ریڈیو زْرمبش بلوچی | ریڈیو زْرمبش بلوچی

تالباناں اوگانستان ءِ راجی گھگیری سنگر ءِ دزگیر بیتگیں بازیں کارمندے تیر جتگ ءُ کشتگ

تالباناں اوگانستان ءِ راجی گھگیری سنگر ءِ دزگیر بیتگیں بازیں کارمندے تیر جتگ ءُ کشتگ

SEP

15
15 / 09 / 2022 اوگانستان 56

پنچشیر: تالباناں اوگانستانی ءِ گوریچانی دمگ پنچشیر ءَ اوگانستان راجی گھگیری سنگر (جبهه مقاومت افغانستان) ءِ کارمندانی بگیری ءَ مزنیں لشکرکشی یے بندات کرتگ ءُ اے لشکرکشی ءِ میان ءَ آھاں اوگانستان ءِ راجی گھگیری سنگر ءِ بازیں دزگیر بیتگیں کارمندے تیر جتگ ءُ کشتگ. رسانکدراں سے تامربند شنگ بیتگ کہ آھانی تہ ءَ گندگ بیت کہ تالبان اوگانستان راجی گھگیری سنگر ءِ دست بستگیں کارمنداں تیرگوار کنگ ءَ اَنت. اوگانستان راجی گھگیری سنگر ءُ رسانکدراں سیاسی کارکناں تالبانانی اے کار ایر جتگ ءُ انسانی اگبالانی ءُ جنگی کانودانی بگیری لیک اِتگ. اوگانستان راجی گھگیری سنگر ءَ وتی شنگ کرتگیں درشانے ءَ گوشتگ کہ تالبان پروپگنڈہ کنگ ءَ اَنت کہ آھاں اوگانستان ءِ راجی گھگیری سنگر باز تاوان داتگ ءُ نزور کرتگ بلے چوش نہ اِنت ءُ مردم اے پروپگنڈھاں باور مہ کن اَنت. اوگانستان راجی گھگیری سنگر اوگانستان ءِ ماں تالبانانی دست ءَ کپگ ءَ پد اھمد مسھود ءِ سروکے ءَ دیم ءَ اتکگ ءُ تالبانانی بگیری ءَ گھگیری کنگ ءَ اِنت، اے گلّ ءِ بُنجاہ اوگانستان ءِ گوریچانی دمگ پنچشیر زانگ بیت بلے اے گل پنچشیر ءَ ابید اوگانستان ءِ دگہ دو سے گوریچانی دمگ ءَ ھم کار کنگ ءَ اِنت. بنشون: جھانی رسانکدر | اکس: دامگ