ریڈیو زْرمبش بلوچی | ریڈیو زْرمبش بلوچی

جاؤ: آواران ءِ ھند جاؤ ءَ سلاہ بندیں مردماں مردمانی تیرگواری ءَ ورنایے بیران بیتگ۔ اھوالکار ءِ رد ءَ بیران بیتگیں ورنا ءِ نام امان اللہ ء سید مھمد نور اِنت کہ آ جاؤ پتکی ءِ جھمنند اِنت۔ سلاہ بندیں مردماں دوشی شپ ءِ ادار چار ءَ مروکی ءَ گسے ءَ بیڑ برتگ، تیرگواری کرتگ ءُ کشتگ۔ بیران بیتگیں امان اللہ ءِ بارو ءَ گوشگ بیگ ءَ اِنت کہ آئی دیر اِنت چہ پتکی ءَ لڈ ءُ بار کرتگ ءُ جاؤ ملان ءَ نشتگ۔ لھتیں روچ پیش ملان ءَ اسمائیل نامیں مردمے کہ آ کشندہ ٹولی ءِ کارمند اِنت گوں آئی ءَ مڑ اِتگ ءُ کشگ ءِ بیھار داتگ پہ زور لڈینتگ۔ آئی ءَ سے روچ بیت کہ لڈ اِتگ ءُ مروکی ءَ آتکگ سلاہ بندیں مردماں دوشی شپ ءِ ادار چار ءَ نشانگ کرتگ۔ ھندی مردم انچوش گمان کنگ ءَ اَنت کہ امان اللہ ء سید مھمد نور ءَ کشندہ ٹولی ءِ کارمند سلیم ء لالو ءُ اسمائیل ءَ تیرگواری کرتگ ءُ کشتگ۔ بنشون ءِ رد ءَ 4 اپریل 2017 ءِ شپ ءَ پاکستانی کشندہ ٹولی ءِ کارمنداں کیلکوری ءَ بیڑ برتگ اَت ءُ ھمے کھول ءِ سَے مردم بائیان ء لال مھمد آئی زھگ پیرجان ء بائیان ءُ آئی ءِ ھشت سالی نماسگ کمبر تیرگواری کرتگ ءُ کشتگ اَت۔ پاکستانی لشکر ءُ کشندہ ٹولی ءِ کارمنداں بائیان ءُ آئی زھگ ءُ نماسگ ءِ کوش بلوچ آجوئی لوٹوکیں سلاہ بندیں گَل بی ایل ایپ ءِ نام ءَ کنگ ءِ جھد کرتگ اَت ءُ واجہ باگ ءَ بی ایل ایپ ءِ بگیری ءَ روانکے کش اِتگ اَت۔ چہ بازیں پَٹ ءُ پولاں ھمے پدّر بیتگ اَت کہ بائیان ءُ آئی زھگ ءُ نماسگ ءِ کشندہ چہ آیانی کُشگ ءَ پد واجہ باگ ءَ پاکستانی لشکر ءِ پانگس ءَ شُتگ اَنت۔ بنشون: زْرمبش اھوالکار | اکس: اھوالکار