ریڈیو زْرمبش بلوچی | ریڈیو زْرمبش بلوچی

روکپتی بلوچستان ءَ بشی ھوراں پنچ مردم بیران بازیں میتگے ءَ ھار مَل اِتگ

روکپتی بلوچستان ءَ بشی ھوراں پنچ مردم بیران بازیں میتگے ءَ ھار مَل اِتگ

JUL

28

روکپتی بلوچستان: جتا جتاھیں جاھاں بشی ھورانی سوب ءَ پنچ مردم بیران ءُ بازینے میتگے ءَ ھار ملّ اِتگ. اھوالکار ءِ رد ءَ بیران بیتگیں مردماں دو زھگ روکپتی بلوچستان ءِ بنجاھی شھر دزاپ ءَ گسے ءِ لُمبگ ءَ چیر تر اتگ ءُ بیران بیتگ انت، دگہ دو مردم دزاپ ءَ ھور ءِ وھد ءَ لین ءَ گپتگ ءُ بیران بیتگ اَنت۔ دگہ یک مردمے ماں پهره (ایرانشهر) ءَ ھور ءِ سوب ءَ دگ وئیلے ءِ آماچ ءُ بیران بیتگ. سرکاری ھسابانی رد ءَ چہ بشی ھوراں 86 میتگ ءَ آپ مل اتگ ءُ 1800 ءَ گیش مردماں تاوان بیتگ. بنشون ءِ رد ءَ ھوراں پد بلوچستان ءِ سرجمیں مزن کور چوش کہ کاجو، سرباز ءُ سوران ءِ کوراں ھار کرتگ، کاجو ءِ کور ءِ ھار ءَ بازیں میتگے چوٹ آباد ءُ چنڈوکان ءِ ورگی آپ ءِ پیمپ لین آپ ءَ گوں وت برتگ انت. بلوچستان ءِ تیاب دپی شھر کنرک ءِ کش ءُ گوراں ھم بازیں میتگے ءِ ورگی آپ ءِ پیمپ لین ھار ءَ گوں وت برتگ ءُ مهلوک چہ ٹینکراں آپ ءِ زورگ ءَ لاچار انت، گیشیں ھورانی سوب ءَ بازیں زمانگی کلات ءُ جاگھاں ھم تاوان بیتگ. بنشون ءِ رد ءَ تیزیں ھورانی سوب ءَ سرباز ءِ کلات ءِ گوریچانی دیوال لُمب اتگ ءُ گِھ (نیکشھر) ءِ کلات ھم تاوان بار بیتگ. بنشون: اھوالکار | اکس: دامگ