ریڈیو زْرمبش بلوچی | ریڈیو زْرمبش بلوچی

بلوچ راجی آجوئی ءِ جُنز، نبشتہ کار : ماھروش بلوچ، دومی بھر

بلوچ راجی آجوئی ءِ جُنز، نبشتہ کار : ماھروش بلوچ، دومی بھر

JUN

10
10 / 06 / 2021 نبشتانک 127

وھدیکہ 1970 ءَ پاکستان ءَ گچینکاری بنت گُڑا مُلکاری جیڑھانی سوب ءَ ھما بنگالیاں کہ پاکستان ٹھینتگ ات پد ءَ پہ وت ءَ یک جُتائیں ملک بنگلہ دیش ءِ لوٹ ءَ کن اَنت چریشی ءَ بنگلہ دیش ءَ جنگ، کُشت ءُ کوش ءِ آسے روک بوت ءُ اے سوب ءَ ھمے رَدین ءُ وتگڑیں دو راجی سَسّا پْروش ایت بزاں مھمد اَلی جناہ ءُ لیاکت اَلی ھان ءِ بے ابرمی ءُ بے بُنیاتیں پاکستان دو بَھر بیت ءُ پاکستان ءِ یک لک پوج ھندوستان ءِ دیم ءَ یک اُلسی سرجھلی یے (پبلک سرینڈرے) کنت۔ 1973-77 ءَ نمیرانیں راجی بامرد ءُ بابائے بلوچستان ءُ راجی ھستی نواب ھیربکش مری، نمیرانیں گوس بکش بزنجو ءُ راجی بامرد سردار اتا اللہ منگل ءَ بلوچ راجی آجوئی ءِ چیرجنگیں جُھد ءِ سیمی جُنز بُنگیج کت۔ اے سیمی جنگ ءَ بلوچستان ءِ بازیں ھند ءُ دمگ ءِ مردماں بَھر زرتگ انچوشکہ گْوستگیں دوئیں چِیرجنگ دمگی ءُ میتگی یے بیتگ اَنت۔ ماں اے جنگ ءَ بلوچ راج ءَ بے کساس کربانی داتگ ءُ در پہ دریں زند گْوازینتگ انت۔ ناھکیں کُشت ءُ کوش ءِ تُرس ءَ بازیں کساسے ءَ بلوچ کُٹم چَہ وتی ماتیں ڈیھ ءَ لڈات ءُ اوگانستان ءُ دگہ جاہ شُتگ اَنت اے جنگ ءَ بے کساس بزگیں لس مھلوک مُرتگ اَنت، ھاسکار مری بلوچ ءِ چُکچینی کنگ بوتگ۔ یک کساسے ءَ رِد ءَ کاسگ چٹّیں بھٹو ءِ پرمان ءَ پاکستانی پوج ءَ سَے ھزار مری بلوچ ءِ چُک، زالبول ءُ ورناہ یک روچ ءَ کُشتگ ءُ گار ءُ بیگواہ کتگ اَنت۔ اے جنگ چَہ گْوستگیں جنگاں باز تْرُند ءُ دْراج اَت۔ اے جنگ ءَ بلوچ راج ءَ گیشتر سرپدی ءُ آگاھی دات کہ بلوچ اے استان ءِ سُومی شمار ءِ مردم اَنت بزاں گلامی ءِ گُڈسر درجگ!!! پد ءَ بلوچ راج ءِ ھر وڑیں لوٹ ءُ پُل کنگ بوت۔ راج ءِ ڈگار چیریں امبار ٹیل، گیس، تَنگو، تلاہ، ھر وڑیں گواچِن ءُ زِر دُراہ چَہ بلوچ ءِ دست ءَ پُلگ بوتگ اَنت۔ دژمن ءَ بلوچستان ءِ ھر دمگ ءُ میتگاں وتی کاسگ چٹّیں سردار، نواب ءُ دمگدار پہ راج ءِ لس مھلوک ءِ گلام کنگ ءَ داشتگ اَنت کہ لس مھلوکیں بلوچاں راجی آجوئی ءُ راجی جُنزانی بارہ ءَ سرپد مہ بیت۔ چہ بلوچ راج ءَ آئی ءِ راجی زبان زَبھر کنگ بیتگ اَنت، بلوچ ءِ رواج، دود ءُ ربیدگ لگتمال کنگ بیتگ اَنت۔ البت اے میان ءَ بابا ھیر بکش مری ءَ گوں وتی راجی جُھدکاراں بلوچ راجی آجوئی پیگام بلوچستان ءِ ھر دمگ ءُ میتگاں سر کنائینت۔ بلوچستان ءِ کُنڈ کُنڈ ءَ راج ءِ لس مھلوک ءَ راجی آجوئی سکین ءُ آگاھی یے داتگ، باز ژند ءُ پندیں تکانسری ءُ زھمت کشی ءِ برورد ءَ بلوچ ءِ ھر دمگ ءَ، بگر گْوادر، ھب، ڈیرہ گازی ھان، ڈیرہ بگٹی، کوھلو، سبی، شال، مستونگ، کلات، چاگی، نوشکی پنجگور ، ھُزدار، کیچ ءُ روایرشُت ءُ رودرآتک بزاں ھر جاہ بلوچ لس مھلوک ءَ گلامی ءِ پِٹّ ءُ راجی آجوئی ءِ بابت ءَ گپ ءُ ھبر کت انت چریشی ءَ بلوچ چاگِرد ءِ تہ ءَ (گوں راجی ندکار، کواس ءُ شائِرانی جُھداں ھوار) راجی آجوئی ءِ بلاھیں آشوبے ودی بوت۔ پد ءَ 9/11 ءِ ویل ءِ رند گیدی تب ھر وھد یکپارگی بدل بیتگ اَنت ءُ 2003 یک رندے پد ءَ شھید بالاچ مری، شھید جنرل اسلم بلوچ وڑیں راج ءِ وانندگیں سرکماش ءُ راجی بامرد ءُ نمیران ڈاڈا بلوچستان شھید نواب اکبر ھان بُگٹی ءِ وڑیں راجی زانتکار ءُ بَلدیں راجی رھشُوناں بلوچ راجی آجوئی ءِ چارمی چیرجنگ بُنگیج کت ءُ داں مرچیگیں روچ ءَ اے جُھد گوں بے کساسیں سوباں دیم ءَ روان انت۔ اگاں ما گیدی ءِ ھر وڑیں راجی جُھدانی بابت ءَ بہ وان ایں گُڑا ما زانیں کہ بے کربانی ءُ بے سرانی ندر کنگ ءَ ھجبر آجوئی نہ رس ایت پمیشکا بلوچستان اے ھستیں وھد ءِ راجی جُھد باز سیاسی رھشون، کواس ءُ باسک ھم شھید کنگ بوت اَنت ءُ ھمے شھیدانی ھون ءِ برکت ءَ آجوئی ءِ چراگ مُدام ءُ یکشل ءَ بلان انت ءُ راج ءِ گلامی تھارموریں دگ روژناہ انت ءُ چوشیں کربانی ءِ برکت ءَ مرچی مجید برگیڈ، براس، بلوچ آجوئی لشکر بی ایل اے اولی سنگر ءِ پتھ اسکواڈ، ھاسیں شستانی پیلو کنگ ءَ اسپیشل ٹینیکل آپریشن اسکواڈ وڑیں راجی گل مئے دیم ءَ اَنت پمیشکا ما دلجم ایں کہ ما زیت وتی ڈیھ ءِ وتواجہ بَہ ایں چی ءَ کہ ما گِندگ ءَ ایں کہ ماں مرچیگیں بلوچ راجی جنگ ءَ آکسپارڈ یونیورسٹی ءِ دربُرتگیں شھید ڈاڈا نواب اکبر ھان بُگٹی، ماسکو یونیورسٹی ءِ دربُرتگیں شھید بالاچ مری، شھید شھداد، شھید اھسان، شیھد آپتاپ جتک ءُ دِگہ بازیں وانِندگیں سرمچار شھید بیتگ ءُ ھزارانی کچ ءَ بلوچ وانندگیں چیرجنگول راجی آجوئی ءِ سِلاھبندیں جُنز ءَ دیم ءَ برگ ءَ انت ءُ بازیں کچّے ءَ راجی سِلاھبندیں گل ءَ ھوار بوگ ءَ اَنت۔ مرچی بلوچستان ءِ ھر دمگ ءَ بلوچ راجی سرمچار راجی آجوئی ءِ ھاتر ءَ دژمن ءِ ھلاپ ءَ چیرجنگ ءَ ھوار اَنت۔ پاکستان ءِ جبر ءُ زُلم ءِ آسر ءَ بلوچ راجی جُھد ءَ ھر وھد ءَ ھاٹیگ رستگ چی ءَ کہ اگاں زُلم گیشتر بیت گُڑا زلم اَلم یک روچے ءَ ھلاس بیت، اگاں زُلم کم بیت گُڑا پہ آئی ءِ ھلاس کنگ ءَ چاگِرد آگاہ نہ بیت۔۔۔۔ روان انت۔۔۔۔