ریڈیو زْرمبش بلوچی | ریڈیو زْرمبش بلوچی

بلوچستان ءِ ملنگیں پیدرل کاسترو-نبشتانک:بی بی سی ارود/رجانک:ھنیپ بلوچ

بلوچستان ءِ ملنگیں پیدرل کاسترو-نبشتانک:بی بی سی ارود/رجانک:ھنیپ بلوچ

JUN

27
27 / 06 / 2021 نبشتانک 66

”اے مرد بلوچستان ءِ پیدرل کاسترو اِنت۔اگاں ٹکی سردار ءُ نواب پہ دل ایشی ءِ ھمراھداری ءَ بہ کن اَنت اے بلوچستان ءَ پکا کیوبا جوڑ کنت۔بلے اے ملنگ ایوک اِنت ءُ ایوک بیت۔"   چہ ملتان ءَ سیادی داروکیں چپ لیکہ ءِ دانشمند ءُ سیاست زانت سید مھمد کسور گردیزی ءَ اے دانک پہ شیر مھمد ھان مری ءَ گْوشتگ اَنت۔ مھمد کسور گردیزی راولپنڈی پندل کیس ءُ ھیدرآباد پندل کیس ءِ سوب ءَ دزگیر بیتگ اَت۔آئی ءِ سیادی چہ مالداریں گسے ءَ اَت ءُ نودربری ءِ زمانگ ءَ آئی چہ دیمروی دوستیں سیاست ءَ سان زُرتگ اَت ءُ میرگوس بکش بزنجو ءِ ھمراہ بیتگ اَت۔ گڑا آمردم کئے اِنت کہ گردیزی ءَ آ بلوچستان ءِ  کاسترو منّ اِتگ ءُ آئی پہ اے پنام ءِ سرجم کنگ ءَ بازیں جوانیں کِردے پیلو کُرتگ؟ اے مزنی شیر مھمد مری ئیگ اِنت کہ آ بلوچستان ءِ گھگیری زْرمبشت ءِ یک مزنیں کارستے بیتگ ءُ آئی بلوچستان ءَ اولی بر ءَ چیرجنگی ریپک کارمرد کُرتگ ءُ گوں پاکستانی لشکر ءَ جنگ کُرتگ۔آئی ءِ سرجمیں زندگی ماں کوھاں گھگیری،زیندان ءُ درانڈیھی ءَ گْوستگ۔   "بلوچستان ءِ مزن نامیں ندکار اکترالی ھان بلوچ ءَ نبشتگ کہ شیرمھمد مری،چہ مری ٹک ءِ بجارانی ٹکءَ سیادی داشتگ۔آئی ءِ پِت میر سیدان ھان ءَ ٹکی جیڑھے ءِ بنیاد ءَ چہ ھندوستان ءَ لڈّ اِتگ ءُ کندھار ءَ شتگ ءُ ھمود ءَ پد ءَ بیران بیتگ۔" شیر مھمد مری ءِ ناکو میر شربت ھان ٹک ءِ مستر بیتگ ءُ ٹک ءِ سروک سردار مھراللہ (نواب ھیر بکش مری ءِ پِت)زُرتگ ءُ چمن ءَ شُتگ ءُ شیر مھمد ءُ آئی ءِ چورھیں برات واتر سرڈگار ءَ آؤرتگ اَنت۔ شیر مھمد ءِ مستریں برات میر کرم ھان زمینداری کُرتگ،آئیءِکستریں برات میر بھرام ھان ءُ میر ھزار ھان سرکاری کارمند بیتگ انت ءُ شیر مھمد سیاست ءُ سلاہ بندیں گھگیری ءِ راہ گچین کُرتگ۔  دپگُپت ءِ شیر مھمد مری آئی ءِ پت ھم راجدوستے بیتگ ءُ سال 1918 ءَ مری گھگیری ءِ بنیاد ءَ آئی ءِ سرجمیں کھول ءَ درانڈیھی ءِ سزا دیگ بیتگ۔ شیر مھمد مری ءَ بس بنداتی وانگ دربُرتگ پمیشکہ آئی ءَ وتی  کِردی زندگی ءَ بازیں جنجال دیستگ۔آئی ٹیکسی ھلائینتگ،مُزوری کُرتگ۔آئی گْوشتگ کہ من وتی زمینانی سر ءَ وت کار کُرتگ ءُ وتی گس وت جپاکشی کُرتگ ءُ جوڑ کُرتگ اَنت۔   لندن ءِ روتاک’انڈیپنڈنٹ‘ ءَ آئی ءِ زندمان ءِ بارو ءَ اھوالکار ءُ ندکار اھمد رشید گْوش ایت کہ شیر مھمد ءَ بمبئی ءَ گوں کمیونسٹ پارٹی آپ انڈیا ءَ سیادی داروکیں مارکسِسٹ آں سان مند بیتگ ءُ اود ءِ مالدار گیشتر گوں روبرکت ءَ نزیک بیتگ اَنت،پمشکہ ایشانی میان ءَ شیر مھمد ءِ’پرولترین آشوب‘ ءِ لیکہ ءَ جاگہ نہ بیتگ۔ شیر مھمد ءَ پگر کُرتگ کہ راجدوستی ءُ کسانیں راجانی یکجاہ کنگ ءُ پُرکار کنگ ءَ آشوب آرگ بیت ءُ ھمے وڑ ءَ آ چہ ماسکو ءَ گیش ھوچی من ءُ ماؤ زے تنگ ءِ منوک بیتگ۔ شیر مھمد ھان مری ءَ سال 1946 ءَ بلوچستان ءَ’چیردستیں گل‘ ءِ بنیاد ایر کُرت۔اے ھما وھد اَت وھدے نواب ھیربکش مری،اتااللہ مینگل،نواب اکبر بگٹی ءُ سردار شیر باز مزاری لاھور ءِ ایچیسن وانشجاہ ءَ آدگہ سردار،نواب ءُ مالدارانی زھگانی ھواری ءَ وانگ ءَ بیتگ اَنت۔ ،،بلوچستان ءِ مزن نامیں ندکار"اکتر الی نبشتہ کنت کہ چیردستیں گل ءِ جوڑ کنگ ءِ یک مستریں مولے اِش بیتگ کہ سردارانی زورانسری باجگِری ءُ لُٹ ءُ پُل ھلاس کنگ بہ بیت۔ "اے گل ءِ اولی راجمانی پتر ءَ ھزارانی کچ ءَ مردماں بھر زُرتگ،ایشی ءَ پد شیرمھمد دزگیر کنگ بیتگ۔پد ءَ آئی ءِ لوٹوک یکجاہ بیتگ اَنت ءُ پاکستانی لشکر ءِ بنجلانی سر ءَ اُرش کُرتگ ءُ لشکر باز تاوان داتگ۔"   وھاب سد یکی ءَ سال 1978 ءَ الپتھ(الفتح) تاکبندے ءَ شیرمھمد مری ءِ ستاہ ءَ نبشتگ کہ آئی ءِ سر ءَ برتانیا ءِ تاج ءِ بگیری ءَ تران کنگ ءُ مردماں پہ گھگیری ءَ رد دیگ ءِ بھتام جنگ ءُ دزگیری ءَ پد سبی ءِ بندیگجاہ ءَ ھمک روچ 18 سیر دان ءِ دْرشگ پرماتگ۔ آ نبشتہ کنت کہ شیر مھمد  ایپ سی آر ءِ  بنیاد ءَ کہ دزگیر کنگ بیت،اے ردءَ میار ءِ زانگ ءَ ابید ھم داں سَئے سال ءَ ڈوھی نزر بند کنگ بیت۔سئے سال ءَ پد میاربار ءِ گھتر بیگ ءُ برتانیا ءِ تاج ءِ بگیری ءَ تران نہ کنگ ءِ دزوری گرگ بیت ءُ اگاں  آئیءَ چوش باور مہ کنا ئینت گڑا آئی ءَ دگہ سئے سال گیش بند کنگ بوتگ اَت۔   پاکستان ءِ جوڑ بوگ ءِ وھد ءَ شیر مھمد مری زندان ءَ بند بیت ءُ دوھمی سال ءَ بزاں 1948 یل کنگ بیت۔ کلات ءِ ھاکم ھان کلات میر اھمد یار ھان ءَ پاکستان ءِ جوڑ بوگ ءَ پیش کلات ءِ آجوئی ءِ جار جتگ اَت ءُ گوں پاکستان ءَ نزیکی کنگ ءَ گپ ءُ تران ءِ لوٹ کُرتگ اَت۔ھان ءِ اے گامگیج ءِ دُرسیں سرداراں پلہ مرزی کُرتگ اَت ءُ بلوچستان ءِ جتائیں ارزیشت ءِ برجاہ دارگ ءِ سر ءَ زور داتگ اَت۔ بلے پاکستان ءِ سرکار ھان ءِ اے گامگیج ءَ بگری یے سرپد بوت ءُ ایشی ءَ پد پاکستانی لشکر ءَ ھان کلات ءُ بلوچستان ءِ بگیری ءَ کارروائی کُرت۔گُڈی ءَ مئی 1948 ءَ ھان ءَ دست چست کُرت اَنت ءُ گوں پاکستان ءَ ھوار بوگ ءَ لاچار بوت،بلے آئی ءِ کستریں برات میر ابدالکریم ءَ اے سوڑگ ءِ بگیری ءَ جنگ کُرت۔ اھوالکار اھمد رشید ءِ رد ءَ شیر مھمد مری ھوار بیتگ بلے زوت لپاشگ بیتگ۔ ایشی ءَ پد وھدے پیلڈ مارشل ایوب ھان ءَ ون یونٹ آؤرت ءُ بلوچستان ءَ سرداری نزام ءِ ھلاسی ءِ جارپرینت گڑا بلوچستان ءَ جاک ءُ سلوات مَچ اِت ءُ مردماں استانی وتواکی ءِ لوٹ کُرت۔ شیر مھمد مری ءَ ھم ایوب ھان ءِ بگیری ءَ جنگ کُرت ءُ مری دمگ ءِ کوھاں شُت۔   سلیگ ھریسن وتی کتاب ’ان اوگانستانز شیڈو‘ ءِ تہ ءَ نبشتہ کنت کہ شیر مھمد مری ءِ کِرد سلاہ بندیں زْرمبشت ءِ تہ ءَ بنجاھی بیتگ ءُ اے زْرمبشت ءِ ’پراری‘بیتگ۔ شیر مھمد ءَ زانتگ کہ انچوش گوں تچکی ءَ جنگ کنگ نہ بیت پمشکہ آئی چین، کیوبا، ویتنام ءُ الجیریا ءِ دیم ءَ اتکگیں چیرجنگی ریپک زُرتگ اَنت۔ سلیگ ھریسن ءِ رد ءَ داں جولائی 1963،چیرجنگی جنگولانی 22 اوتاگ بیتگ اَنت،ھر اوتاگے ءَ 400 جنگول مدام ساڑی بیتگ،ایشاں ابید دگہ بازیں لس کمکارے ھم تیار بیتگ۔ اے پراریاں چہ پاکستانی لشکر ءَ گون ءَ مزنیں جنگاں وت ءَ پھریز کُرتگ ءُ چیرجنگی جنگ کُرتگ۔پسو ءَ پاکستانی لشکر ءَ ھم بُرزی اُرش کُرت۔گْوش اَنت کہ چوشیں اُرشاں مری دمگ ءَ شیر مھمد ءُ آئی ءِ سیاد ءُ مردمانی 13 ھزار ایکڑ کشار تباہ بیتگ۔ دسمبر 1964 ءَ 500 پراری ءَ یک بنجلے ءِ سر ءَ اُرش کُرتگ،ایشی آسر ءَ دُژمن ءَ بازیں تاوانے بیتگ۔سال 1969 ءَ ایوب ھان ءَ پد وھدے یھیاھان اتک ءُ ون یونٹ ھلاس کنگ ءُ جنگ بندی ءِ جار پرینگ بوت گڑا شیر مھمد ھم گُڈی ءَ ایمن بوت۔   میر مھمد الی تالپور ءِ پِت میر الی اھمد تالپور ءُ ناکو میر رسول بکش تالپور ءِ گوں میر شیر مھمد مری ءَ سکیں نز یکی یے بیتگ۔ 1960 ءِ دھک ءَ وھدےشیر مھمد درانڈیھ کنگ بوت گڑا ھیدرآباد ءَ ھمے مردمانی کِر ءَ روت ءُ  رند ءَ تالپور آئی ءِ دزور ھم بیت۔ میر مھمد الی تالپور وت ھم بلوچ گھگیری زْرمبشت ءِ بھر بیتگ ءُ  بلوچستان ءِ کوھاں بگر  داں    اوگانستان ءَ پندئِے بُرّ اِتگ۔ آئی ءِ رد ءَ سال 1963 ءَ شیر مھمد اولی بر ءَ شال ءِ نزیکیں کوھاں داشتگ ءُ پد ءَ مری دمگ ءَ شُتگ،ھمدا چہ آئیءَ پراری ایں بنجل آنی بنیاد ایر کتگ ءُ گوں مھکمی ءَ سلاہ بندیں جھدئِے بندات کتگ۔  ’ایشی ءَ پیش (کلات) ءِ پرنس کریم ءُ نواب نوروز ءَ ھم سلاہ بندیں جُھد کُتگ، بلے پہ ایشی ءِ مھکم ءُ زْرمبشت ءِ دروشُم دیگ ءَ شیرمھمد ءُ ھیربکش مری ءِ مزنیں کِردے بیتگ۔چہ پیشگیں گھگیری زْرمبشت آں اے زْرمبشت جتا یک لیکہ ءُ مولے ءَ گوں بندوک کُرتگ۔‘ دپگُپت ءِ شیر مھمد مری ءُ نواب ھیر بکش مری ءَ اگاں ڈیھ آجو بہ بیت ءُ پہ مردماں ھچ کنگ مہ بیت گڑا اے ھنچائیں چیزے بیت۔پمیشکہ گوں شیرمھمد ءَ ھما ورنا بندوک بیتگ اَنت کہ آھاں گوں بلوچستان ءَ مھر ءُ واھگ بیتگ۔سیاست زانت و باز بیتگ اَنت،چوشکہ گوس بکش بزنجو ءُ اتااللہ مینگل بلے نواب ھیر بکش ءُ شیر مھمد مری پہ ورناھاں راھشونے ءِ ارزیشت داشتگ۔  بلوچستان ءِ نامی ئیں ندکار ءُ زانوگر ڈاکٹر نیامت اللہ گچکی ھم ایشانی تہ ءَ ھوار اِنت کہ نودربری ءِ زمانگ ءَ چہ شیرمھمد ءَ سان مند بیتگ۔آئی ءِ گْوشگ اِنت کہ شیر مھمد اے زْرمبشت ’چہ بےسوبی ءَ سوبمندی ءِ نیمگ ءَ بُرتگ۔‘ ڈاکٹر نیامت اللہ گچکی ءِ گْوشگ اِنت کہ شیر مھمد مری اگاں مری دمگ ءَ مہ بوتیں گڑا بوت کنت کہ ھیر بکش مری انچوکیں مزنیں نامے ءِ واھُند نہ بیتگ اَت۔آئی ءِ گْوشگ اِنت کہ ھیربکش مری ءِ دیم ءَ آرگ ءُ سلاہ بندیں جُھد ءِ نیمگ ءَ آرگ ءَ شیر مھمد مری ءِ مزنیں کِردے بیتگ۔ بلوچستان ءِ نامی ئیں ندکار اکتر الی ھان بلوچ نبشتہ کنت کہ شیر مھمد مری چہ ھیر بکش مری ءَ مستر بیتگ بلے وتی میراسی نوابی ءِ دیم ءَ سرجمیں زندگی ءَ دیم پہ چیر بیتگ۔مدام آئی ءِ جُھد ھمے بیتگ چوں کہ بیت نواب ھیربکش ءَ جھل تِریں رنگے ءَ گوں مردماں پجاروکی بہ کنت۔ چہ آئی ءِ جُھد ءَ ھمنچوک بوت کہ نوابی بیگواہ ءُ لینن ءِ نام دلبند ءَ دارگ بوت۔ایشانی نوابی کِرد ھلاس بوت ءُ ایشانی دیم گوں ماسکو ءِ نیمگ ءَ بوت۔ سال  1970 ءَ گچینکاری ءِ آسر ءَ بلوچستان ءِ اولی پرگنگ اسمبلی دیم ءَ آرگ بوت،اود ءَ نیشنل اوامی پارٹی (نیپ) ءِ سرکار جوڑ کنگ بوت، میر گوس بکش بزنجو گورنر،سردار اتا اللہ مینگل مزن وزیر وھدےکہ ھیربکش مری نیشنل اوامی پارٹی ءِ اسمبلی ءَ پرگنگ سروک ءُ نواب اکبر بگٹی زوالپکار الی بٹو ءِ ھمراہ اَت۔ ھمے سال ءِ 10 پروری ءَ پاکستانی لشکر ءَ چہ اسلام آباد ءَ اراکی سپارتجاہ ءَ سلاہ دستیگ کُرت ءُ ھمے گْوشگ بوت کہ اے سلاہ پہ بلوچ گھگیراں راہ دیگ بیتگ اَنت،ھمے گپ ءِ بنیاد ءَ بلوچستان ءَ داں 30 روچ ءَ سدارتی نزام آرگ بوت ءُ نواب اکبر بگٹی گورنر کنگ بوت، گوس بکش بزنجو،اتااللہ مینگل ءُ نواب ھیربکش مری ءَ ھوار شیر مھمد مری ھم دزگیر کنگ ءُ ھیدرآباد ءَ پندل ءِ کیس ءِ نام ءَ بند کنگ بوت اَنت۔ جنرل زیاالھک ءَ زوالپکار الی بٹو ءِ سرکار پروشت ءُ مارشل لا جت،ایشی ءَ پد بلوچ بندیگ یل کنگ بوت اَنت۔ اتااللہ مینگل ءُ شیر مھمد لندن ءُ ھیربکش مری پرانس ءَ شُت۔پد ءَ شیر مھمد کابل ءَ اتک کہ اود ءَ ماسکو دوستیں سرکارے برجاہ اَت،آئی اود ءَ مری ٹک ءِ مردم لوٹائینت اَنت ءُ پد ءَ ھیربکش مری ھم کابل ءَ اَتک۔ بلوچستانءِ تہا شیرمھمد ھان مری ءَ  بابو یا بابو شیر مھمد ءِ نام ءَ نامان بوت ، رند ءَ آئی ءِ نام جنرل شیروپ بوت،سال 1978 ءَ الپتھ تاکبندے ءَ وھاب سدیکی ءِ داتگیں یک گُلگدارے ءَ آئی گْوش ایت کہ بلوچ دودمان ءَ کس ءَ من ءَ سرجمیں نام ءَ ھچبر توار نہ کُرتگ، بس ھیربکش مری ءَ من ءَ شیر مھمد توار کُرتگ ءُ آدگراں ’شیرو‘ گْوشتگ ءُ من وتی دزنام ءَ ھم شیرو نبشتہ کن آں۔ گْوش اَنت کہ آئیءَ جنرل شیرو پمشکہ گْوش انت کہ آ چیرجنگی جنگولے بیتگ ءُ ایوب ءِ زوراکی ءِ بگیری ءَ سلاہ بندیں جنگے کُرتگ بلے’جنرل شیرو ءِ دیم ءَ پ پرچہ آرگ بیتگ اے گپ ءَ روتاک ءُ ھاکم گْوشت کن اَنت چونائی ءَ من ھچبر روس ءَ نہ شُتگ آں، مُردنی اِنت منی واھش بیتگ کہ بہ روآں ءُ لینن ءَ بہ گندآں،ھمے پیم چین ءَ ھم روگ ءِ واھش بیتگ کہ ماؤ ءَ بہ گندآں،چین ءَ کہ روآں گڑا من ءَ جنرل شیروپ ءِ نام دیگ بیت۔‘ یات بہ بہ اِت کہ زلپکار بٹو ءَ شیرمھمد مری ءَ جنرل شیروپ ءِ نام داتگ ءُ آئی ءِ سیادی گوں ماسکو ءَ بندوک کُرتگ۔ شیر مھمد مری ءِ پُچ ءُ اندام جتا بیتگ،آئی مریانی مزنیں پاگ،کُرتا،مری سواس ءُ واسکٹ گْور ءَ کُرتگ ءُ آئی ءِ مزنیں بروت ءُ ریش مری دروشُم ءَ بیتگ اَنت۔بازیں ورناھاں آ زمانگ ءَ شیرمھمد مری ءِ سٹائل زُرتگ۔ ھپت روچی (تکبیر) ءِ کشندہ مدیر مھمد سلاہ دین ءَ کراچی ءَ دو ءُ نیم سال گوں آئی ءَ بندیگجاہ ءَ گْوازینتگ۔آئی ءِ بیرانی ءِ سر ءَ آئی نبشتگ کہ شیر مھمد مری بلوچی، براھوی، پشتو، سندھی، سرائیکی، پنجابی، پارسی، انگریزی، اردو ءُ روسی زباناں وانگ ءُ ھبر کنگ زانتگ۔آئی ءَ اردو ءِ کْوھنیں شائرانی تھامیر ءُ گالب ءِ شیئر پہ دل یات بیتگ اَنت،آئی سک کم گپ کُرتگ بلے کسان کسانیں چیزانی سر ءَ شریں وڑے ءَ گپ ءُ ترانے کُرتگ۔‘ آ نبشتہ کنت کہ ’ایوب ھان ءِ دور ءَ سلاہ بندیں جُھد ءِ میان ءَ آئی ءِ یک پادے ءَ تیروارتگ۔پمشکہ کمے لنگے جتگ،سھب ءَ کہ دروازگ پچ بیتگ آئی گوں وتی گرانیں سواساں سرجمیں واڈ ءَ تُرّ وارتگ بلئے ایدگہ گوں آئی تَرّ اِت نہ کُرتگ،داں اے میانءَ ایدگہ مردماں جان ششتگ، ھاکروپ ءَ رُپت ءُ روپ کُرتگ،گڑا نوں آ پہ جان شودگ ءَ شُتگ ءُ آئی دزبندی کُرتگ کہ من پوھی یا جانشود ءَ باں ایدگہ نزیک ءِ پوھی ءُ جانشوداں کس مئیت اِنت۔اے پھریزگ ھیا ءِ شونداتی ءَ کنت، کہ آ ایشی ءَ بلوچ دودانی یک ٹوھیں بھرے سرپد بیتگ۔‘ مھمد سلاہ الدین ءِ نبشتانک ءِ رد ءَ  شیر مھمد ءَ وتی جان مدام مانپوش اِتگ ءُ وپسگ ءِ وھد ءَ ھم جاندر نہ بیتگ۔ابید چہ پاد ءِ کُڈاں آئی ءِ جان ءِ دگہ ھچ جاہ گندگ نہ بیتگ۔سُھب ءِ سر ءَ آئی ءَ وتی مود ءُ ریشانی رندگ ءُ پاگ بندگ ءَ کم چہ کم دو ءُ نیم کلاک وھد زُرتگ،پد ءَ گڑا ھرز بندے وارتگ،روتاک ئِے ونتگ ءُ دیواناں ھوار بیتگ ءُ نوکیں گپ ءُ ھالانی سر ءَ گپ ءُ تران ئِے کُرتگ۔‘ ’شیر مھمد اگاں باز گپ نہ کُرتگ بلے وتی ستک ءُ سیاسی لیکہ آئی ھچبر چیر نہ داتگ ءُ اے ھم گْوشتگے کہ شراب ورآں بلے ابید چہ وتی لوگبانک ءَ دگہ جنین من ھچبر دست نہ جتگ۔بلوچ دودمان ءِ تہ ءَ اے انچیں میارے کہ ھچ پیم ءَ پھل کنگ نہ بیت ءُ ما لَج ءِ پھریزوکیں۔   اوگانستان ءِ درانڈیھی ءِ میان ءَ جنرل شیرو ءُ نواب ھیر بکش مری ءِ میان ءَ جیڑہ ودی بیتگ۔بلوچستان ءِ نامی ئیں ندکار اکتر الی نبشتہ کنت کہ ھمبل پہ وتی نواب ءُ ٹک ءَ جان ندر کنگ ءَ تیار بنت بلے بژن کہ اوگانستان ءَ جھمنند بیگ ءِ میان ءَ آ چہ نواب ھیربکش ءَ دلگران بیتگ ءُ وتی راہ ئِے جتا کُرتگ۔‘ یک لس گپے ءِ رد ءَ آھانی میان ءَ لھتیں مالی جیڑھانی بنیاد ءَ جیڑہ بندات بیتگ اَنت کہ آئی وتی بھر لوٹ اِتگ کہ ھمے مالی کمک کہ چہ کابل ءَ ھوار دگہ ڈیھاں آھاں رس اِتگ اَنت۔بلئے میر مھمد الی تالپور ءُ اھتر الی اے گپ ءَ ایر جن اَنت ، ایشانی گوشگ اِنت کہ اگاں جیڑہ ز رءِ بوتیں داں پاکستانی سرکارءَ چہ آھاں گیش زر رستگ۔ ڈاکٹر نیامت اللہ گچکی ءِ گْوشگ اِنت کہ ھیربکش نوابے بیتگ،شیر مھمد یک پیرمردے بیتگ بلے آئی ءَ انچو ارزشت نہ بیتگ کہ یک ٹکی مردمے ءِ بیت آئی ءَ سیاسی ارزشت بیتگ،اے جاوراں اڈاند ودی کُرتگ ءُ ٹکی پگر ءَ آئی ءَ مزنیں دِکھے داتگ۔ اوگانستان ءَ مزھبی  سرکار ءِ جوڑ بوگ ءَ پد شیر مھمد ھان مری ءِ درانڈیھی ھلاس بیت ءُ آ پاکستان ءَ کیت۔سال 1993 ءَ اھوالکار آمرزیا ءَ چہ دی نیوز انٹرنیشنل ءِ نیمگ ءَ گوں شیرو ءَ گلگدارے کتگ ات کہ آئیءِ تھا یک جاھے شیرو ءَ گوش ایت، انچوشکہ اوگانستان ءَزھبی سرکار جوڑ بوت،کہ آئی ءِ پُشت ءُ پناھی ءَ ایران کنگ ءَ ات، منی گس اِش چپ ءُ چاگرد ءَ انگر کُرت۔مئے سلاہ اِش پچ گیپتگ اَنت ءُ مارا گْوشتگ اِش کہ داں نیم ادار ءَ وتی گس ءَ یل کن ءُ برو۔ شیر مھمد مری ءَ ھمے گلگدار ءِ تھا گْوش ایت کہ من آ مردمان ءَ گْوشتگ کہ اے کسانیں وھد ءَ گوں وتی کھول ءَ دگہ جاھے چون شُت کن آں بلےآ مدام ھمے وڑ ءَ من ءَ دلسیاہ کنگ ءَ بیتگ اَنت ءُ آھاں من ءَ پہ دراھگ ءَ لاچار کتگ۔   دپگُپت ءِ ھمائی ھما روچ ءَ کہ من اوگانستان ءِ یل کنگ ءُ روگ ءِ شور کنگ ءَ ات آں ھمے روچءَ اوگان وزیر مولوی یونس ھالس رھوت کُت ءُ دزبندی کت کہ ترا گوں کھول ءَ پہ سلامتی بالی پٹ ءَ راہ دیاں۔ھمے وھد ءَ چیزے ادار ءِ تہ ءَ پاکستانی  سپارتجاہ ءِ کارگشاد اتک ءُ آئی وتی گاڑی ءِ سر ءَ مارا بالی پٹ ءَ سر کت۔   شیر مھمد مری چہ اوگانستان ءَ واتر بوگ ءَ پد نادراہ بیت۔اود ءَ آ پہ وتی درمان کنگ ءَ ڈاکٹر ادیب رِزوی ءِ کِر ءَ روت ءُ پد ءَ پہ گیشیں  درمان کنگ ءَ انڈیا ءَ روت کہ ھمود ءَ پد ءَ بیران بیت۔کْوھنیں اھوالکار مجاھد بریلوی ءَ وتی یک گلگدارے ءَ گْوشتگ کہ من ءَ اے گپ سک کُھت بیت کہ منی نام بزنجو، مینگل ،مری ءُ بگٹی آنی گون ءَ گِرگ نہ بیت چونائی ءَ منی دیمونی چہ آھانی جُھداں کمتر نہ اَنت۔   مجاھد  بریلوی ءِ گْوشگ اِنت کہ 1970 ءِ دھک ءَ اگاں بلوچ راجدوستاں وتی جیڑہ یکِر بہ کُرتین اَنت گڑا مرچی بلوچستان ءِ جاور دگہ بیتگ اِت اَنت۔