ریڈیو زْرمبش بلوچی | ریڈیو زْرمبش بلوچی

ھونیگیں آدینگ ءِ وئیل بھ شموشگ نہ بیت۔ دزاپ ءِ مکی مسیت ءَ سروکانی نیاد

ھونیگیں آدینگ ءِ وئیل بھ شموشگ نہ بیت۔ دزاپ ءِ مکی مسیت ءَ سروکانی نیاد

OCT

06
06 / 10 / 2022 روکپتی بلوچستان 106

دزاپ (زاھدان): روکپتی بلوچستان ءِ بنجاھی شھر دُزاپ ءِ مکی مسیت ءَ روکپتی بلوچستان ءِ دینی راھشون، چاگردی سروک ءُ بلوچستان ءِ ماں ایرانی پارلیمان ءَ شش جھگیراں دزاپ ءِ ھونیگیں آدینگ ءِ بارہ ءَ نیادے کرتگ۔ اے نیاد ءَ روکپتی بلوچستان ءِ دینی ءُ سیاسی سروک مولوی ابدلھمیداسمائیل زھی ءَ ھوار آدگہ بازیں سروکاں تْران کرتگ۔ آھاں ھونیگیں آدینگ ءِ وئیل ایر جتگ ءُ گوشتگ اے انچیں وئیلے کہ بھ شموشگ نہ بیت، اے روچ مدام سیاھیں روچے ءِ بستار ءَ یات کنگ بیت، اے ھما روچ اِنت کہ اے روچ ءَ سدانی کساس ءَ بے میاریں نمازی مردم تیرگوار کنگ بیتگ اَنت ءُ آھانی ھوناں دزاپ ءِ زمین میچلینتگ. تْران کنوکاں گْوشتگ کہ مارا گمان نہ بیتگ کہ مسیت ءِ تہ ءَ ھم چوشیں وئیل بیت کنت ءُ دست ءُ گوشیں مردم تیرگوار کنگ بہ اَنت، آھاں گْوشتگ کہ بازیں مردمانی نیمگ ءَ ھمے گپ دیم ءَ آیگ ءَ اِنت کہ اے وئیل ءِ پشدر ءَ آجوئی لوٹوکیں گلانی دست ھوار اِنت بلے اے گپ ءَ ھچ وڑیں راستی نیست. مولوی ابدلھمید ءَ تْران کنان ءَ گْوشتگ کہ یک نیمگے چیزے ورنا بیتگ اَنت کہ سنگ اِش ماں دست ءَ بیتگ ءُ دومی نیمگ ءَ سرکاری پھازداراں ارس ءِ گیس ءُ پہ مھلوک ءِ شنگ ءُ شانگ کنگ ءَ دگہ ساز ءُ سامانانی کارمرد کنگ ءِ جاہ ءَ زھرشانی کنوکیں ورنا ءُ بے میاریں نمازی مردم تیرگوار کرتگ اَنت۔ مولوی ابدلھمید ءَ گْوشتگ کہ نمازی مردم بے میار ءَ نشانگ کنگ بیتگ اَنت ءُ ایشی ءَ ابید ھم آھاں وت ءَ ایمن داشتگ. ملا ابدلھمید ءَ ھوار نیاد ءَ ساڑی ئیں آدگہ سروکاں اے وئیل سرکاری واک ءُ پولیس کارمندانی بے پروائی لیک اِتگ ءُ اے وئیل ءِ پُشدر ءَ دری واکانی دزمانجنی ءِ گپ رد کرتگ۔ نیاد ءَ ساڑی ئیں سروکاں چہ سرکار ءَ ھونیگیں آدینگ ءِ بارہ ءَ تچکیں پٹ ءُ پول ءُ اے ھونیگیں وئیل ءَ ھواریں کارمندانی سزا دیگ ءِ لوٹ کرتگ. دزاپ ءَ مکی مسیت ءِ نیاد ءَ ھواریں سروکاں ھونیگیں آدینگ ءِ وئیل ءِ بارہ ءَ پترے ءِ جوڑ کنگ ءُ ایشی ءِ بارہ ءَ گوں ھیرت چاری ءَ پٹ ءُ پول ءُ ھواریں کارمنداں شزا دیگ ءِ لوٹ کرتگ۔ نیاد ءَ ھواریں سروکاں اے وئیل ءِ بارہ ءَ ایرانی رسانکدر ءِ شنگ کرتگیں ھال دروگ لیک اتگ اَنت ءُ گْوشتگ کہ اے وڑیں دروگیں ھال ءِ شنگ کنگ مھلوک ءِ ٹپاں واد پر ریچگ ءِ برابر ءَ اِنت۔ آیاں گْوشتگ کہ اے جیڑہ سیاسی جیڑھے ءُ سرکار باید توپک ءِ زور ءَ گوں مردماں دیم پہ دیم مہ بیت بلکیں اے وڑیں جیڑھاں سیاسی دْروشم ءَ گیش ءُ گیوار کنگ ءِ جھد ءَ بہ کنت۔ نیاد ءِ گڈسر ءَ مولوی ابدلھمید ءَ ھونیگیں آدینگ ءِ وئیل ایر جتگ ءُ چہ سرکاری واکاں لوٹ کرتگ کہ شریں وڑے ءَ ایشی ءِ پٹ ءُ پول ءَ بہ کن اَنت۔ آئی ءَ گْوشتگ کہ سرکاری واکدارانی نا دلگوشی ءُ اے جیڑہ ءَ دگہ نیمگے ءَ برگ جاوراں ھراب تر کن اَنت پمیشکا باید ھمیش اِنت کہ سرکار اے وئیل ءِ بارہ ءَ شریں وڑے ءَ پٹ ءُ پول بہ کنت ءُ اے ویل ءَ میارباریں واک ءُ پولیس کارمنداں سزا بہ دنت. نیاد ءَ ساڑی ئین سروک ءُ مردماں گوشتگ ھرچ مردمے کہ اے ویل ءَ پد گرگ ءُ زندانی کنگ بیتگ باید درست یل کنگ بہ بہ اَنت ءُ بلوچستان ءَ سرکاری روشتانی تہ ءَ بدلی آرگ بہ بیت ءُ پہ سرکاری واکانی زوراکی ءِ گِر ءُ دار کنگ ءَ گامگیج زورگ بہ بیت۔ بنشون: سنی آنلاین | اکس: سنی آنلاین