ریڈیو زْرمبش بلوچی | ریڈیو زْرمبش بلوچی

گْوادر/ کراچی: پاکستانی لشکر ءُ چیریں ادارھانی کارمنداں یکیں کھول ءِ دو ورنا آوار جتگ ءُ بیگواہ کرتگ۔

اھوالکار ءِ رد ءَ چہ گوادر ءَ زورگریں پاکستانی لشکر ءِ دست ءَ زور بیگواہ کنگ بیتگیں ورنا ءِ نام میران ء ھسین اِنت کہ کیچ ءِ ھند پیدارک ءِ جھمنند اِنت۔ پاکستانی لشکر ءُ چیریں ادارھانی کارمنداں گوستگیں روچ ءِ بیگاہ ءَ گوادر ءِ شھر ءَ چہ پرپٹ ءَ ایر کرتگ ءُ گوں وت برتگ کہ انگت بیگواہ اِنت۔

بنشون ءِ رد ءَ چہ کراچی ءَ زور بیگواہ کنگ بیتگیں ورنا ءِ نام سمیر ء نیامت اللہ اِنت کہ کیچ ءِ ھند پیدارک ءِ جھمنند اِنت۔ دوئیں زور بیگواھیں ورنا یکیں کھول ءِ مردم اَنت ءُ شھید کمال کھدائی ءِ نزیک آزیز اَنت۔

زور بیگواھیں ورنا میران ءِ بارو ءَ گوشگ بیگ ءَ اِنت کہ پیسر ءَ یک رندے 22 مارچ 2014 زور بیگواہ کنگ بیتگ، داں شش ماہ ءَ پاکستانی لشکر ءِ چیریں آزارجاھاں بند بیگ ءَ پد آجو بیتگ۔ اے آئی ءِ دومی رند اِنت کہ زور بیگواہ کنگ بیتگ۔ #BalochistanCrisis

بنشون: اھوالکار / اکس: اھوالکار