ریڈیو زْرمبش بلوچی | ریڈیو زْرمبش بلوچی,دروشم-بلوچ

ھیر ءَ چہ کوریں ھیدر ءَ لوٹ ئے

ھیر ءَ چہ کوریں ھیدر ءَ لوٹ ئے

OCT

10
10 / 10 / 2020 نبشتانک 131

ھیر ءَ چہ کوریں ھیدر ءَ لوٹ ئے


نبشتہ کار: دْروشم بلوچ


سادگیں بلوچک تئی زگر بیت کہ اللہ ھو درس یک ھساب ءَ اَنت،ارشاد پرواز ءِ گپ سد در سد راست اِنت۔بلوچ ءَ بہ جن، بہ کش ، کم شرپ کن بلےچار وشیں دانک بہ کن پشت ءِ درسیں چیزاں بیھال بیت۔مرگ بہ گندئے سک گران اِنت کہ مردم چہ مرگ ءَ ترس اَنت بلے مردم زاناں داں چنت ءَ زندگ بیت؟گڑا گھتر نہ اِنت کہ مردم مرگ ءَ مڑاھے گون بہ کنت۔اے گپ ءَ بلوچ شر زانت کہ پاکستان ناں بلوچ ءِ بوتگ ءُ ناں کہ دیم ءَ بیت۔پیش ءَ پاکستان ءَ بلوچ وتگڑیں مزھبی ملا ءُ مزھب ءِ نام کلاگ بستگ اَنت بلے نوں و مزھب ءِ دروگیں شھزانتی ءَ ھم وتی سند جتگ۔ھمے وڑ ءَ وتگڑیں سیاست ءَ ھم نوں وتی روچ بیگاہ کرتگ اَنت۔ھرچیز بلوچ ءِ دیم ءَ چو روچ ءَ پدر اِنت۔پشت کپتگیں چیز ایوک بلوچ ءِ پاد آھگ اِنت نوں وھد اتکگ کہ بلوچ راج یکپارگی دژمن ءِ بگیری ءَ پاد بئیت۔دژمن ءِ لگوری ءِ ھال ءَ ھم شر پوہ ایں دژمن چہ گیش ءَ گیش دگہ لھتیں مردم کش ایت اے نوں پہ بلوچ راج ءَ چوشیں جیڑھے نہ اِنت۔بلوچ راج ءَ ھمک ھما زوراکی گوں پاکستان ءَ دیستگ کہ آئی ءِ گمان ھم پیش ءَ ءُ انگت بلوچ آجوئی دوستیں گلاں کرتگ ءُ کنگ ءَ اَنت۔دگہ نوک ءُ بیمناک تریں زوراکی یے پشت نہ کپتگ کہ بلوچ ترس ءِ آماچ بہ بیت۔نوں بلوچ ءَ دیم ءَ جنزگ ءُ راجی بامرد ءُ شیرزالانی دیمونیانی دیم ءَ در آیگی اِنت۔نوں پہ دست ءِ سر ءَ کنگ ءُ اپارگ ءَ ھچ نہ منتگ۔بلوچی ءَ گْوش اَنت دنتانے کہ سر ایت روچے ناں روچے الم کپ ایت۔پاکستان ھما دنتان ءِ وڑ ءَ نوں سرگ ءَ اِنت بلے کپگ ءِ ودار کنگی نہ اِنت چومہ بیت کہ کپگ ءَ پیش شومک ءِ نادراھی بہ دنت ءُ بہ کپ ایت۔پمیشکا یکپارگی بلوچ راج ارش بہ کنت ءُ پاکستان ءَ چہ بُن ءُ بیھ ءَ بہ گْوج ایت۔انوں پاکستان بازیں تھی جیڑہ ءُ جنجالاں ھوار مالی تک ءَ ھم نزور اِنت۔دومی نیمگ ءَ جھانی سیمی مزنیں جنگ ءِ تیاری ءَ چین ءُ امریکا ھرکس وتی لابیئنگ ءِ مھکم کنگ ءِ جُھد ءَ دزگٹ اِنت۔کوروناوائرس سیمی مزنیں جنگ ءِ بنداتی سلاہ اِنت کہ ایشی ءَ بازیں ڈیھاں ھوار پاکستان ھم جوانیں رنگے ءَ وتی انگر ءَ زرتگ۔اے درسیں جیڑہ پہ بلوچ راج ءَ بہ گند ئے سیت مند بہ بہ اَنت اگاں بلوچ سیت زورگ ءَ بہ زانت ءُ وتی راجی ارزشت ءَ بہ پھم ایت ءُ چہ اے گپ ءَ برز تر بہ جیڑ ایت کہ مسلمان مسلمان ءِ برات اِنت۔مردم کہ اے درسیں چیزاں گند اِیت داں برے برے جیڑ ایت کہ من چونیں نیست ءُ نابودیں چاگردی ءَ زندگ آں کہ نہ اِد ءَ زندگ ءُ باسمائیں مردماں ارزشت ھست ءُ نہ پہ سرڈگار ءَ ندربوتگیں سراں۔پمیشکا پاکستانی ھزیریں لشکر پل ءُ پسیلاں لپاشگ ءُ زھگ ءُ جنیناں کم شرپ کنگ ءَ چک ءُ پد نہ بیت۔چاگرد ءِ زندگ ءُ باسمائیں مردماں گچین کنگ،آوارجنگ ءُ شھید کنگ ءَ گْوش ئے کسے ءِ گوش ءَ مورے ھم نہ وارت کہ بلوچ چونیں دردناکیں نوبتے ءَ گْوزگ ءَ اِنت۔اگاں دمانے کسے ءَ بہ جیڑ اتیں بہ گندئے ملکناز،کلسوم،شاھینہ ءَ ھوار بازیں جنین ءُ مردمینانی کشندھاں چو سر ءِ بازار دمک وال نہ کرتگ اَت ءُ وتگڑیں وزیر ءُ گزیراں چاگرد ءِ تہ ءَ پاگ نہ بست پہ ایمنی نہ نشت اَنت۔وائے بےسمائی کہ ترا ھچ درمان نیست۔پمیشکا ھیات ءُ ھنیپ چمروک ءِ وڑیں مردم سر ء بازار تیرباران کنگ بہ اَنت ءُ ھرکس ءُ ناکس زانت کہ کشندہ کے اِنت۔بلے ھرکسی زبان ترک جتگ،ھرکس وتی نوبت ءِ وداریگ اِنت۔اے گپ ءَ ھچ شک نیست ءُ آ روچ دور نہ اِنت کہ چاروگانی جند ءِ زھگ ءُ جنین ھم اے رستریں لشکر ءِ پادوناں لیپگ بہ اَنت۔


مرچی و پہ چار کران ءَ بازینے ءَ وتی بلوچی ءِ شلوار کش اِتگ ءُ وش منی ءِ آماچ اَنت۔پہ آدگرانی زھگ ءُ جنین،بامردانی شھیدی ءَ شاتکامی کن اَنت بلے وھد وتی تاباں پریچان اِنت ءُ دژمن ءِ بےھاٹیگی ءُ پژمردگی چو روچ ءَ پدر اِنت کہ دژمن بلوچ راجی کنگرانی دیم ءَ بےسوب بوتگ ءُ نوں وتی چم ءَ وت کور کنگ ءَ اِنت۔بلوچ زروانانی پرمان ءِ پاس کنگ ءَ وتگڑیں وزیرانی پندل ءُ گوںدژمن ءَ شور بوگ پہ راج ءِ کور پھمیں مردمانی چمانی پچ کنگ ءَ مزنیں منانکے اگاں راج درسیں چیزاں پشت جنت بلے اے چیز ءَ پشت جت نہ کنت۔یک نیمگے دژمن ءِ سرجمیں سیمسرانی بند کنگ،پہ دریاوردانی دریا ءِ پابندی ءُ دومی نیمگ ءَ زروانانی دستیگ کنگ ءَ زورگری ءِ مھکم کنگ مزنیں ءُ پدریں کارے کہ دژمن پہ بلوچ ءَ ھچ پشت گیجگ نہ لوٹ ایت۔نوں گپ پہ راج ءَ پشت کپ ایت کہ آ پہ وتی زندگ دارگ ءَ جوانیں گامگیجے زور ایت اگاں ناں انگت اوپار ءِ دامن ءَ دار ایت ءُ ’’ ھیر ءَ چہ کوریں ھیدر ءَ لوٹ ایت۔‘‘