ریڈیو زْرمبش بلوچی | ریڈیو زْرمبش بلوچی

من کازی وتی اَھد ءِ درامد باریں منی باریگ کُجا اِنت بلوچی زُبان ءِ مزن نامیں شائِر ءُ کواس، سسّائیں زبانزانت واجہ مبارک کازی یک بلاھیں اِنسانے اَت، پمیشکا آئی بیران بُوَگ پہ بلوچ راج ءَ یک مزنیں تاوانے ءُ آئی ھورکیں جاہ داں کرناں ھالیگ مان اِیت۔ ھمے رنگ ءَ واجہ مبارک کازی یک ملنگ تَبیں اَنسانے اَت، آئی اِلم ءُ زانت چہ کسّ ءَ کم نہ اَت، چی ءَ کہ ما آئی ءِ اے زانت ءُ زانگ چہ شیرکِن ءُ راست گْوشیں شائِری ءَ دیستگ۔ ءُ اے پیرمرد ءَ وتی دْراھیں زند پہ بلوچ راج ءُ بلوچی زُبان ءِ ھاتِر ءَ ندْر کُرتگ۔

ھمے رنگ ءَ اگاں ما کازی ءِ آشوبی شائِری ءَ بہ چار اِیں یا کہ اِشکی شائِری ءَ دُرست وتی مٹّ وت اَنت۔ چوش کہ جاھے کازی گْوش اِیت: اَتکگ اَنت گْرانیں نوبت ءُ جنگانی بھار دیم پہ ماتکوھاں رپتگ اَنت ملّیں سرمچار یاکہ کازی پہ ڈیھ ءِ ھاتِر ءَ پاھو چہ سُھر ءَ شرّتر اِنت باریں کئی بھت ءَ کپیت اے ساد ماں لُنجیں شپاں واجہ مبارک کازی ءَ چہ بلوچستان یونیورسٹی ءَ (M.A) (I.R) ءَ انٹرویلیشن بہ زان کہ (بین الاقوامی تعلقات) ءَ ماسٹر ءِ ڈگری گپتگ۔

وانگ ءَ چہ پارگ بُوَگ ءَ رند آ وتی ھند ءُ دمگاں پسنی ءَ پش ھار بر ءِ ڈائریکٹر بیت ءُ زِند ءِ روچاں دیم ءَ تیلانک دیان بیت، بلے آئی ھِچّ بر وتارا مزن ءُ اَپسرے نہ لیک اِتگ ۔ یک مست ءُ ملنگیں انسانے بوتگ ءُ آئی دیوان ءَ مُدام شائِری، میوزک، کندگ ءُ مسکرائی، شراب ءُ ناچ بوتگ۔ ھمے رنگ ءَ واجہ کازی یک راست گْوَشیں اِنسانے اَت۔آئی راست ءَ را راست ءُ دُروگ ءَ را دُروگ گْوشت، ءُ کازی کسّے ءِ کِرّ ءَ نہ تُرس اِت۔ آ یک بھادریں اِنسانے اَت۔ چوھانا ءَ من اولی رند ءَ واجہ مبارک کازی ماں تُربَت ءَ دیستگ، اِے ھما وھد اَت کہ من 1997ء ءَ ماں اتا شاد ڈگری کالج تُربَت ءَ (ایف ایس سی) ءَ وانگ ءَ اَت آں۔ ءُ ھمے دوران ءَ من B.S.O تُربَت زون ءِ پریس سیکریڑی اِت آں، چہ تُربَت زون ءِ نیمگ ءَ یک سمینار ءُ شائِری ءِ دیوانے برجم دارگ بوت کہ آئی ءِ سرھال اَت (بلوچی زبان ءِ آکبت)۔

واجہ مبارک کازی ھمے دیوان ءَ مھمان ء ھاس اَت۔ ابراھیم آبد ءُ مھمد جان رزاؔ ھمے دیوان ءَ ھوار اِت اَنت۔ آ وھد ءَ کہ من تُربَت کیچ ءَ مزنیں وھدے گْوازینت، گُڑا ھر وھد ءَ گوں واجہ مبارک کازی ءَ دیوان ءُ مجلِس بوتگ اَت آں ۔تُربَت ءَ وھدے مشائِرہ یا کہ سمینارے بوت، گُڑا واجہ کازی الّم ءَ لوٹائینگ بوتگ اَت۔ 2001ء ءَ ماں تُربَت ءَ بی ایس او ءِ کونسل سیشن ءَ وھدے ڈاکٹر اللہ نزر وتی پگری ءُ لیکّھی (نظریاتی) سنگتانی ھمرائی ءَ درکَیت، گُڑا بی ایس او آزاد ءِ بُنھشت ءَ ایر کنت۔ آ وھد ءَ بازیں مردُماں واجہ ڈاکٹر اللہ نزر ءِ ھِلاپ کُرت کہ ورنایے سما ءُ سسّایے کار ءَ نہ اِنت، آ کہ اے گْرانیں بار ءَ کُوپگ ءَ کنگ جُنزگ لوٹ اِیت ما وت ءَ پیسر ءَ وت ءَ چکّاس اِتگ، گوں اِیشی ءَ اے گْرانیں بار پہ آسری کُجا کُوپگ ءَ بیت ءُ دیم ءَ جُنز اِیت، باندا دم بارت، بلے ڈاکٹر اللہ نزر انگت گوں مُھکم ءُ تمردی ءَ دیم پہ مِنزل ءِ نیمگ ءَ جُنزگ ءَ اِنت، شالا مُرادے سر بیت ءُ ایردستی ءِ تھاریں شپ پہ آجوئی بام دنت۔۔۔۔۔۔۔

بلے! اِد ءَ اے گپّ ءَ من الم کن آں کہ آ زمانگ ءَ ڈاکٹر اللہ نزر ءَ اولی مردُم مبارک کازی اَت کہ آئی مبارک باتی دات۔ گُڑا ھما وھد ءَ یک ھالتاکے (اخبارے) ءَ من ءَ یات بہ بیت توار ھالتاک (اخبار) اَت یاکہ رھبر ءَ واجہ مبارک کازی ءِ یک بیانے راج ءِ دیم ءَ اَتک کہ آئی واجہ ڈاکٹر اللہ نزر ءَ مبارکباتی داتگ اَت ءُ ھمے نبشتگ اَت کہ تو بلوچستان ءِ آجوئی ءِ اولی بُنھِشت اِیر کُرتگ۔ ھمے وڑ ءَ واجہ مبارک کازی ءَ وتی ورنائیں بچّ کمبر مبارک پہ بلوچ ڈیھ ءِ ھاتِر ءَ ندْر ءُ کُربان کُرتگ، بلے اَچ وتی چِست کُتگیں گامگیج ءَ داں مرگ ءِ گُڈّی کنڈگ ءَ پدکِنز نہ بوت، اے درگت ءَ من ھمے سرپد بَہ آں کہ واجہ کازی وتی باتِن ءَ بے کِساس مُھکم ءُ تمردیں اِنسانے بوتگ کہ وھد ءِ ھِچّ رنگیں رِپک ءُ پندلاں آئی ءَ را پُروش دات کُت نہ کُت، پمیشکا مرچی آ وتی گوں جْوانیں کِرد ءُ اَمَل (عمل) ءَ بلوچ راج ءِ مْیان یات کنگ بیت، چی ءَ کہ جْوانیں کِردار کدی شموشگ نہ بہ اَنت، ءُ کازی ھما بالاد اِنت کہ داں بلوچ راج ھست ءُ مان اِیت آ ابدمان اِت۔۔۔۔۔۔

ملکموت ءَ چہ کازی تو چینچو تچ ئے

کَیت اِنت یکروچے کوریں چگل پہ ترا