ریڈیو زْرمبش بلوچی | ریڈیو زْرمبش بلوچی

منگوچر: لین ءُ گیس نیست، مردماں زھرشانی ءَ شال کراچی شھدگ بند کرتگ۔ زھرشانی جتا جتائیں جاھانی ملنگزھی، دنگازھی ءُ ایسازھی ءِ مردماں بھر زرتگ۔ زھرشانی ءَ جنین ءُ زھگ ھم بازیں کچے ءَ گوں بیتگ اَنت۔ چہ زھرشانی ءَ دگ ءِ بند بیگ ءِ سوب ءَ دوئیں نیمگاں گاڑیانی مزنیں کتار اوشتوک بیتگ اَنت ءُ مساپر سکا جنجال بیتگ اَنت، زھرشانی کنوکیں مردمان ءَ پلے کارڈ دستان بیتگ ءُ آیاں ھندی واکدارانی نابودیانی بگیری ءَ اوگام جتگ ءُ لین ءُ گیس ءِ شر کنگ ءِ لوٹ کرتگ۔ زھرشانی کنوکیں مردماں تران کرتگ ءُ گوشتگ کہ چہ لین ءُ گیس ءِ نہ بوگ ءِ سوب ءَ مردم سکا جنجال اَنت۔ چہ زمینداراں بگر داں ھمک باپاری ءِ گون ءَ بندوکیں مردم سانمند اِنت۔ آیاں گوشتگ کہ چہ گیس ءِ نہ بوگ ءَ مردم پہ ورگ ءِ جوڑ کنگ ءَ جنجال اَنت۔ اے بارو ءَ ھندی واکداراں سُدے پر نیست ما پمیشکا پہ زھرشانی کنگ ءَ لاچار بیتگ ایں۔ رند ءَ کیسکو ءِ واکدار ءُ ھندی پولیس سروگان ءَ گوں زھرشانی کنوکیں مردماں گپ ءُ تران کرتگ ءُ پہ جیڑھانی گیش ءُ گیوار کنگ ءَ دلجمی داتگ اَنت کہ آیاں وتی زھرشانی ھلاس کرتگ ءُ دگ پچ کرتگ۔ بنشون: دمگی اھوالکار | اکس: اھوالکار