ریڈیو زْرمبش بلوچی | ریڈیو زْرمبش بلوچی

من ءَ کتاب لوٹ ایت

من ءَ کتاب لوٹ ایت

MAY

03
03 / 05 / 2021 نبشتانک 187

من ءَ کتاب لوٹ ایت
  نبشتہ شھید ڈاکٹر منان بلوچ
  رجانک سرباز وپاؔ


وھدے ما وانگجاہ ءَ نودربر اِتیں گڑا زرّی وانگ ءَ مئے زھن داں وتی جند ءَ داشتگ اَت، وانگجاہ ءَ ٹیچر ءِ رویشت ءُ چاگرد ءَ مسترینانی رویشتاں مارا چہ گْواچنی راستی ءِ سرپد بیگ ءُ یک مردمے ءِ ارزیشت ءَ سرپد بیگ ءِ توان ءَ زبھر کُرتگ اَت۔زورگِر ھمے شوندات ءَ کارگیپت داں چیردست ءُ زورگیپتیں مردم دابَھ جوڑ بہ بنت۔اگاں اے چو مردم ءِ پیم ءَ یل کنگ بہ بنت گڑا دُرسیں راستیاں سرپد بنت۔
مارا دائم ھمے یکیں گم ورگ ءَ اَت، ما دائم ھمے جیڑ اِت، ما کجام وڑ ءَ وتی ڈگری ءَ بگراں ءُ نوکری بہ رس اِیت، جوانیں زندے بہ گوازین آں۔ ھوشو گوش ایت: وھدے کہ مردم کسان بوان بیت آئی ءِ ڈگری گیش بوان بنت، ھمے وڑ ءَ مردم ءِ پچار ڈگری یاں نوکری بنت۔ آئی ءِ زندگی لوٹانی رندگیری ءَ کنت۔ آ وتی  پجار ءَ بے ھال کنت۔ زوگِر ءَ گیش موہ رس اِیت۔ 
زورگِر ءِ لوٹ ایردستیں راج ءَ چہ وشھالی ءُ دیمروئی ءَ تباھی ءِ نیمگ ءَ برگ اِنت، پہ راجانی دیمروئی ءَ رواجی بگیری ءَ کار کنت، مردماں ھواری جیڑگ ءُ کربانی دیگ ءِ مارشت ءَ نزور کنت۔ راجدپتر ءِ تہ ءَ زندگ بوّگ ءُ نہ بوّگ، راجی جُنز ءِ جوڑ بوُگ، یا وت ءَ راجی جُنز ءِ بھر جوڑ کنگ، اے انچائیں گپ بنت، انچیں مارشتانی تہ ءَ مردم بند بیت۔ ھما مردم کہ وتی زاتی لوٹ ءُ واھشُتاں کُش اِیت ءُ پہ راجی دیمروئی ءَ کربان بیت۔ گڑا جھان ءِ زیبائیں جُنز گوں آئی نزیکی کن اَنت۔ راجانی تہ ءَ اے وڑیں مردم ودی بہ بیت کہ راجی جُنز ءَ نوکین رنگے بہ دنت۔ زورگِر ءِ دود ءُ ربیدگاں ھلاس بہ کنت، یک نوکین زندمانی ودی بہ بیت، نہ زوراک بہ بیت ءُ نہ نزور بہ بیت۔ انچش کہ گلامی ءِ تہ ءَ راجی وشھالی ءُ دیمروئی تھنا یک بوھانٹو ءِ وابےبیت۔  تھنا پہ وتی واھشتاں زندگ بوّگ زورگِر ءِ دیمروئی ءُ وشھالی اِنت۔ گلامی ءِ تہ ءَ نہ مردم ءِ زاتی واھشت سرجم بنت، نیکہ چاگردی لوٹ ءُ گُزر۔
من شمارا گوں انچیں مردمے ءَ دیم پہ دیم کن آں کہ آئی ءَ چہ زری وانگ ءَ جوانیں زانت ءُ زانگے در برتگ، یک شریں نام ءُ کردارے ءِ واھند اِنت۔ آئی ءَ وتی زاتی واھشت یلہ داتگ ءُ پہ راجی دیمروئی ءَ کربان بوتگ۔ آ گرانکدریں مردمے ءِ نام ءَ سنگت الی جان اِنت۔ جاہ ءِ آھو داروکوچگ ءَ یک اَبدمانیں زندے ءِ گوازینگ ءَ سوبین بوتگ۔


من الی جان ءَ کدی زان آں اے ھبر یات نہ بیت۔ من وھدے 2003 ءَ جاہ ءِ آھو بگاڑی زیلگ ءَ ڈاکٹری ءِ ڈیوٹی  کنگ ءَ اِت آں، یک سپرے ءَ من الی جان دیستگ۔ گوں گندگ ءَ ھوار منی ءُ آئی وانگ ءِ سر ءَ تران بندات بوت۔ وانگ ءِ رھبند ، شرگِداری سر ءَ من ءُ آئی دیوان کرت۔ آ گوں زری وانگ ءَ سک شر اَت، نودربرانی زھنانی جوڑ کنگ ءَ آئی شریں کِردے اَت۔ اے ھما وھد اَت کہ نیشنل پارٹی ءِ جوڈ بوّگ ءَ پد چیئرمین گلام مھمد بلوچ ءِ سروکی ءَ بی این ایم ءِ آرگنائزنگ باڈی جوڑ بوتگ اَت۔ جاہ ءِ آھو، اے وھد ءَ ھندی سردار ءُ میرانی سروکی ءَ اَت۔ جنرل زیا ءُ جام گلام کادر ءِ جوڑ کرتگیں میر مجید بزنجو ءِ کماشی ءَ مردم نا اِمیت ءُ نا تبی ءِ شکار اِت اَنت۔
  اے جاورانی تہ ءَ بلوچ راجی جُنز ءُ پہ بی این ایم ءَ مردم ءِ جوڑ کنگ سک گِراں اَت۔ جاہ آھو 1973 ءِ وھد ءَ پہ آجوئی جُھد ءِ ھلاس کنگ ءَ زولپکار الی بٹو، میر اَبدالکریم ءُ میر آدم ءَ ششک جُنز ءِ نام ءَ یک چیر اندریں کارے داتگ اَت۔ آھاں ھتیچک ءِ تہ ءَ اُرشے کرتگ اَت۔ میر گلام رسول تمراڑی شھید کرتگ اَت، آئی توپک گوں وت بُرتگ اَت۔ اھمد برامی ءَ پاکستانی لشکر ءَ اُرش کنائینتگ اَت ءُ بلوچ پرزند شھید کنگ بوتگ اِت اَنت، گوں زالبولاں ھوار بازیں مردینے شھید کنگ بوتگ اَت۔ بازیں مال ءُ دلوتے بَرگ بوتگ اَت، گِس سوچگ بوتگ اِت اَنت۔ 1984 ءَ شھید گلام رسول ءِ بِراس اشرپ، میر اَبدلکریم ءُ میر آدم ءَ گوں وتی بِراس ءِ تُپنگ ءَ گندیت، آ اے دوئیناں کُش ایت۔ آھانی مِرگ ءَ پد جام گلام کادر ءُ جنرل زیا، پاکستانی چیریں ترامگیجاں آھانی مَرگ پہ ششک ءَ کربانی ءِ نام داتگ۔


1985 ءِ گچینکاری ءَ پاکستانی ترامگیج ءُ ھندی سروکاں ھمے وئیل نیمونے جوڑ کرت میر مجید سوبین کرت۔ آئی ءَ پہ وتی مرشدانی وش کنگ ءَ گلامی ءِ مارشت ھلاس کرت ءُ جوانیں رنگے ءَ مردمانی تب ءِ مَٹ کنگ ءَ شریں کردے دیم ءَ آؤرت۔ گڑا اے وڑیں جاھاں پہ بلوج راجی جُنز ءَ زھن سازی کنگ ءَ شریں وڑے ءَ جُھد کنگ لوٹ اِیت۔ اے پدریں گپے اے وڑیں کار ءَ الی جان ءِ وڑیں لائک ءُ زانتکاریں مردمے بہ کنت۔ آئی ءِ رھبری ءَ یک چاگردی رژناھین گَلے ءِ نام جوڑ کرت، گوں وتی سنگتانی ھواری ءَ جاہ ءِ آھو ءِ مھلوک ءِ تہ ءَ شپ ءُ روچ جُھد کرت، اَبدالکریم ءُ آدم ءِ راستیں دروشم راج ءِ دیم ءَ پدّر کرت، گوں کتابانی وانگ ءُ مردماں سرپد کرت ءُ پیش داشت،  آھانی کُشندہ میر گلام رسول ءِ بِراس ءَ وتی بِراس ءِ بیرگیری کرتگ، اے بلوچ راجی جُنز ءِ بگیری ءَ پاکستانی چیریں ترامگیجانی یک ٹولھے ءَ گوں کار کنگ ءَ بوتگ اَنت۔ مجید بزنجو ءَ اے کاراں سک ءَ تورینتگ، آئی ءَ وتی مردم پرماتگ اَنت، الی جان ءَ لَب ءُ لالچ بدے اِت اگاں سرپد نہ بوت بیھار بہ بدے اِت، آ چہ وتی اے جُھد ءَ دزکش بہ بیت۔ چُش نزانت کہ الی جان ءِ وڑیں آلمیں مردمے پہ اے وڑیں تولگانی بیھار ءَ پد کِنز نہ بیت، نہ آ پہ لَب ءُ لالچ ءَ رد کپ ایت۔ بلکیں آ چاگردی جیڑھاں شریں وڑے ءَ دیم ءَ کاریت۔


بلکیں آئی اے گپ پیش داشت چاگردی جیڑھانی گیش کنگ ءَ ریاست ءُ آئی داشتگیں مردمانی دست ھوار اِنت۔ آئی ءِ جُھد ءَ جاہ ءِ آھو ءِ تہ ءَ چیردستی ءِ مارشت ءِ پدر کنگ ءَ جوانیں کردے زندگ کرت۔ بلکیں اے کار چاگردی گلاں کرت نہ کرت اَنت، کہ الی جان جاہ ءِ آھو کوھڑو ءَ گَلے ءِ وڑ ءَ گوں سنگتانی ھواری ءَ یک کتابجاھے انگلش میڈیم وانگجاھے پچ کرت۔ مھلوک ءِ تہ ءَ یک بیسھے آؤرت۔ الی جان پہ کتابجاہ ءِ بندگ ءَ وت کار کرت ھر گاڑی ءِ سر ءَ ھاک آؤرت۔ آئی ءَ گوں کتاب ءَ مزنیں مھرے  ھست اَت۔ آئی دائم کتاب ونتگ، ھر جیڑہ ھورتی ءَ چار اِتگ، پمیشکا پہ آئی ءَ کتابجاہ سک ءَ المی اَت۔ پمیشکا آئی ءَ پہ کتابجاہ ءُ وانگجاہ ءَ بے کساس جُھد کرت، آئی ءَ کجام سنگت بہ دیستیں چہ آئی ءَ کتاب ءِ لوٹے کرت، گوشت ئے من ءَ کتاب لوٹ ایت۔


بس آئی ءَ دائم کتاب ءِ لوٹ اَت، دگہ چشیں شے نیست اَت کہ آئی ءِ لوٹانی تہ ءَ الّمی بوتیں۔ اے وھد ءَ آ گوں دگہ دو سنگت ءَ بی این ایم ءَ ھوار اَت۔ آئی ءَ شریں وڑے ءَ وتی کار دیم ءَ بُرت اَنت۔ آ یک سیاسی ءُ چاگردی کار کنوکے اَت۔ سکین مھمان نوازے اَت۔ آئی ءِ گِس ءَ مدام سنگت ءُ مھمان ھست اَت۔ آیک وش تبیں مردمے اَت۔ آئی وتی دیوان ءَ کس ءَ بے چاڑ بوّگ ءَ نہ اشتگ۔ 19 مئی 2009 ءَ جاہ ءِ آھو واجہ باگ ءَ اھمد برامی شھیدانی نام ءَ یک جلسھے بوّگ ءَ اَت۔ یک ھپتگے ءِ تہ ءَ کنگی اَت۔ آئی ءَ پہ جلسہ ءِ سوبمند کنگ ءَ شپ ءُ روچ جُھد کرت۔ پہ تلّو ءِ چیزانی آرگ ءَ 40 کلو میٹر ءِ دوری ءَ گوں یک سنگتے ءَ چیزاناں کوپگ ءَ بڈّ کرت ءُ آؤرت اَنت۔ بلے وت تلّو ءِ سر ءَ گپ ءَ نہ یتک۔ آئی ءَ مدام وت ءَ پُشت ءَ داشتگ ءُ کار کنگ ءِ ھیل کرتگ۔ چہ وتی زاتی واھشتاں سک دور اَت۔ اے جلسہ باز جوان ءُ سوبمندیں جلسھے بوت۔ بی این ایپ ءِ بُنجائی رھشون اے جلسہ ءَ ھوار اِت اَنت، مردمانی گیشین آھگ ءَ اے گپ پدر کرت الی جان ءُ آئی ءِ سنگتانی جُھد ءَ جاہ ءِ آھو ءِ تہ ءَ گلامی ءِ تبے دور کرتگ۔


آئی ایس آئی ءُ آئی ءِ مردماں اے جلسہ ءِ سوبمندی اوپار نہ بوت، 25 اگست 2009 ءَ شھید التاپ بلوچ ءِ یاتگیری ءَ زھرشانی ءِ وھد ءَ آئی ایس آئی ءِ مردماں زھرشانی ءِ سر ءَ ارُش کرت الی جان ءَ ھوار آدگہ سنگت ٹپی بوت اَنت۔ پد ءَ چیئرمین ھلیل بلوچ ءُ سنگت سناء بلوچ ءِ جاہ ءِ آھو ءِ روگ ءَ الی جان ءِ ھمت گیشتر مھکم کرت۔ 16 دسمبر 2009 ءَ کورک ءَ جلسھے شھید اھمد برامی ءِ نام ءَ دارگ بوت۔ اے دیوان ءَ الی جان بے کساس جُھد کرت، تھنا جلسہ ءِ سوبمندی ءَ نہ بلکیں اے اولی رند اَت زالبولانی مزنیں کچے اے جلسہ ءَ آتکگ اَت۔ الی جان چہ 2004 ءَ بی این ایم ءَ ھوار بوتگ اَت۔ آ وھد تھنا دگہ دو سنگت بوتگ اَت۔ اے 16 دسمبر 2009 ءِ جلسہ ءَ بی این ایم مھکم بوت۔ گوں آشوبی رواجاں پارٹی ءِ ادارہ ءُ دیوانانی پابندی ءَ دیم ءَ روان بوت۔ آئی جھلی ادارھاں وت ترو تاب کرت یک رھشونے ءِ پرز پیلو کرت اَنت۔
2009 ءَ آواران دمگ ءِ سرکماش بوت، آواران ءِ تہ ءَ تنظیم کاری ءَ سرجمین دمگ ءَ ترو تاب کرت۔ جاہ ءِ آھو آواران ءَ چہ جوانیں کاراں اکتوبر 2010 جاہ ءِ آھو ءَ بی این ایم ءِ کونسل سیشن بوت۔زْرمبشت ءِ تہ ءَ باز جوان ءُ سوبمندیں کونسل سیشنے اَت۔ الی جان بنجاھی کمیٹی ءِ باسک زورگ بوت، چہ وتی سوبمندی ءَ داں شھیدی ءَ یک دیوانے ءَ پشت نہ کپت۔ پارٹی ءَ کُج ءَ زمہ واری بہ داتیں آ پہ بچکند رازی بوت، وتی زمہ واری شریں وڑے ءَ پیلو کرت اَنت۔ رند ءَ آ بی این ایپ ءِ بُنجاھی کونسلر بوت۔ بی این ایپ ءِ مھکم کنگ ءَ گیش جپاکشی کنگ ءَ اَت۔ بی این ایپ ءِ دیوانے ءَ آتکگ اَت زمہ واریں سنگتے ءَ گُشت الی جان تو ھدود اللہ ءِ ھٹ لِسٹ ءَ ھوارئے ، الی جان اے گپ ءِ اُشکنگ ءَ کند اِت۔
9 اپریل 2013 ءَ کولواہ ءَ مرگاپ ءِ شھیدانی یات ءَ جلسھے بوت، آ گوں اَت۔ ھمے جلسہ ءَ چیئرمین ھلیل بلوچ ءَ گشت گومن ھوار کلیںن سنگت داں گُڈی دمان ءَ جُھد کن اَنت، شھید بوّگ لوٹ اَنت۔  19 اپریل 2013 ءَ الی جان چیئرمین ھلیل بلوچ ءِ ھمے گپ راست کرت ءُ پیش داشت، گوں دُژمن ءَ جنگ ءَ شھیدی ءِ گرانکدریں نام کٹ اِت۔ مارا گیش ھمت ءُ توکلے دات، آجوئی ءِ جُھد الی جان ءِ وڑیں سنگتانی کربانی ءَ پد شریں وڑے ءَ دیم ءَ روگ ءَ اِنت۔ دُژمن ءَ الی جان شھید کرت ھمے سرپد بوت من سوبین بوتگ آں۔ بلکیں آئی نزانت کہ الی جان ءِ جپاکشی ءُ آئی ءِ دیواناں پارٹی مھکم کرتگ، دُژمن اے کاروان ءَ ھچبر ھلاس کرت نہ کنت۔