ریڈیو زْرمبش بلوچی | ریڈیو زْرمبش بلوچی

مارا بیگواھیں مردمانی کھولاں نشتر نادراھجاہ ءَ انچوکیں بازیں کچے ءَ جونانی دست کپگ ءَ گیش تُرس آماچ کرتگ۔ سمی دین

مارا بیگواھیں مردمانی کھولاں نشتر نادراھجاہ ءَ انچوکیں بازیں کچے ءَ جونانی دست کپگ ءَ گیش تُرس آماچ کرتگ۔ سمی دین

OCT

19

کراچی: ملتان ءِ نشتر نادراھجاہ ءَ سدانی کَچ ءَ ژانگولیں جونانی دست کپگ ءُ سی ٹی ڈی ءِ دروگیں میڑ ءَ زورانسری بیگواھیں مردمانی درکانودی کشگ ءِ بگیری ءَ بیگواھیں بلوچانی توار ( وی بی ایم پی ) ءِ نیمگ ءَ کراچی پریس کلب ءَ پریس کانپریس کنگ بیتگ۔ پریس کانپریس ءَ بیگواھیں ڈاکٹر دین مھمد ءِ جنک ءُ وی بی ایم پی ءِ کارگشاد سمی دین ءَ گوں اھوالکاراں تران کرتگ ءُ گوشتگ کہ ما شمارا یات دیگ لوٹ ایں گْوَستگیں روچاں پنجاپ ءِ شھر ملتان ءِ نشتر نادراھجاہ ءَ بازیں ژانگولیں جونے دست کپتگ اَت۔ پہ آیاں نادراھجاہ ءِ واکدار ءُ پنجاپ سرکار ءِ نیمگ ءَ شکی ئیں درشان دیم ءَ پیداک اَنت، پنجاپ ءِ مزن وزیر ءِ مشیر ءَ وت اود ءَ سدانی کچ ءَ جونانی ایر بیگ ءِ گپ کرتگ اَت، وھدے مارا بزاں زورانسری بیگواھیں مردمانی کھول ءُ گَل ءَ انچوکیں مزنیں کچے ءَ ژانگولیں جونانی دست کپگ ءَ تُرس آماچ کرتگ۔ ھمے جونانی اکس ءُ تامر بند رسانکدر ءَ شنگ کنگ بیتگ اَنت چہ آیاں ھمے گندگ بیت کہ اے جون سک ءَ باز اَنت ءُ اے زوانسری بیگواھیں مردمانی بنت کہ آیاں ءَ لشکر ءَ آزار دیگ ءَ پد کشتگ ءُ نادراھجاہ ءِ واکدارانی دست داتگ اَنت۔ ھما اِنت اے باروا مردم گوشگ ءَ اَنت کہ کجام ھم نادراھجاہ ءَ پہ نودربرانی دربرگ ءَ انچکیں مزنیں کچے ءَ مردمانی جون ایر کنگ نہ بنت۔ پمیشکا ما گوں پاکستان ءِ مزن آمیدگس ءُ مردمی اگبالانی ادارھاں لوٹ کن ایں کہ دست کپتگیں جون شریں وڑے ءَ پَٹ ءُ پول کنگ ءُ جونانی ڈی این اے آزمائش کنگ بیت ءُ راستی ءَ دیم ءَ بْیار اَنت۔ آئی ءَ گوشتگ کہ ما جولائی ءِ ماہ ءَ زیارت ءَ یازدہ زورانسری بیگواھیں مردمانی دروگیں میڑ ءَ کشگ ءِ بگیری، آیانی کھولانی مزدانک دیگ، دروگیں میڑانی گِر ءُ دار کنگ ءُ پہ زورانسری بیگواھیں مردمانی آجوئی ءَ 22 جولائی داں 8 ستمبر ءَ شال ءَ پنجاہ روچاں پُرایمنیں زھرشانی ءَ نشتگ ایں۔ چہ سرکار ءِ نیمگ ءَ بنجاھی وزیرانی نبشتھی دلبڈی ءِ سر ءَ وتی زھرشانی ھلاس کرتگ۔ مارا دروگیں دلبڈی دیگ بیت ءُ آئی ءِ سر ءَ کردی گامگیج زورگ نہ بیت۔ ما چہ بنجاھی سرکار ءِ نیمگ ءَ آتکگیں پتر ءَ سے ماہ ءِ موہ دیگ ءِ ھواری ءَ ھمے زورانسری بیگواھیں مردمانی لڑ داتگ اَنت کہ اود ءَ درسیں ھما بیگواھیں مردمانی کھول نندانک ءَ مئے گوں ءِ ساڑی بیتگ اَنت۔ ھمے داتگیں لڑ ءِ سی ءُ ششمی نمبر ءَ تابش وسیم ءِ نام اِنت کہ آ گْوَستگیں روچ ءَ سی ٹی ڈی ءَ نوشکے ءَ دروگیں میڑ ءَ کشتگ۔ آئی ءَ گوشتگ کہ مئے ننداک ءِ ھلاسی ءَ پد داں چِل روچاں چِل مردم ءِ نزیک ءَ مردم زورانسری بیگواہ کنگ بیتگ۔ وھدے سی ٹی ڈی ءَ بلوچستان ءِ جتاھیں جاھاں پنچ دروگیں میڑاں داں انوگ ءَ ھژدہ مردم کشتگ۔ چہ آیاں گیشتریں مردمانی پجار چہ زورانسری بیگواھیں مردماں زانگ بیتگ اَنت کہ آ دیریگیں بند بیتگ اَنت۔ گْوَستگیں روچاں دو جاھاں سی ٹی ڈی ءِ دست ءَ نوہ مردم دروگیں میڑاں کشگ بیتگ۔ چہ آیاں پنچ مستونگ ءُ چار نوشکے ءَ کشگ بیتگ۔ چہ نوشکے ءِ کشگ بیتگیں چاریں مردماں سے مردمانی پجار چہ پیسر ءَ زورانسری بیگواھیں مردماں بیتگ کہ آیانی کیس مئے گَل ءِ کِر ءَ ھست اَنت۔ چہ آیاں تابش وسیم 9 جون 2021 ءَ شال زورانسری بیگواہ کنگ بیتگ کہ آئی ءِ دوست ءُ سْیاد نندانک ءَ ھوار بیتگ اَنت، آئی ءِ کیس ھمے لڑ ءَ ھوار اِنت ما بنجاھی پتر ءَ داتگ۔ سمی دین ءَ گوشتگ کہ اے سے ئیں ماھانی تہ ءَ زورانسری بیگواھی ءُ دروگیں میڑاں بیگواھیں مردمانی کشگ ءِ گِر ءُ دار کنگ ءَ کردی گامگیج زورگ نہ بیتگ ءُ بلکیں ایشی ءِ تہ ءَ تیزی گندگ بیگ ءَ اِنت۔ دو روچ پیش کراچی ءِ ھند لیاری ءَ چیل چاراہ ءَ لشکر ءَ بلوچستان کیچ دمگ ءِ جھمنند سے مردم زھیر، چاکر ءُ سراج ءَ زورانسری بیگواہ کرتگ اَنت کہ انگت ءَ بیگواہ اَنت۔ گْوَستگیں دو ماھانی تہ ءَ زورانسری بیگواھی ءِ تہ ءَ تیزی، دروگیں میڑا زورانسری بیگواھیں مردمانی کشگ، ملتان ءِ نشتر نادراھجاہ ءَ بازیں ژانگولیں جونانی دست کپگ ءَ مئے تُرس سک ءَ گیش کرتگ۔ چے مارا چہ اے وئیلاں ھمے کلوہ ءَ دیگ ءَ اَنت کہ پُر ایمنیں زھرشانی، نندانک ءُ کانود رد ءَ مارا چہ اے ریاست ءَ ھچ رست نہ کنت؟ ما اے ڈیھ ءِ یک پُرایمنیں شھری یے ءِ بستار ءَ پہ اگبال ءِ رسگ ءَ زھرشانی ءِ درسیں راھبند ءُ کانودی وڑ ءُ پیم چکاسگ اِتگ اَنت۔ سرکار ءِ نیمگ ءَ جوڑ کرتگیں کمیشن ءُ پترانی دیم ءَ پیش بیتگ ایں ءُ چہ آیانی دلبڈیاں وتی زھرشانی پروگرام ھلاس کرتگ اَنت۔ ما ھمے سرپد بہ ایں کہ ریاست ءَ مئے ھچ پرواہ نیست ءُ نہ چہ مئے زھرشانیاں توانمنْدیں ادارہ سانمَنْد بنت۔ یا پد ءَ انوگیں سرکار ءَ مارا ھمے نبشتہ بہ کنت ءُ بہ دنت کہ اے توانمَنْدیں ادارہ مئے گپ ءَ گوش دارگ ءَ نہ اَنت۔ مارا چہ دروگیں دلبڈیاں اَبید گوں تچکیں لبزاں بہ گوش اَنت کہ ما اے توانمَنْدانی دیم ءَ بے وس ایں۔ آئی ءَ پریس کانپریس ءِ گُڈی ءَ گوشتگ کہ ما شمئے اھوالکارانی منتوار ایں کہ شما مارا وھد داتگ ءُ گوش داشتگ، ما ھمے اوست ءَ دار ایں شما ھمے وئیلاں نبشتہ کن اِت ءُ پہ ایشانی گِر ءُ دار کنگ ءَ مئے توار جوڑ بہ اِت۔ پریس کانپریس |اکس: اھوالکار