تربت: بلوچستان سیول سوسائٹی ءِ سروک گلزار دوست ءَ تربت پریس کلب ءَ پریس کانپریس کرتگ ءُ گوشتگ کہ ھوشاپ ءَ گوستگیں روچ ءَ پولیس ءَ بمب تراکے ءَ سے مردم ءِ مرگ ءِ ٹاپارجتگ اَت چوناھا اے اے مردم چہ پیسر ءَ بیگواھیں مردم بوتگ اَنت اگست ءِ ماہ ءَ جتا جتائیں وھداں آوار جنگ بوتگ اِنت۔
آئی ءَ گوشتگ کہ آیانی تہ ءَ آدل ء ھسا ءِ ایپ آئی آر نبیسگ بوتگ، آ 22 اگست ءِ بیگاہ ءَ چہ منی ناکو زاتک مجید شاہ ءِ اوتاک ءَ لشکر ءَ بیگواہ کرتگ، چہ اے سئیں ورنایاں ابید تیوگ ءَ ھپت ورنا آوار جنگ بوتگ، آیانی تہ ءَ چار مردم انگت بیگواہ اَنت۔ مارا ھمے ترس اِنت کہ اے ھم تاوان دیگ بنت۔ پمیشکا ما گوں آمیدگس ءُ میان استمانی مردمی ھکانی ادارہ، ایچ آر سی پی ءُ آدگہ مردمی ھکانی کارکنوکیں ادارھاں لوٹ کن ایں کہ پہ اے چاریں مردمانی سلامتی ءَ توار چست بہ کن اَنت۔
آئی ءَ گوشتگ کہ بمب تراک ءَ آدل ھسا ءِ ھواری ءَ آئی برات شاہ جان ھسا ءُ نبی داد کشگ بوتگ اَنت، پیر جان ء لشکران، زبیر ء لشکران، اھمد ھان ء شگراللہ ءُ شوکت ءِ لواری انگت ءَ بیگواہ اَنت اے درس یکین کھول ءِ مردم اَنت، ما ھمے وڑ ءَ گمان کنگ ءَ ایں کہ اے ھندی کشندہ ٹولی ءِ پرمان ءِ رد ءَ آوار جنگ ءُ دروگیں بمب تراکے ءَ کشگ بیتگ اَنت۔ اے سے ئیں مردمانی جان ءَ تیر ءِ ٹپ ءِ نشان گندگ بوتگ۔ بزاں اے چہ بمب تراک ءَ پیش تیر جتگ ءُ کُشتگ اَنت۔
آئی ءَ گوشتگ کہ ھما گاڑی بمب تراک ءَ کارمرز کنگ بوتگ آئی بارو ءَ انچوش گوشگ بوگ ءَ اِنت کہ سی ٹی ڈی ءَ سے روچ پیش چہ شھدگ ءَ پچ گیپتگ۔
آئی ءَ گوشتگ کہ پیش ءَ چیریں ادارھاں تچکی ءَ بلوچ ورنا، نودربر ءُ سیاسی کارکن کشتگ اَنت ءُ ژانگولیں جون چگل داتگ اَنت، چہ میان استمان ءِ دزمانجنی ءَ پد نوں پہ اے کاراں سی ٹی ڈی کارمرز بوگ ءَ اِنت۔ بلوچاں وت ماں وت میڑینگ ءُ بلوچ ءُ پشتونانی میڑینگ ءِ جھد کنگ بوگ ءَ اِنت۔
آئی ءَ گوشتگ کہ بلوچ سیاسی پارٹی یک بلاھیں راجی جیڑھے ءِ سر ءَ سیاست کنگ ءَ بلے پہ زور بیگواھیں مردمانی آجوئی ءُ زوریں بیگواھی ءِ گر ءُ دار کنگ ءَ بے سوب بوتگ اَنت ءُ آیانی دلگوش گوں اوٹ ءَ اِنت۔ آیانی دیم ءَ بلوچ زور بیگواہ کنگ بوگ ءَ اَنت، ژانگولیں جون چگل دیگ بوگ ءَ اَنت، دروگیں میڑاں مردم کشگ بوگ ءَ اَنت، درسانی گندگ ءَ پد سیاسی ٹولی بے توار انت۔
بنشون: پریس کانپریس / اکس: اھوالکار
