ریڈیو زْرمبش بلوچی | ریڈیو زْرمبش بلوچی

کندھار: اوگانستان ءِ گوریچانی استان کندھار ءَ تالبان لشکر ءَ دو شکی ئیں مردم دزگیر کرتگ کہ آ بلوچ باھوٹیانی گِساں شتگ اَنت ءُ وت ءَ تالبان پدر کرتگ اِش۔ تالبان لشکر ءِ یک کارمَنْدے ءَ دو مردم ءِ دزگیر کنگ ءِ گپ راست کرتگ ءُ گوشتگ کہ میارباراں جُست ءُ پُرس ءِ وھد ءَ اے گپ منّ اِتگ کہ مارا چہ پاکستانی چیریں ادارھانی نیمگ ءَ بازیں زُرے دیگ بیتگ کہ بلوچ باھوٹیاں نشانگ بہ کن اِت، آیاں کندھار ءَ پاکستانی کونسل جاہ ءِ یک کارمَنْدے ءِ نام ءُ نشان داتگ اَنت کہ آئی ءَ بلوچ باھوٹیانی گسانی ھال داتگ اَنت۔ یات بہ بہ اِت چہ پاکستانی لشکر ءِ زوراکیاں بازیں بلوچاں وتی گِس ءُ جاہ یل داتگ اَنت ءُ روکپتی بلوچستان ءُ اوگانستان ءِ جتاھیں ھنداں باھوٹ اَنت۔ بلے آ اوگانستان ءُ روکپتی بلوچستان ءَ ھم پھریز نہ اَنت، چہ پاکستانی لشکر ءِ جوڑ کرتگیں کشندہ ٹولی ءِ کارمَنْدانی اُرشاں چنچو بلوچ باھوٹی شھید کنگ بیتگ۔ بنشون: اھوالکار | اکس: دامگ