ریڈیو زْرمبش بلوچی | ریڈیو زْرمبش بلوچی

اے دنیا ءِ تھ ءَ برے برے مردم انچیں مردماں گوں دُچار کپ ایت ءُ ھمسپر بیت مردم ءَ را ھچ باور نہ بیت بلے باور کنگی انِت۔ مرچی من یک انچیں ورنایں گونڈلے ءِ کسہ ءَ نبشتہ کنگ ءَ آں کہ اے ورنا انچیں منلگ ءُ دیوانگے ات ءُ انچیں مھروان ءُ دلیریں ورنایے ات کہ ھرچی بُگش ئے کم اِنت۔ چوناھا اے ورنا من پارٹی ءَ چے پیسر دیستگ ات بلے آ کساس ءَ من گوں اے ورنا ءَ نزیک نہ ات آں۔۔

وھد ءُ جاور بدل بوت اَنت،مئے ھند ءُ دمگاناں ھم آجوئی ءِ جَنگ ءَ شرپے دات گوں ما ھم ھمے جنگ ءَ وڑے نہ وڑے ءَ گون کپت ایں گوں۔۔۔ یک روچے من ءَ سنگتے ءَ جُست کُت کہ تو گنّی ءَ زان ئے۔؟ سیٹ جان مھمد ء چُک اِنت ھیرونک ءَ نشتگ، من گُشت ھو اے گنوک ءَ کے نہ زانت۔ زاناں چے کُتگ ئِے؟ سنگت ءَ گُشت کہ ھچّ نہ کُتگ ئِے اے پارٹی ءَ آیگ لوٹ ایت۔ من گُشت اے و شریں اے وڑیں گنوکے کہ بیت مئے دست ءَ بہ کپیت مئے بازیں کارے آسان بیت۔ سنگت ءَ گُشت شر گُڑا من ھال ءُ اھوال ئِے کن آں ءُ کم کم ءَ کار ئِے گِراں باں۔ وھد ءُ جاور چَکرّان بوت اَنت یک شپے ما چو مُساپرے ءَ در کپت ایں ھیرونک ءَ چے مار ءَ گوزگی ءُ دیم ءَ روگی ات۔ شپ ءَ ما شھید گنّی ءَ ھال کُت ءُ گُشت کہ تو برو پِلاں جاہ ءَ راہ ءَ بچار گوں ما چو ھمے راہ ءَ گوزگی ایں ( کوہ ءِ تھی راھے ات) شھید گنّی ءَ گُشت بس بے پکر بہ ئے من رو آں شُما ھچ پریشان مہ بہ ئے۔

ما ھم سپر بندات کُت جنزان جنزان ما ھیرونک ءِ کہ نزیک ءَ سر بوت ایں داں بلاھیں کوھے ءِ سر ءَ لیٹُکے در ءَ بوگ ءَ اِنت، ما سنگتاں چو گئش اینت نہ کُت یک سنگتے ءَ گُشت استالے یک سنگتے ءَ گُشت لیٹے یک سنگتے ءَ گُشت کہ پوج انِت مئے راہ اش بستگ ما ھمے گڑ ءُ منجانی تھ ءَ ات ایں کہ شھید ءَ مئے گپ ءُ ھبر اُشکُت َنت مارا گوں زوراں توار جنگ ءَ ات کہ بیا ات من آں گنّی۔۔۔۔

ما اتک ایں شھید ھم کوہ ءَ چے ایر کپت ءُ آتک ما گُشت ھاں تو اد ءَ ؟ گُشت ئِے من شُمئے واستا ورگ آرؤتگ من گُشتگ کہ شُما سپر ءَ ئے گژنگ بہ اِت ھمد ءَ ما کمو نشت ایں دیوان ءُ ھبر بوت ءُ پد ءَ ما شھید ءَ را رزا دات ءُ ما ھم پہ سپر ءَ راھی بوت ایں۔۔۔ یک روچے الاکھی مسلھے ءَ ما اتکگ ات ایں الاکہ ءِ نزیک ءَ ما شھید گنّی ءَ ھم ھال کُت کہ بیا ترا گند ایں دیوان ءُ ھالے کن ایں شھید ءَ لھتیں سامان زُرت ءُ اتک مے کرّ ءَ نشت۔ ما ھمے مسلہ والا مرد ءَ را ھال کُت کہ بیا ما ترا گندگ لوٹ ایں مرد ءَ گُشت کہ من دست گٹ آں من ءَ مرچی آیگ نہ بیت۔

ھمد ءَ شھید گنّی ءَ گُشت کہ مرد ءِ پِت کیت مرد چون نئیت وتاس ءَ من ءَ دے من انوں رواں مرد ءَ زوراں کایاں مرد ءَ مردم نہ دیستگ مرد چو تیار نہ اِنت کہ پارٹی مہ منّ ایت۔ ھمد ءَ ما شھید ءَ را گُشت کہ اے چُشیں بلاھیں مسلھے نہ اِنت بلّے اے مسلہ پہ پون ھل بیت مرد ءَ را پون کن آں مردمانی مسلہ ءَ گیشین ایں۔۔۔ ھر وھد ءَ سنگتاں گوں ھال بوت یا نہ بوت۔ ھرچی کہ سنگتانی زلورتی سامان ات اَنت، شھید ءَ زُرت اَنت ءُ ٹھکانیانی سر ءَ ایر کُت اَنت ءُ پد ءَ ھر وھد ءَ گوں سنگتاں کہ ھال بوت شھید ءَ گُشت شُمئے پِلاں ٹھکانہ ءَ پِلاں سامان ایر اَنت۔۔۔

شھید وتی تیوگیں کارانی سر ءَ زمہ دار ءُ ایماندار ات ،ھر کارے کہ پارٹی ءَ پرماتگ ات۔ من ھر وھد ءَ شھید ءَ را دیست آستونکانی تُمگّے پچ اتاں پشکے پراہ ات۔ چو دیوانگ ءَ ات۔ من ھر وھد ءَ شھید ءَ را گنوک توار کُت برے برے من جیڑ ات ءُ گُشت گند ئے مئے جنگ ءِ تھ ءَ کُلیں سنگت ھمے وڑیں دیوانگ ءُ ملنگ بوتین انت، گُڑا جنگ وش بوتگ ات۔ ایشی ءِ بچار نہ دگہ مسلھے نہ جیڑھے نہ دگہ گوں سنگتے ءَ کست ءُ کینگے نہ گلگ ءُ زاری یے بس ھرچی کہ ھست اَت ءُ ھرچی کہ جیڑ ایت پہ دژمناں۔۔۔۔

بلے یک چیزے من ءَ سک ءَ اپسوز بیت آ ایش اِنت کہ گوں شھید گنّی ءَ من ءَ اینچو وھد گوانزگی ات وھد ءَ شھید گنّی ءَ اینچو موکل نہ دات کہ گوما اینچو وھد بہ گوازین ایت شھید گنّی پیسر ءَ زالمیں دژمناں شھید کُت۔۔۔۔۔

16/6/2023مکُران بلوچستان