ریڈیو زْرمبش بلوچی | ریڈیو زْرمبش بلوچی

بلوچ راجی آجوئی ءِ جُنز نبشتہ کار : ماھروش بلوچ, اولی بھر

بلوچ راجی آجوئی ءِ جُنز  نبشتہ کار : ماھروش بلوچ,  اولی بھر

JUN

08
08 / 06 / 2021 نبشتانک 192

وھدے کہ انگریز سرکار ءَ ھندوستان ءِ بھر ءُ بانگ ءِ آسر ءَ بدبھتیں پاکستان اڈ کُت پد ءَ کساس سالے ءَ رند، ھمے بدواھیں دژمن ءَ 27 مولمان 1948 ءَ وتواجھیں بلوچ راج ءِ آجوئیں ڈیھ بلوچستان ءِ سر ءَ اُرش کت ءُ بلوچ راج زورانسری ءَ زیردست کت۔بِہ گِند ئے بلوچ راج ءِ گوں ھندوستان ءِ بَھر ءُ بانگ ءَ ھچ وڑیں سیادی یے نیست اَت ءُ نَیکہ بلوچ راج ءُ بلوچستان ھم کدی ھُشکِنات ھند ءِ بَھرے بوتگ۔ مارا انگریزاں 11 ساچان 1947 ءَ آجو کتگ اَت پمیشکا بلوچستان چَہ ھندوستان ءَ ساری ءَ آزاتیں استانے اَت بلے مھمد اَلی جناہ ءَ چَہ ھان کلات ءَ زورانسری دزنامے گپت ءُ 28 مولمان 1948 ءَ بلوچستان ءِ سر ءَ لشکرکشی کت ءُ بلوچ راج چَہ آجوئیں زندمان ءُ وتواجھی ءَ زبھر کُت۔ بژن اِنت کہ آوھد ءَ تیوگیں بلوچ راج ءِ لس مھلوک دمگی کاسگ چٹّیں سردار، میر ءُ نوابانی زیردست ات انت ءُ پمیشکا راج ءِ تہ ءَ راجی وتواجھی ءُ آجوئی ءِ ھچ وڑیں سرپدی ءُ بستار نیست اَت پمیشکا مھمد اَلی جناہ ءِ لب ءُ لالچ ءِ دیم ءَ لھتیں نواب ءُ ٹَکری رھشوناں وت ءَ بھا کت ءُ لھتیں تُرس ءِ سوب ءَ ھوار بوت اَنت ءُ لھتیں ناسرپدی ءَ پاکستان ءِ رَدیں مھر ءِ آماچ بوت اَنت۔ البت لھتیں راجی بامردیں نمیراناں دژمن ءِ زورانسری ءُ گلامی نہ منّ اِت بلکیں گلامی ءُ زیردستی ءَ پِٹّ اش دات ءُ پہ بلوچ راجی آجوئی ءِ ھاتر ءَ دژمن ءِ ھلاپ ءَ چیرجنگ بُنگیج کت ءُ وت ءَ ابدمان کت۔ پد ءَ ھمے جُھدانی برکت ءَ کم کم ءَ بلوچ راج ءِ تہ ءَ راجی آجوئی ءِ زرمبشتے ودی بوت، مرچی بلوچ راج ءِ دِھکان بِگر تاں یونیورسٹی آنی دربُرتگیں وانِندگ وت ءَ پنجابی ءُ گجر ءِ گُلام منّ اَنت ءُ وتی راجی جُنز ءِ یک ٹوھیں سَسّایے واھُند اَنت۔ پہ راجی آجوئی ءَ راج یک زرمبشت انت پمیشکا مرچی تیوگیں بلوچ راج ءَ ھمے سِلّیں گلامی ءَ را پِٹّ دنت ءُ وتی راجی آجوئی ءِ چیرجنگیں جُنز ءَ ھوار بنت۔ داں ھما گلامی ءِ روچ تا مرچیگ ءَ ما گِندگ ءَ ایں کہ راجی جنُز مُدام سوبین بوان انت۔ اگاں ما رودرآتکی دژمن ءِ بگیری ءَ بلوچ راج ءِ اولی راجی آجوئی ءِ جُھد ءَ ھورت بہ گِند ایں گُڑا ما زان ایں کہ شھزادگ ابدلکریم ھان ءَ 1948 ءَ بلوچ راج ءِ اولی جنگولی جُنز بُنگیج کتگ اَت ءُ اے جنگ داں سالے ءَ کلات ءُ جھلاوان ءِ کِرّ ءُ کشاں برجاہ بوتگ اَت بلے بلوچ راج ءِ دگہ دمگی مھلوک پنجابی پوج ءِ کاسگ چٹّیں میر ءُ نوابانی زیردست اِت اَنت چمیشکا بازیں بلوچاں ھمے جنگ ءَ بَھر نہ زورتگ اَت بلکیں بزگیں بلوچ راج ءَ سُدّ ءُ سما ھم نیست اَت کہ بلوچ زاناں گُلام اِنت۔ البت شھزادگ ابدلکریم ءِ گھگیری ءَ بلوچ چاگِرد ءَ یک مارشتے دات کہ ما بلوچ گلام بیتگ ایں، مئے ابرمی مال ءُ مڈی چَہ مارا پُلگ بنت، مئے بلوچی دود ءُ ربیدگ ءُ راجی زبان گار ءُ بیگواہ کنگ بنت، بلوچیت چَہ راج ءَ گار بیت ءُ بلوچ مجگی گلام بنت۔ پہ بلوچ راجی آجوئی ءَ زورگیریں دُژمن ءِ ھلاپ ءَ چیر جنگ ءِ دومی بھر   1958-59 ءَ بابو نوروز ھان ءَ بُنگیج کت گُڑا ھمے جنگ ءَ وتی تَنگوئیں بَچّ ءُ ورنائیں سْیاد ءُ وارس کربان کت اَنت۔ پد ءَ وتی زند ءِ گُڈی بھر گوں درداں زندان ءَ گْوازینت۔ اے جنگ ءَ بلوچ راج ءَ یک رندے پد ءَ سرپدی یے دات کہ بلوچ گلامیں راجے ءُ گلامی ءَ مُدام پِٹّ بات۔ چَہ اے جنگ ءَ ما بلوچ باید انت اے ھم بہ زان ایں کہ زورانسر ءَ ھُدا ءِ پاکیں کتاب کُران مجید ءِ سوگند کت ءُ بابو نوروز ءِ چُک ءُ سْیاد پاھُو دات اَنت۔ چہ ایشی ءَ اے زانگ بہ بیت کہ اے مُلک ءَ اسلام ءِ جِند نیست اَت۔ اے دوئیں جنگانی وھد ءَ بلوچ راج ءَ وانندگیں مردم سک کم اِت انت پمیشکا راج ءِ تہ ءَ راجی آجوئی ءِ جُھدکار ھم کم اَت۔۔۔ روان انت۔۔۔۔