ریڈیو زْرمبش بلوچی | ریڈیو زْرمبش بلوچی

بلوچ راجی آجوئی ءِ جُنز ،نبشتہ کار : ماھروش بلوچ ،سَیمی ءُ گُڈی بھر

بلوچ راجی آجوئی ءِ جُنز ،نبشتہ کار : ماھروش بلوچ ،سَیمی ءُ گُڈی بھر

JUN

13
13 / 06 / 2021 نبشتانک 66

اگاں ما ھورت بہ چار ایں کہ پہ پاکستان ءَ بلوچستان ءِ زیردست کنگ وَ آسان اَت بلے نی زیردستی مھکم کنگ پہ پاکستان ءَ سَک گران انت۔  اگاں امریکہ ءِ وڑیں سُپر پاورے ءَ ویتنام، کیوبا ءُ اوگانستان ءَ سر ءَ، ءُ مسر یمن ءِ سر ءَ، سویت یونین اوگانستان ءِ ءُ چِل ءُ سے ارب کولیشن یمن ءَ وتی جنگی لشکر ءُ زورگیری ءِ مُھکم کنگ ءَ بے سوب بیتگ اَنت گّڑا اِے پنڈوکیں پاکستان بلوچ راج ءِ دیم ءَ چے یے۔ بس بلوچ راج ءَ یکمُشت ءُ تپاک بوگ لوٹ ایت۔ پیسر چَہ 1980 ءَ پاکستان ءَ مُدام اَرب مُلک ءُ امریکہ باز زَری ءُ لشکری کُمک کنگ ءَ اِت انت بلے مرچی میانجی ئیں رودرآتک ءِ جاور بدل بیتگ اَنت۔ سھودی جِند ءِ زَر یمن جنگ ءَ زیان بیگ ءَ انت ءُ ماں اوگانستان ءِ جنگ ءَ امریکہ ھم پاکستان ءِ دُزّی گیپتگ کہ دولمبری کنگ ءَ اَت پمیشکا پاکستان ءِ ھر وڑیں کمک ئِے بند کتگ۔ مستریں گپ ایش اِنت کہ امریکہ چہ اوگانستان ءَ درکپگ ءَ انت ءُ اوگانستان ءِ تہ ءِ اّلسی جنگے ودی بیت ءُ اوگانستان ءِ سرڈگار ءَ ٹی ٹی پی ءُ الکائدہ ءِ وڑیں جنگی گل ھم پد ءَ یکجاہ بنت۔ بزاں اوگانستان پہ بازیں سِلاھبندیں گلاں یک سٹریٹجک ڈپتے بیت ءُ پد ءَ ھمے گل پاکستان ءِ سر ءَ ھم اُرش کن اَنت ءُ پاکستان ءَ نزور کن اَنت۔ اے 1992-2002 وَ نہ انت کہ اوگانستان ءِ اُِلسی جنگ ءَ تھنا اوگانستان بیران بیت چی ءَ کہ 90 ءِ دھک ءَ ھمے تیوگیں گل پاکستان جِندئیگ اِت انت بلے مرچاں آ پاکستان ءِ دژمن اَنت۔ پیسر ءَ سھودی، امارات ءُ دِگہ ھلیج مُلک پاکستان ءَ کُمک کنگ ءَ اِت اَنت بلے نی پاکستان ءَ کس کُمک نہ کنت۔ پاکستانی بلاھیں شھرانی تہ ءَ پاکستانی تالبان ٹی ٹی پی ءِ بمبانی تراکاں پاکستان ءِ کارجاہ ھلاس کتگ اَنت، کشمیر ءِ سیمسر ءَ انڈیا گوں جنگی جاور ءُ پی ٹی ایم ءِ سیاسی جُنز ءُ بلوچستان ءِ چیرجنگ ءُ کاسگ چٹّانی ھرچگاں پاکستان بزگ کتگ، بلوچستان ءِ ھر کوہ ءِ سر ءَ پاکستانی لشکر ءِ بُنجل انت اے دُراہ بلوچ ءِ بیم انت چی ءَ کہ سرجمیں بلوچستان ءَ پاکستان ءِ لشکر بلوچ چیرجنگولانی تُرسے ءِ آماچ انت ءُ پاکستان ءَ زر زیانی ءَ بے وانک کنگ ءَ انت چمیشکا پاکستان مرچاں چار سنگر ءَ گٹ انت پمیشکا پاکستان ءِ تہ ءَ ھر ورگی سامان گِرانھاد بوگ ءَ انت۔ زَر ءِ نھاد ڈالر ءِ دیم ءَ یکشل ءَ کپان انت چریشی ءَ ڈنی وام مرچاں یک سد ءُ بیست بلین ڈالر انت ئِے ءُ راج ئِے بے پوریاگِر انت۔ نی سندھی وتی آجوئی ءِ ھاتر ءَ ھم پاد آیگ اَنت پمیشکا بلوچستان ءِ وڑ ءَ اود ءَ ھم سندھی گار ءُ بیگواہ بوگ ءَ انت۔ بلے ھبکّھیں گپ ایش انت کہ سندھ ءِ تہ ءَ پاکستان ءِ مستریں کاسگ چٹّ بلاول بھٹو زرداری ءَ  ھم 9 ساچان 2020 ءَ سندھودیش ءِ گپ کُت گُڑا اے گپ ءَ پاکستانی سیاست لرزینت۔ پارلیمنٹ ءَ بازیں زھریں ھبر، زاہ ءُ زکت ھم بیتگ۔ چریشی ءَ اے زانگ بیت کہ پاکستان یک روچے پد ءَ پْروش ایت ءُ اَلم پّروش ایت بلے لھتیں کاسگ چٹّ بے سُدّ ءُ بے ھال اَنت۔ اگاں ما چیرجنگی کتاباں بوان ایں گُڑا ما زان ایں کہ اگاں دژمن بے گناھیں لس مھلوک ءِ سر ءَ لٹ ءُ کُٹ کنت۔ شک ءِ سر ءَ ورنائیں نودربراں دگانی سر ءَ کُش ایت ءُ لاشاں دور دنت بزاں دژمن ءَ پْروش وارت چی ءَ کہ چریشی ءَ راج ءِ تہ ءَ دژمن ءِ بگیری ءَ یک زھر ءُ نپرتے چِِست بیت۔ وھدیکہ کہ گلامیں راج ءِ تہ ءَ دژمن ءِ بگیری ءَ کست ءُ کینگ ودی بوتگ بزاں راج ءَ وتی گلامی مار ات ءُ نی گلامی ءَ نہ منّ ایت ئِے ءُ پد ءَ تئی راجی جُنز ءَ وت نوکیں ھاٹیگاں زُور ایت۔  مرچاں %98 بلوچ راج پہ پاکستان ءَ کست ءُ کینگ دار ایت ءُ اِے چیز ءَ پاکستان ھم جْوان سرپد انت۔ اگاں ما بْرمش ءُ آئی ءِ مات ءِ سر ءَ ویل ءَ بہ چار ایں، نودربر ھیات بلوچ ءِ شھادت ءَ ھم ھورت بہ گند ایں کہ دژمن ءَ ھزارانی ھساب ءَ بلوچ بے گناھی ءَ شھید کتگ اَنت گڑا اے شھادت ءُ ویلاں ھم راجی آجوئی ءِ جُنز ءَ  بے بھائیں ھاٹیگ داتگ اَنت۔ 1971 ءِ وھد ءَ بنگلہ دیش ءَ ھم پاکستانی پوج ءَ آپریشین سرچ لائیٹ بنگلالی کواس، سیاسی رھشُون، شائِر، رھدربر ءُ نودربرانی کشگ ءَ بُنگیج کتگ اَت پد ءَ ھمے زلم ءُ زورانسری ءَ بنگلہ دیش ءِ مھلوک گیشترّ آگاہ کتگ کہ پہ راجی آجوئی ءَ ابید ما دگہ ھچ نہ لوٹ ایں چریشی ءَ بنگلہ دیش زلم ھلاسی ءِ شاھدی انت ءُ نی بلوچستان ءِ تہ ءَ ھم دیر انت کہ اپریشن سرچ لائیٹ ءِ وڑیں زوراکی جُنزان انت۔ اد ءَ ھم لالا مُنیر گوں سنگتاں، ڈاکٹر ھالد، ھبیب جالب، نواب اکبر ھان بُگٹی گوں وتی بازیں لوگ ءِ زالبولاں، کمبر چاکر، ساجد ھُسین، راجی رھشون بانُک کریم ءُ سباہ دشتیاری وڑیں ھزارانی کچ ءَ بلوچ ڈاکٹرز ءُ وانندگیں ھستی شھید کنگ بوتگ انت بلے بلوچ ءَ ھچبر پْروش نہ وارتگ اگاں پْروش وارتگ ءُ ورگ ءَ اِنت گُڑا پاکستان پْروش ورگ انت ءُ بلوچ آجوئی ءِ نیمگ ءَ دلجمی ءَ جُنزان انت۔ پد ءَ کاسگ چٹّ ءُ راجدروھانی چے آکبت بنت آئی ءَ ھُدا زانت۔ مرچاں اوگانستان ءِ جاور ھال پہ بلوچ راج ءَ گیشتر ساز بوگ ءَ انت۔ باید انت بلوچ چیرجنگ ءِ سروک وت ءَ گوں اوگانستان ءِ آزات ھیالیں راجدوستاں نزیک بہ دار اَنت، دنیا ءِ دِگہ مُلکاں پہ وتی راجی آجوئی ءِ ھاتر ءَ کُمک بہ لوٹ اَنت انچوشکہ بے کُمک ءَ ھچ راجی جُنز دیمرئی نہ کنت ءُ وتی سرجمیں سِلاھبندیں گلاں  یکجاہ ءُ مُھکم بہ کن اَنت۔ گل ءِ نزوریاں شَر کنان ءَ گل ءِ سرجمیں باسکاں گل ءِ رِد ءُ رھبندانی پابند بہ کنائین اَنت۔ بلوچ چیرجنگ سوبین بات اَنت ءُ بلوچ وتی ڈیھ ءِ وتواجہ ءُ آجو بات انت۔ ھلاس اِنت۔