ریڈیو زْرمبش بلوچی | ریڈیو زْرمبش بلوچی

اکوام متھدہ ءَ چہ تالبان لشکر ءَ جنکانی وانگ ءِ سر ءَ جنگ بیتگیں پابندی ءِ ھلاس کنگ ءِ لوٹ کرتگ

اکوام متھدہ ءَ چہ تالبان لشکر ءَ جنکانی وانگ ءِ سر ءَ جنگ بیتگیں پابندی ءِ ھلاس کنگ ءِ لوٹ کرتگ

SEP

19
19 / 09 / 2022 اوگانستان 50

واشنگٹن: اکوام متھدہ ءَ سالے ءَ پیش اوگان جنکانی وانگ ءِ سر ءَ جنگ بیتگیں پابندیانی سر ءَ بژن درشانتگ ءُ اے پابندی ایر جتگ اَنت. اکوام متھدہ ءَ تالبان لشکر زور داتگ کہ آ تیوگیں اوگانستان ءَ جنکانی وانگجاھاں دو بَر پچ بہ کن اَنت۔ گوستگیں سال ءِ اگست ءَ اوگانستان ءِ ماں تالبانانی دست ءَ کپگ ءَ لھتے ھپتگ ءَ پد تالباناں 18 ستمبر 2021 ءَ تیوگیں ڈیھ ءِ بچکانی مزن وانگجاہ پچ کرتگ اَنت بلے جنکانی ماں مزن وانگجاھاں روگ ءِ سر ءَ پابندی جتگ. لھتیں ماھاں پد 23 مارچ ءَ اوگانستان ءِ وانَگی وزیر ءَ جنکانی وانگجاہ پچ کرتگ اَنت بلے تالبان لشکر ءَ لھتے ادارانی تہ ءَ وانگجاھانی دوبر بند کنگ ءِ پرمان داتگ۔ اوگانستان ءَ اکوام متھدہ ءِ کمکی مشن ( یو این اے ایم اے) ءَ یک شمبے ءِ روچ ءَ وتی یک درشانے ءَ گوشتگ کہ سرجمیں ڈیھ ءَ دہ لک ءَ گیش کسان سالیں جنک چہ وانگ ءَ زبھر اِنت۔ یو این اے ایم اے ءِ سروک مارکس پوتزل ءَ گوشتگ کہ جنکانی وانگ ءِ سر ءَ پابندی جنگ جنکانی یک پدریچے ءُ پہ اوگانستان ءِ باندات ءَ زنڈیں تاوانے۔ آئی ءَ گوشتگ کہ جھان ءِ تہ ءَ ھچ جاہ ءَ اے وڑیں پابندیانی دور دست نہ کپ ایت۔ بنشون: جھانی رسانکدر | اکس: دامگ