پسگ ءَ اے نابود ءِ سلاماں بہ رسیں گوں ءُ بگش اے لڑ شمارا چہ پد بند نہ بوتگ اے دْرچ کشیں لڑے بس کس ئے پد ءُ کسے پیش اِنت !!!!